ته ته

سواڵکه‌ر

aragel — Wed, 03 Apr 2013 22:31:06 GMT

سواڵکه‌ر

نه‌بیه‌بێ مانگێوه‌،یه‌رێ جارێ لوانێ قۆم و ئامانێوه‌،که‌ڕه‌تی دمایین ئه‌جێ دڵم خه‌به‌رش پنه‌دریان که‌ هه‌رمانه‌کێ وڕاره‌.به‌ڵام نیمه‌و شه‌وێ به‌ ماشینێوی شه‌ق و شڕ که‌وتانێ ڕا و ساحبێ شه‌به‌ق نه‌ده‌منابێش یاوانێ یانه‌و سه‌یێذ ئه‌سه‌دۆلڵای.ته‌قه‌و به‌ره‌یم دا عه‌زیزخاتوونه‌ ئاما و تا چه‌مش پنه‌که‌وتا جۆرێوێش سه‌رئاما و کرژ وارشێوێش گێرت. هه‌ر پاسه‌ که‌ وێش لادێ بلوو چوه‌ر وڕوڕ دیه‌ی دیێم په‌ی و واتش:-مه‌تی مه‌گه‌ر نه‌له‌ی بینی؟ ناذێم ڕوه‌مه‌ره‌، وه‌شی تشیم که‌رذو لوانێ چوه‌ر.داڵانه‌نه‌ که‌ ویه‌رذا،حه‌وشه‌نه‌،زاوڵێ که‌ تازه‌ وه‌رمه‌نه‌ هۆرستێ بێنێوه‌ و قه‌ڕاخوو حه‌وزی خه‌ریکوو ده‌سو پل شته‌ی بێنێ،هۆرستێوه‌ و دیه‌ی دیێنێ په‌یم.پالوو دیواره‌که‌ی نیشتاره‌ و تۆشه‌به‌ره‌کێم نیا پاڵوو وێم و چاگه‌نه‌ مه‌نانێوه‌. عه‌زیزخاتوونه‌ هه‌مته‌ر په‌رساشه‌وه‌:-مه‌تی راسی نه‌له‌ی بینی؟ واتم:-لوه‌ی بێنێ،به‌ڵام دیسانه‌وه‌ گێڵانێوه‌. عه‌زیز خاتوونێ وات:-ئیسه‌ که‌ قه‌رار بێ گێڵیه‌وه‌ سا چی لوه‌ی؟ چیه‌نه‌ مه‌نێنیه‌وه‌و،ئێمه‌یچ بێ خه‌مێ بێنمێ. خوانێ و واتم:-ده‌ی منیچ ئامانا که‌ بێ خه‌مێ بیدێ،به‌ڵام ئی که‌ڕه‌ته‌ په‌ی ته‌وافی نامه‌ینا،هه‌رمانێوه‌ ته‌ره‌م هه‌نه‌. زاوڵه‌کێ ئامه‌ی ده‌ورم و عه‌زیزخاتوونه‌ که‌ هه‌رڤه‌ره‌نه‌ ده‌ی دێ پێوه‌ره‌،دالێو دوورته‌ر،پاڵوو کووزله‌کێ نیشته‌ره‌و په‌رساش:-چ هه‌رمانێوه‌؟ واتم:-ئامه‌ینا په‌ی وێم یه‌سێوه‌ خاک بسانوو،مزانی وه‌رمم دیه‌ن؟یه‌رێ شه‌وێ چیه‌وه‌ڵته‌ر وه‌رمه‌نه‌ مه‌رذێ بێنێ. عه‌زیز خاتوونه‌ پڕانه‌ دلێ قسام و واتش:ویرێ خرابێ نمه‌که‌ره‌. واتم:-ئتر ته‌مام،پنه‌واز بێ که‌.... عه‌‌زیز خاتوونه‌ یاگه‌کێشه‌نه‌ فاڕیاوه‌ و واتش:-تۆ کێ زه‌ڕت نه‌بێ؟ واتم:-بێم،و تۆشه‌به‌ره‌کێم نیشانه‌دا. تووڕێ بیه‌و هۆرسته‌وه‌ و واتش:-ده‌ی سا ئیسه‌ که‌ زه‌ڕت هه‌ن چی ده‌یمه‌ده‌ره‌ جه‌ سه‌یێذی داماگ زه‌ڕ مسانی و وه‌خت و ناوه‌خت کێشیشه‌ره‌ چنه‌؟سه‌یێذ ساحبێ تا وره‌گا ڕه‌مای ڕه‌مۆ و نمه‌تاڤۆ له‌مۆ زاوڵه‌کاش تێر که‌رۆنه‌،تۆجێ که‌ وێڵ کۆنه‌ نیه‌نی،هه‌ر مه‌ی و ملی.شۆنیه‌ره‌ هه‌ر پاسه‌،واق واق دیا دلێ چه‌مامه‌ره‌ داواچش ده‌ووه‌،به‌ڵام منیچ دیانێ دلێ چه‌ماشه‌ره‌ و داواچم نه‌ذاوه‌. عه‌زیزه‌ بۆڵناش و پله‌کانێره‌ لوه‌ی لوێ سه‌ر و زاوڵه‌کێچ شۆنیشه‌ره‌،من هه‌ر چانه‌ پاڵوو دیواره‌که‌ینه‌ مه‌نانێوه‌ و چه‌مێم قووجنه‌ی و وێتا. وه‌رمه‌نه‌ ئه‌جێم سه‌یێذ دووکانه‌نه‌ ئامانه‌وه‌ و چنی ژه‌نه‌کێش چیروو داروو حه‌وشه‌کێنه‌ مدرانه‌ره‌ و خه‌ریکێنێ باسوو من که‌را،سه‌یێذ خه‌ریک بێ وه‌رێسه‌ بینێ داره‌که‌یوه‌ و ژه‌نه‌کێش کرژکرژ قسێ که‌رێ.وه‌رمه‌نه‌ چڵه‌کیانێره‌ و دیم که‌ به‌ ڕاسێ سه‌یێذ ئامانه‌وه‌ و داڵانه‌کێنه‌ به‌رزبه‌رز چنی ژه‌نه‌کێش قسێ که‌رۆ،سه‌یێذی وات:-چێشش چنی که‌روو،هه‌رچی بۆ ئه‌ذامه‌نه‌،تۆ ڕه‌یوه‌م په‌ی بێزه‌وه‌. ئه‌زیز خاتوونێ وات:-نمه‌زانوو،ئی جاره‌ ئامه‌ینه‌ په‌ی وێش یاگێ بسانۆ،لوه‌ینه‌ په‌ی "خاکوو فه‌ره‌جی"و مامه‌ڵه‌ش که‌رذه‌ن، به‌ تۆشه‌به‌رێوه‌ زه‌ڕۆ ئامه‌ینه‌،وه‌روو چیشیا مه‌لۆ لائه‌و زاوڵکاش، ئی گرذ کۆڕو کناچشه‌ هه‌ن،مه‌گه‌ر تۆ جه‌ گرذیشا لاژاوته‌ره‌نی،که‌ ئامه‌ینه‌ زۆرش ئاذێنمێ ونه‌،سه‌یێذ عه‌ودڵا، سه‌یێذ مۆرتێزا،کاک جه‌واد،سه‌یێذ عه‌لی،سه‌فیه‌،حۆریه‌،ئامینێ،مه‌گه‌ر ئینێ کۆڕ و کناچه‌ش نیه‌نێ؟زه‌مه‌ی ده‌ڵه‌مه‌نێش با مدرا؟ سه‌یێذ دالێو ماتش که‌رذ و واتش:خاسا،هه‌ر کارێو که‌ دڵت پوه‌ن که‌رذه‌ من ئتر بێ هاز که‌وته‌نا. شۆنیه‌ره‌ ئامه‌ی وه‌ره‌وه‌.من چه‌مم قووجنه‌ی،سه‌یێذ ئه‌هوه‌ن ئاما و لوا سه‌ر،هه‌مته‌ربێ ده‌نگێو ئاماره‌ وار و زیاره‌.ده‌نگوو به‌ره‌که‌یم ئێژنی.شۆنیه‌ره‌ گرذوو ڕۆکه‌ی هه‌ر چا یاگۆ وێمه‌نه‌ پاڵوو دیواره‌که‌ینه‌ نیشتاره‌،ونه‌وزی که‌رذێنێ.ساتێو که‌ هایم بیه‌وه‌ دالێو تۆشه‌به‌ره‌کێنه‌ نانه‌ وێشکێم به‌رذ ئارذه‌ و وارذه‌م و ئه‌یزه‌نۆ وێتاوه‌.کاتێو که‌ چه‌مم که‌رذێوه‌ هه‌وا تاریک نابێشه‌ره‌،هۆذه‌نه‌ چراویشا گیسنابێنه،ئه‌سێح ئه‌زیزخاتوونه‌ چنی زاوڵه‌کا گلێرێ بیێنێوه‌.چن جارێ قۆزانێ،شۆنیه‌ره‌ لوانێ پاڵوو حه‌وزه‌که‌ی،ده‌سم دا دلێ ئاوه‌کێ،که‌سێو نه‌زیاره‌،فره‌ ویارام دا به‌ وێم پله‌کانه‌کاوه‌ لوانێ سه‌ر و دیم که‌ گرذێشا ده‌وروو چراوه‌کێنه‌ نیشتێنێره‌ و په‌شۆکیه‌نێ. هه‌ر چانه‌ دلێ تاریکیێنه‌ دیانێشا په‌ی.خه‌ریکێ بێنێ وره‌گانه‌ وه‌رێنێ.نانه‌شا که‌ ته‌مانا،سه‌ره‌م به‌رذه‌نه‌ چوه‌ر،چراوه‌کێ گرذوو هۆذه‌که‌ی نه‌گیسنێنه‌،په‌وکه‌تی هیچ که‌س نه‌ذیانێش،شۆنیه‌ره‌ یه‌واشێو واتم-عه‌زیز خاتوون،عه‌زیز عه‌زیز خاتوون؟ ماهرۆخه‌ کناچه‌ گه‌وره‌کێو ئه‌سه‌دۆڵڵایی به‌رزه‌ په‌ی ڕاسه‌ بیه‌وه‌و چێقناش،گرذێ هۆرستێوه‌،عه‌زیزخاتوونه‌ فتێڵه‌و چراوه‌کێش دا سه‌ر و شۆنیه‌ره‌ هۆرسته‌وه‌ و ئاما وه‌ره‌وه‌ واتش:گه‌ره‌کتا چێش که‌ری؟گه‌ره‌کتا زاوڵه‌کێم زاڵه‌ تره‌کێ با؟ من یه‌واشێو لوانێ دماره‌ و واتم:سه‌یێذ نامانه‌وه‌؟ عه‌زیز خاتوونێ وات:-ئێشه‌و نمه‌یوه‌. واتم:-چکۆ بۆسوو؟ واتش:-چووزانوو،هه‌ر یاگێوێت دڵ پوه‌ن بیژیه‌ره‌. هه‌ر چا هه‌یوانه‌کێنه‌ ئیژیانێره‌ و وه‌رمم پۆره‌ که‌وت. سه‌وایی ساحبێو په‌ی نمه‌ی هۆرستاوه‌،زانێنێ که‌ عه‌زیزخاتوونه‌ چێوێوێم نمه‌ذۆ پنه‌،په‌وکه‌تی تا نماکێم وانا تۆشه‌به‌ره‌کێم هۆره‌ گێرته‌ و زیانێره‌ و لوانێ په‌ی حه‌ره‌مێ. شۆنیه‌ره‌ لوانێ په‌ی شه‌بێستانی و پاڵوو به‌ره‌که‌ی نیشتاره‌،به‌ ده‌سم ڕوه‌م گێرته‌مه‌ره‌ و ئه‌یزه‌ن وێتانێوه‌.ساتێو که‌ چڵه‌کیانێره‌ ڕۆجیار دلێراسه‌و ئاسمانیه‌وه‌ بێ زه‌ڕ که‌ چیلاو چۆلامه‌وه‌ بێ گڵێرێم که‌رذێوه‌ لکه‌یم ده‌ی گۆشه‌و تۆشه‌به‌ره‌کێم و که‌وتانێ ڕا. نزیکوو نمه‌ڕۆیی ئامانێوه‌ یانه‌،په‌ی زاوڵه‌کا که‌ڵه‌شیر قه‌نی و سۆهانێم ئه‌سابێ،ته‌قه‌و به‌ره‌یم که‌ دا، ماهڕۆخه‌ ئاما،تا به‌ره‌که‌ش لاتره‌ک که‌رذوو چه‌مش پنه‌ که‌وتا ده‌مووله‌حاز به‌ره‌که‌ش داوه‌پوه‌ و لوا،دیسانه‌وه‌ ده‌سم که‌رذ ته‌قه‌دای،ژه‌نێوه‌ ئاما په‌شتوو به‌ره‌ی و واتش که‌ سه‌یێذ ئه‌سه‌دۆڵڵا یه‌رێ مانگێ هه‌ن که‌ چی یانه‌نه‌ لوان،شۆنیه‌ره‌ ئتر خه‌به‌رێوێش نه‌بی،هه‌مته‌ر ته‌قه‌م دا،هه‌ر ئا ژه‌نێ ئاما و واتش نمه‌زانۆ ئاذێ په‌ی کۆگه‌ی لوه‌ینێ. هه‌رمانێوه‌م که‌ نه‌بێ تا ده‌می عه‌سر پاڵوو یانه‌که‌ینه‌ په‌ڕ بێ زاوڵێ. واڵێ زلام م ناشێرینوو ڕه‌خشه‌نده‌یچ دلێراسه‌و بانجڵه‌که‌ینه‌ نیشتێبێره‌و په‌ی زاوڵه‌کا چێو ورازێ.منش که‌ دیا فه‌ره‌حه‌ش که‌وته‌نه‌.زاوڵه‌کێچ وه‌شیشا بێ.ڕه‌خشه‌نده‌ و سه‌یێذ عه‌ودڵڵا که‌ لوه‌ی بێنێ په‌ی ده‌گایی،قه‌راریچ نه‌بێ پی زوویه‌ گێڵاوه‌. نان و چاشت،هه‌رچیوێت دڵ پوه‌ن فره‌ بێ. زاوڵه‌کێ ده‌یمه‌ده‌ره‌ پڕای پڕێنێم پۆر،حه‌وشه‌نه‌ که‌وتێ بێنێ شۆنیم،گه‌ره‌کشا بێ بزانا تۆشه‌به‌ره‌کێمه‌نه‌ چێش هه‌ن. به‌ڵام نه‌تاوێنێ،ئاذێچێ پسه‌و ئه‌ذاو تاته‌یشا گه‌ره‌کشا بێ بزانا تۆشه‌به‌ره‌نه‌ چێشێم هه‌ن. واڵۆ ڕه‌خشه‌نده‌ی که‌ بانجڵه‌که‌نه‌‌ نیشتێ بێره‌ قلیه‌ی قلیێوه‌،قژێش که‌ ئه‌جۆ هه‌نگه‌وێن بێ دیێشاوه‌ په‌شتوو گۆشاش و واچێ:-مه‌تی دلێ تۆشه‌به‌ره‌کێته‌نه‌ چێش هه‌ن؟من که نه‌تاوێنێ واچوو ته‌نیا واچێنێ:-هیچ،چێش دلێشه‌نه‌ بۆ؟ گه‌ره‌کم بێ بزیه‌وره‌ بلوو،زاوڵه‌کێ گه‌ره‌کشا بێ به‌یا چنیم. به‌ڵام من هه‌ر جۆر بی خه‌ڵه‌تنێنێشا لوێنێ په‌ی خیابانی.چوار ڕه‌یو بێ که‌ ئه‌وه‌ مه‌یذانێ شێ که‌ دلێراسه‌ش خرت و قووڵ بێ،کۆنجێوێش نیشێنێره‌. به‌ڵام ئانزانێ که‌مێ بێنێ پاشا یاوێ ئا حه‌ننا. په‌وکه‌تی سواڵکه‌ر چانه‌ هیچێش نه‌بێ، ته‌نیا سواڵکه‌رێو بێ خه‌یره‌ش. ساتێو که‌ گێڵێنێوه‌ په‌ی یانه‌ی واڵۆ ڕه‌خشه‌نده‌ی واچێ:-مه‌تیه‌ لوه‌ینه‌ لاو شوه‌که‌یش. زاوڵه‌ کێ خوێنێ و واچێنێ:؛لوه‌ینه‌ لا شوه‌که‌یش،لوه‌ینه‌ لا شوه‌که‌یش. شۆنیه‌ره‌ هه‌رکامشا چێوانێو په‌رسێنێ که‌ من خوه‌ گێرێم و نه‌تاوێنێ داواچشا ده‌وه‌.واڵۆ ڕه‌خشه‌نده‌ی منش گه‌ره‌که‌ بێنێ و فره‌یچ گه‌ره‌که‌ش بێنێ. من پینه‌یه‌ زانێنێ، وێچێش واچێ،هه‌ر گه‌ره‌کش بێ هه‌رمانێم په‌ی که‌رۆ،من واچێنێش پنه‌ سه‌لتێوێم په‌ی ورازۆ. ئاذێجه‌ سه‌لتێوێش په‌ی ورازتا چن گه‌وره‌ بێ. سه‌لته‌که‌ش که‌ وراست واتش:سه‌لته‌ ورازته‌ی به‌ذیه‌ومنا.من لوانێنه‌ فێکرێ تاڤۆ چ به‌ذیۆمنێوێش بۆ، به‌ڵام ئه‌جێ ڕاس ماچۆ سه‌وایش چه‌وسه‌ر سه‌یێذ عه‌ودڵڵا و ڕه‌خشه‌نده‌ ئامه‌یوه‌. ڕه‌خشه‌نده‌ تا چه‌مش پنه‌ که‌وتا پسه‌و عه‌زیزێ ئاذێچه‌ جۆرێوێش سه‌ر ئاما. سه‌یێذ عه‌ودڵڵا چاخ بیه‌بێوه‌،سوور بیه‌بێوه‌،نه‌کریێ پسه‌و ئه‌و ڕوه‌کا ته‌ری چنی زاوڵکا قسێ که‌ری و خوی. واڵۆ ڕه‌خشه‌نده‌یچ ئتر نه‌خوێ. سه‌یێذ دالێو لوا فێکرێره‌ و شۆنیه‌ره‌ واتش:ئه‌ذا گیان بۆ پی ماشینیه‌ که‌ ئێمه‌ ئاماینمێوه‌ پنه‌ش لوه‌وه‌ ده‌گا،زمسانێ وێم مه‌وه‌ شۆنیت. زاوڵه‌کێ نان و په‌نیره‌شا ئاذا په‌ی،من تۆشه‌به‌ره‌کێم هۆرگێرته‌،سه‌لته‌که‌و واڵۆ ڕه‌خشه‌نده‌یچم هۆرگێرت و نه‌مانێنه‌ گۆچانه‌ که‌ سه‌یێذ وێش دابێنێ پنه‌ و واتم قسێوه‌م نیه‌نه‌ ملوو. زاوڵه‌کێم ماچێ که‌رذێ و زیانێره‌. ماشینه‌که‌ وه‌روو به‌ره‌ینه‌ بێ که‌ سوار بیا. به‌ڵام زاوڵه‌کێ شۆنیمه‌ره‌ ئامه‌ی تا پاڵوو ماشینه‌که‌ی. ڕه‌خشه‌نده‌ و واڵه‌کێش نامه‌ی. سه‌یێذ دوێ تمه‌نێش کیاست و واته‌ بێش که‌ ده‌گانه‌ مه‌نوه‌‌وه‌ و نه‌ۆوه‌.ده‌نگوو گره‌وه‌وو واڵۆ ڕه‌خشه‌نده‌ی که‌ بانجڵه‌نه‌ گره‌وه‌ی گره‌وێ ئێژنیم. کناچه‌ گه‌وره‌کۆ ڕه‌خشه‌نده‌ی وات که‌ مه‌تیه‌ش ته‌رسای ته‌رسۆ،ته‌رسۆنه‌ تاته‌ش بزنۆشه‌ره‌. نزیکوو نیمه‌ڕۆیی یاوانێ دلێ ده‌گه‌ی. ڤه‌سانێره‌ به‌رذاشا هۆذێو که‌ دووده‌ریش نه‌بێ و هه‌ر کۆنخێوێش تاقێوێش بێ. به‌ره‌که‌م دا پوه‌ و ويتانێ. قاچێم، ده‌سێم،گرذوو لاشه‌یم چڵ که‌رێ. شه‌وێ نان و ماسشا ئاذا په‌ی. من که‌ په‌ی نمه‌ی هۆرستاوه‌ به‌ره‌و هه‌وذه‌که‌یم که‌رذه‌وه‌. ڤه‌روو یانه‌که‌ی ده‌ره‌ بێ،مانگه‌ شه‌وه‌ بێ و به‌ تریفه‌ش گرذ له‌یوێش ڕۆشن که‌رذه‌بێ،ده‌نگوو ڤه‌رگی، دووره‌وه‌ ئه‌ی،هه‌رچن که‌ زمسان نه‌بێ.چێوێو پسه‌و که‌رگێ بانه‌وه‌ ده‌نگێش ئه‌ی.سه‌وای لا یانه‌نه‌ زیێنێره‌.ساتێو که‌ هۆذه‌که‌نه‌ بێنێ ویروو زاوڵه‌کام گنێنێوه‌ که‌ هه‌رکامشا که‌وته‌ بێ حه‌ننه‌یۆ،بێ تاقه‌تشا بێنێ.جه‌ گرذی فره‌ته‌ر ویروو سه‌فیێنه‌ بێنێ که‌ شوه‌که‌ش جه‌واد پا وارششه‌،ده‌یمه‌ده‌ره‌ مۆقچێش ديڤنه‌ و ته‌شه‌رو تان.ئتر خاسا،خیاڵێ بێنێ. خیاڵێ هیچ که‌یۆ ئانزانی ته‌نیای نمازا جێگا. خرابته‌ر چنیشا نه‌تاوێنێ خه‌یروخه‌یرات گلێر که‌روه‌وه‌. وه‌ختوو عه‌سری گۆچان به‌ ده‌س لوێنێ سه‌وه‌رێنوو مه‌یذانه‌که‌ی،و حه‌تا شه‌وێ چا نیشێنێره‌،پاڵه‌یکێم یۆستێوه‌ و ئتر تاوو سه‌روو دڕه‌یاوه‌ بلوو ڕانه‌. فره‌و شه‌وا وێم پیس که‌رێنێ،پیریا و هزار عه‌‌یب و عار. ناکۆکه‌ بێنێ. ئۆسا که‌س و کار بێ یاڤۆم پۆره‌،به‌ڵام دێهاتیێ کارشا نه‌بێ کاروو هیچ که‌سیه‌وه‌. شه‌وێوه‌ دڵم ته‌میابێره‌.ئه‌جێ چڕه‌یم چڕا،زاوڵه‌کێم،زاوڵه‌زاکێم،کناچه‌کێم،گرذێشا چڕه‌یم چڕا ونه‌. گرذ په‌شتوو که‌شه‌که‌یوه‌ چڕه‌یم چڕا. زیانێره‌. وه‌ختوو نمای ویه‌رذه‌ بێ. چن لاقۆرێ که‌ لوانێ ڤه‌ره‌وه‌ و گۆشم شل که‌رذ دیم ئه‌رێ،چڕه‌یم چڕا ونه‌. زاوڵێ سه‌فیه‌ی گره‌وه‌ی گره‌وێنێ و منشا گه‌ره‌که‌ بێنێ. کناچۆ ڕه‌خشه‌نده‌ی منش گه‌ره‌که‌ بێنێ. به‌ ده‌نگێوی به‌رزه‌وه‌ واتم:-ئێتر ئیسه‌ مه‌و...

نویسه‌ر:غۆڵام حسه‌ین ساعێدی

هۆرگێڵن:بێهرووز حاجی ‌

کوچوو ناوه ختوو روجیاروو هورامانی

aragel — Sat, 19 Jan 2013 10:49:34 GMT

کوچوو ناوه ختوو روجیاروو هورامانی

دمایین قسه‌م چنی دۆسی نازاریم کاکه‌ محه‌مه‌دی مسته‌فازاده‌

برا گیان!ته‌میاناره‌ و ڤزه‌م چنیان،ئی ئه‌ره‌ته‌میایه‌ ته‌موتواڵیوی سه‌مه‌ره‌ن و جیاکار مرمانۆ!، ده‌س و دڵم هیچ مه‌گێرۆ، گێڕوکاسه‌نا، خولێوه‌ ئه‌ره‌کاسیه‌یم نیا، نه‌ هه‌رسی چه‌مام یاوه‌ری ورینێوێم مذا و نه‌ ویرێ وه‌شێ پێوه‌ره‌ بیه‌یما! ئای دڵه‌که‌م گلاراویشه‌نه‌ و سه‌رذێوه‌ش پنه‌ مه‌واچوو، هیچ عادزش مه‌که‌روو، مه‌واچوو دا وه‌سێشا ئاخر سوور مزانوو حه‌قه‌شه‌نه‌، حه‌قه‌شه‌نه‌ ناڵۆ و حه‌قوو وێشا هاوارێش سه‌رکه‌شه‌ چه‌رمه‌کاو هه‌ورامانی تووڕێ که‌رۆ. هه‌ناسه‌م سوار بیه‌ن و هه‌ناکنه‌ی هه‌ناکنوو. کاک محه‌مه‌د ئارۆ ساعبێو زه‌نگه‌شا په‌ی دانێ، هه‌واڵوو لوایت دانێشا پنه‌، گرذوو لاشه‌یم چیا بیه‌وه‌، به‌ گیانت قه‌سه‌م ئاوه‌خته‌ سه‌رذاوسۆڵه‌و زمسانیم فاما،هاره‌قیوی چیام به‌ر دا ئه‌جێم چه‌نی چه‌قنا دڵمه‌ره‌، ئه‌جێم هه‌رچی قۆرسی جه‌ دنیانه‌ هه‌ن نریان سه‌روو شانام، وه‌رووچه‌مام سیاو بی، بێ ده‌نگ که‌وتا،ده‌سوو وێم نه‌بێ،ده‌نگم نه‌یوه‌ به‌ر،گڵوێزه‌قووتێم پنه‌ ئامه‌ی بێ.کابرا ماچۆ ئۆمید.....ئۆمید.....ئۆمید!، ئه‌واڕه‌م ئاذ چڕێ و منیچ پنه‌م وه‌ش نه‌بێ چڵه‌کیه‌وره‌،پنه‌م وه‌ش نه‌بێ بژنه‌ڤوو، وه‌روو ویمه‌ره واچێنێ ئی کابرا جۆڕیان! محه‌مه‌د لوا؟ ده‌خۆ په‌رێ قسێ وه‌رچه‌موو زوان و ئه‌ده‌بیاته‌که‌یما که‌رذێنێ و قه‌رار پاسه‌نه‌ نۆدشه‌نه‌ ماوێوته‌ر هه‌نترینی ڤینمێوه‌! ده‌خۆ ئاذ قه‌وڵوو نویسته‌ی ڕۆمانێوێ هه‌ورامیێش پنه‌ دانا یانێو هه‌رپاسه‌ ناته‌مام!!!. یانێو محه‌مه‌دی پا سووک و ئاسانیه‌ ئاستانێش جگا؟ ده‌خۆ ئاذ واچێ مشیۆم پێوه‌ره‌ هه‌رمانه‌ که‌رمێ تا زوانه‌که‌یما جه‌ فه‌وتیای گل ده‌یمێوه‌ و چی تووڵه‌ڕاچه‌نه‌ مه‌بۆ هیچ که‌س ده‌ره‌قه‌تما به‌ی! تۆ خوا واچه‌م پنه‌ ڕاسا؟ خه‌ڵک ڕاس ماچا؟ کۆچت ڕاسا؟ یامکه‌تی وه‌رمیوی تاڵ ده‌سێش ئاستێنێنه‌ ناقڕێم و خه‌ریکا تاسنۆم؟ ئا خنیکیایه‌ هه‌زار کاوڕه‌مه‌ی مێژۆ! تۆ گیانوو شاهانی! شێت و لێوه‌م مه‌که‌ره‌ کاک محه‌مه‌د، واچه‌م پنه‌، ده‌خۆ تۆ لاوێشه‌وه‌ ئاخروو به‌ینه‌تی و وه‌فای بینی؟! ئای برا گیان هه‌رسی کانه‌و چه‌مه‌کام گێرته‌نشاره‌ و نمازا په‌له‌که‌و وه‌روو ده‌میم ڤینوو، دڵیچم هه‌وازه‌ش هۆرئارذه‌ن،ده‌نگش مژنه‌ڤوو که‌ ماچۆ:

مه‌ر ئاوه‌خت تۆم بشۆ نه‌ویر کانه‌و چه‌مه‌کام گیڤاو که‌رۆ گیر

ئای ڕه‌فێقه‌ نازاره‌که‌م هه‌ر ئه‌جۆم ڕاسا! هیچ مه‌واچی! زه‌رذه‌خوه‌کات مه‌ڤینوو! هازۆ قسه‌کات گه‌رمم مه‌که‌راوه‌! ویرت نه‌شۆوه‌ بێ خواحافێزی ئاستانێت جگا،بێ خواحافێزی!! هه‌ر گله‌ییت بانێ!. ده‌خۆ تۆ چامنه‌ نه‌بینی، پات پاوننه‌وه‌ بیه‌بۆ هه‌ر هه‌واڵت په‌رسانا ئیسه‌ چی پاسه‌ بێ ده‌نگێو پێسه‌ په‌له‌وریوی غه‌ریبی من و هه‌ورامانت ته‌رکێ که‌رذیمێ؟!

کاکه‌ ئه‌ی زوانه‌که‌ما؟،ئه‌ی فه‌رهه‌نگه‌که‌ما؟.ئه‌ی خه‌ڵکه‌ چه‌مه‌ڕاکه‌، ئه‌ی وێم و دۆسه‌کێما

تۆخوا گێڵه‌وه‌، مه‌له‌، مه‌له‌ تاقه‌تما نیا، تارسه‌ما کریانی کاک محه‌مه‌د ئاخر به‌ حه‌وت ئاسمانه‌ی قه‌سه‌م:

ده‌رذۆ دووریه‌که‌یت بوانووش په‌ی سه‌نگ سه‌نگ سییاو مه‌بۆ مه‌گێڵۆ جه‌ ڕه‌نگ

برای ئازیزم: کاکه ئۆمیدحه بیبی

کوچوو ناوه ختوو روجیاروو هورامانی

aragel — Sat, 19 Jan 2013 10:42:00 GMT

کوچوو ناوه ختوو روجیاروو هورامانی

دمایین قسه‌م چنی دۆسی نازاریم کاکه‌ محه‌مه‌دی مسته‌فازاده‌

مه‌ر ئاوه‌خت تۆم بشۆ نه‌ویر کانه‌و چه‌مه‌کام گیڤاو که‌رۆ گیر

کاکه‌ ئه‌ی زوانه‌که‌ما؟،ئه‌ی فه‌رهه‌نگه‌که‌ما؟.ئه‌ی خه‌ڵکه‌ چه‌مه‌ڕاکه‌، ئه‌ی وێم و دۆسه‌کێما

ده‌رذۆ دووریه‌که‌یت بوانووش په‌ی سه‌نگ سه‌نگ سییاو مه‌بۆ مه‌گێڵۆ جه‌ ڕه‌نگ

برای ئازیزم: کاکه ئۆمیدحه بیبی

هه‌ره‌ سیاوڵه‌و وه‌شڵه‌که‌م....

aragel — Fri, 21 Sep 2012 17:19:20 GMT

هه‌ره‌ سیاوڵه‌و وه‌شڵه‌که‌م....

ئه‌وه‌ڵین جار کین وارانه‌نه‌ چه‌مم که‌وت هه‌ره‌ سیاوڵه‌که‌یم.

بازاروو که‌ل و په‌ل وره‌تیه‌ینه‌ بێ پاڵوو که‌نێویه‌نه‌ که

ئانزانه‌کێ تانپه‌ڕ نه‌بێنێ په‌یش،و په‌شتیش که‌رذێبێوه‌

واوگژه‌که‌ی مرذابێره‌.وهه‌ر ئا ئه‌وه‌ڵین چه‌م پنه‌که‌وته‌یه‌

دڵم شی هه‌ره‌که‌ی.ئه‌وه‌جه‌م به‌ هه‌رێو بێ.جه‌ پیاسه‌

که‌رذه‌ی مانیا بێنێ.وه‌روو وێمه‌ره‌ واچێنێ،یانێو ئی هه‌ره‌

نمه‌تاڤۆ من و پاڵتاوه‌که‌و تۆره‌که‌که‌و چێوانێو ته‌رێم هۆرگێرۆ؟

و که‌سیچ چووزانۆ گاهه‌ز نرخیچێش خاس بۆ.گێڵانێ

شۆنوو ساحیبه‌که‌ێشه‌ره‌،به‌ڵام په‌ی ئه‌وه‌ یۆسه‌یش ناچار

بیا گرذوو شاره‌که‌ی ڤشکنوو،و ئاخریچێش دلێبه‌ره‌و یۆ جه‌

مه‌شرووب خانه‌کانه‌ ئێستمۆ که مرذابێره‌ و په‌ی ده‌ دینارا

گۆرانیێ واچێ.هه‌ڵبه‌ت که هه‌ره‌که‌ی وره‌شێ!ئه‌گه‌ر

سنیارێوی عال بێزۆوه‌،چی نه‌وره‌شۆش؟به‌ڵام نرخه‌کێش،

ته‌نانه‌ت حازر نیا پنێوبه‌یره‌ وار‌.هه‌ڵبه‌ت

ئاژه‌که‌یچ خرابا و ژیوای سخڵه‌ت بیه‌نه‌وه‌،ئننا نه‌یش ساتێو

جه‌ هه‌ره‌که‌یش جیا بۆوه‌،هه‌جگیز!هه‌رێو عال و جوان

ڕه‌حه‌ت تاڤۆ ڕوێو په‌نج فه‌رسه‌خێ بلۆ ڕانه‌.مانگێوه‌ که

مشتێو یه‌وی وه‌رۆ،ئه‌سپوو کێوێڵکانێچ نمه‌یاڤۆ تۆزوو

په‌یاشه‌ره‌،به‌ڵێ،درووس ئێژنیتا ئه‌سپوو کێوێڵکانێچ!

پێوه‌ره‌ لوه‌یمێ چه‌مێو وزمێ په‌ی هه‌ره‌که‌ی. مشیه‌یا

بیه‌یاندێ و دیه‌یاتا کابرای چاتۆڵباز چ تاریفێو که‌رێ جه‌

هه‌ره‌که‌ی!گرذوو ئیرله‌ندیه‌نه‌ چا ساته‌ که‌ هه‌ر دیاریش دان

هه‌رێو به‌ ژیری و ویربه‌رزی ئاذی نه‌یۆزیانه‌وه‌.وبه‌ زوانێو که

هه‌ر هووشێ بێنێ واتش:ئی هه‌ره‌ عاذه‌تێوێش هه‌ن

که تایبه‌ت به‌ وێشا،مزانی،ساعبانه‌ی که دالێو یه‌ویش

مذه‌ی کوچێوێش هۆر گێرۆ په‌ی سه‌وایش،که نه‌کا سه‌وای

بێ چاشت مه‌نۆوه‌.واتیڵێوێش هووشێ نیه‌نێ،وێت وێنی.

یۆ ده‌سش که‌رذ خوه‌ی.کابرای چاتۆڵباز گێڵاوه‌ و دیاش

په‌ی.به‌ چێشی خوی،کابرای هه‌ر؟ئی هه‌ره‌ ئننه‌ ژیرا

که لتێوو یه‌وه‌که‌یش په‌ی سه‌وایش مازۆوه‌.فره‌ته‌ر جه‌ سه‌ذ که‌ڕه‌تا

بیه‌ن که وه‌روو هه‌ژاری و نه‌ذاریه‌نه‌ ناچار بیه‌نا یه‌وو ئاذی‌

دزوو،ئینه‌ وه‌سێ نیا؟خوا زانۆ وه‌روو ئی هه‌ره‌یه‌ من و

کڵفه‌ته‌که‌م چن ئاورایما کێشته‌ن-من دوانزه‌ کناچێم

هه‌نێ.... په‌رسام چنه:ئی هه‌ره‌ تاڤۆ به‌ینوو ماڵوو وێش و

ماڵوو یۆته‌ری فه‌رق بنیۆ و نه‌که‌رۆ مڵکوو هامساکه‌یره‌؟ کابراکه‌

واتش:ئی هه‌ره‌ دڵش پاکا،پسه‌و زاوڵا ماسووما،ئه‌گه‌ر

گرذوو گیانه‌وه‌ره‌کا پسه‌و ئی هه‌ره‌یه‌ بێنێ،نه‌ چوه‌ پنه‌واز‌

بێ،نه‌ بارووم،نه‌که‌ڵه‌ک،نه‌ دیوار،هیچێو پنه‌واز نه‌بێ.

ئیسه‌ ئێتر خه‌ڵکێوی فره‌ ده‌ورمانه‌ گلێر بیه‌بێوه‌.

زاوڵه‌کێچێش دڵی خه‌ڵکه‌که‌ینه‌ بێنێ...نمه‌زانوو هه‌ر

دوانزه‌که‌ ئامه‌ی بێنێ یام نا،به‌ڵام یه‌ک چێوی مزانوو و

ئانه‌ ئینه‌ که ئاژه‌و ئانیشایچه‌ که جه‌واڵه‌شا بێ پاسه‌

پیس و چه‌په‌ڵ بێ که‌ باوه‌ر نمه‌که‌روو هیچ له‌یوو

ئیرله‌ندیه‌نه‌ زاوڵێ پی پیس و پۆخێڵیه‌ و شپرزیه‌ بیۆزیاوه‌.

و یۆ جه‌ یۆی هارته‌رێ بێنێ.ژه‌نه‌کێچێش په‌یذا بیه‌،پاوێذا،

سه‌رپه‌تیه‌،شپێرزه‌..... ژه‌نه‌کێچێش ڕه‌ما دلێراسه‌و

وه‌یشوومه‌که‌ی.به‌ شوه‌که‌یش وات:ویرتا پیتێر،ئاڕوه‌ که

هه‌ره‌که‌ما لوا دلێ ڕۆخانه‌ی که مه‌لێ که‌رۆ؟و میکیلینی

ئه‌رامه‌ننه‌ش ئارذه‌وه‌ به‌ر؟ئه‌گه‌ر نه‌یاوابێ داذوو ئا

ئه‌رامه‌ننه‌یه‌،ئاوی به‌رێش،که‌ به‌رێش. کابراکه‌ی وات:

مه‌گه‌ر ئانزان ئی چێواشه‌ ویر مشاوه‌،سیوی گیان!؟ به‌ڵێ،

و ئا ڕوه‌ ئامه‌ی و په‌نج لیرێ زه‌رشا دا که بساناش.....

ژه‌نه‌کێ واتش:به‌ڵێ په‌نج لیرێ،به‌ڵێ په‌نج لیرێ زه‌رشا

دا،په‌نج لیرێ ئاڵتۆن،په‌نج لیرێشا ده‌یمێ پنه‌...

کابراکه‌ پڕانه دلێ قسه‌کاش و واتش:بۆخوا ڕاس ماچۆ.

زه‌ڕه‌که‌ دلێ مشتێمه‌نه‌ بێ و مامه‌ڵه‌که‌یچ کریا... ژه‌نه‌کێ

واتش:به‌ڵام خێرا چه‌مما چنه بێ به‌سه‌زوان خه‌ریکا

خه‌فه‌تیێنه‌ که جیابۆوه‌ چنه‌ما هه‌رسی مه‌یا چه‌مێشه‌ره‌،

شوه‌که‌یچم زێڵێش ناما و مامه‌ڵه‌که‌ش شێونا. کابراکه‌ی

وات:وس،وس!ڕێک وپێک قسێ که‌ره‌،ژه‌نه‌کێ!واتیڵ به‌

واتیڵ میاڤۆنه قسه‌کاما.بذیه‌ چه‌نی گۆشش شل که‌رذه‌ن په‌یما.

واتم:لیرێو مذه‌و که‌ ئی گیانه‌وه‌ره‌ سه‌مه‌ره‌یه‌ بسانوو. کابرای چاتۆڵباز

قێڕناش:لیرێو! ژه‌نه‌کێ واتش:لیرێو!دوانزه‌ کناچه‌کێ پێوه‌ره‌

واتشا:لیرێو!نمه‌زاندێ چه‌نی گرذێشا سه‌ره‌شا سڕ

مه‌نه‌بێ.ده‌ورمه‌نه‌ گڵێرێ بیێوه‌ و واق واق دیێنێم په‌ی. یۆ

جه‌ کناچه‌کا نه‌مانه پاڵتاوه‌که‌یم،یوه‌شا شه‌رواڵه‌کێم و

یوه‌ته‌ره‌چشا باوشیش که‌رذه‌ زه‌نگۆڵمه‌ره‌. یوه‌تره‌چشا

ده‌سش که‌رذ باخه‌ڵوو شه‌رواڵه‌کامه‌ره‌.هه‌ڵبه‌ت به‌سه‌زوانه‌

ته‌نیا گه‌ره‌کش بێ بزانۆمن ئا یه‌ک لیره‌مه‌ هه‌ن یام نا....

به‌ڵام یاگۆ یه‌ک لیره‌که‌ینه‌ مشتێو لیرێ ئامای ده‌سشۆ.

من فره‌ دڵم شیه‌بێ هه‌ره‌ سیاوڵه‌که‌ی.ده‌رذه‌و من وه‌رێ.

تاوێ به‌شێو جه‌ ڕاکێ سواریم دۆ پنه‌.وهه‌ر ساتێویچ که

له‌شم نه‌مه‌نێ چنی تاوێنێ وره‌شووش.هه‌مته‌ر واتم:لیرێو.

کابرای چاتۆڵباز واتش:دوێ لیرێ.ژه‌نه‌کێ واتش:وه‌ی!

نرخووئی هه‌ره‌ وه‌شڵه‌مه‌ ته‌نیا دوێ لیرێ!و ده‌سش که‌رذ

گره‌وه‌ هۆڕه‌. واتم:نا،لیرێو. داواچش داوه‌:خاس لیرێو،به‌ڵام

شش پنیچ شیرینیۆ هه‌رکام جه‌ زاوڵه‌کا.مامه‌ڵه‌که‌ کریا.به‌

کابراکه‌ی لیرێو و به‌ هه‌رکام جه‌ زاوڵه‌و ئیلاو ئه‌وله‌یچم

شش پنی شیرینیم دا.شۆنیه‌ره‌ ژه‌نه‌کێ چڕا جانین و

وای مین وتامین و خوا مزانۆ چن که‌سێ ته‌رێ.سواڵکه‌رێو

جه‌ بازاره‌که‌ی نمه‌نه‌بێ که زاوڵه‌کێش نه‌میجیا ملمه‌ره‌و

‌ وجه‌ من زه‌رشا گه‌ره‌ک نه‌بۆ.چ قه‌ره‌بالقێو

وه‌ش کریا!سه‌مه‌ره‌ جنجاڵێو،سه‌مه‌ره‌ وه‌یشوومێو،

سه‌مه‌ره‌ ورنگه‌ورنگێو ده‌ورمه‌نه‌ هۆر خیزیا!یۆ چیروو

زوانیشه‌نه‌ شش پنیوێش شارابێوه‌ و واچێ فلسێوێش

نه‌یاوان لا.یۆته‌ر واچێ...ئه‌سڵه‌ن چ جیاوازیێو که‌رۆ کێ

چێش واچێ؛پاسه‌ قه‌ره‌باڵقێو وه‌ش کریابێ که تووته‌

ساحیبوو وێش نه‌شناسێ. هه‌ر چا وه‌ڵۆ که دوه‌ لیره‌که‌م

قه‌بووڵ نه‌که‌رذه‌بێ و گه‌ره‌کم بێ شیرینی ده‌و ئه‌واگێڵی

ئه‌واگێل"پشیمان"بێنێ!به‌ پارێزگه‌رێوی فره‌وه‌ شاره‌نه‌ زیانێره‌.

من سواروو هه‌ره‌که‌ی،کابرای چاتۆڵباز ده‌سی ڕاس هۆسار

به‌ده‌س،ژه‌نه‌کێ ده‌سی چه‌پ هۆسار به‌ ده‌س،و پێڕوو

زاوڵه‌کاشا پیلاو پۆلاماره‌.بڕێو جه‌ زاوڵه‌کاو شاره‌که‌یچ که‌وتێ

بێنێ شۆنیما وهه‌ر کامشا مۆچیارێوی تایبه‌تیم که‌رێ.

هه‌ره‌که‌ی چنی نامیته‌رین ئه‌سپێ کێوێڵکانێ ئا ڕوا پێوه‌ره‌

گێرێنێشا؛یۆ واچێ هاگام جه‌ هه‌ره‌که‌ی بۆ ئننا به‌رمشۆ و

ئێتر ڕه‌نگه‌یچش نمه‌وینی؛یۆته‌ر واچێ چ لۆن چاشتێوێش

ده‌و پنه‌و چ چاشتێوێش نه‌ذه‌و....ڕواڵه‌تی ته‌مه‌نشانه وێنێوی

پی مه‌کینیشا نه‌ذیه‌بێ،وه‌رچه‌موو کابرایوی که سواروو

هه‌رێوی بیه‌ن و بڕێو خه‌ڵکی چاتۆڵباز ده‌وروو هه‌ر و هه‌ر سواریشا

گێرته‌ن و ڕوانێشا که‌را.به‌ڵام کێ ئه‌ره‌ج منیۆ؟ماوێو بێ که

گه‌ره‌کم بێ چوار په‌یوی پێسه‌ گنۆ مشته‌م و ئاخریچش

سواروو هه‌روو ئاواتیم بیا.بازه‌شا هه‌ر هه‌رمانێوه‌ که دڵشا

ئینا پوه‌ که‌راش.نمه‌زاندێ من و هه‌ره‌که‌م به‌ چ گێچه‌ڵێوه‌

خواحافیزیما واست چنه‌شا و لوه‌یمێ.نۆ که‌ڕه‌تێ یۆیۆ

ئامه‌ی و ده‌سشا داوه‌ چنیم؛گرذ به‌ زوانێوی نه‌رم ونیان،

به‌ واتیڵێ دڵگیرو دڵکه‌ش،..فره‌ته‌ر جه‌ حه‌وت که‌ڕه‌تا

خاسی هه‌ره‌که‌یشا واتێوه‌.قه‌وڵشا گێرت چنه‌م که چنی

هه‌ره‌که‌ی عال بوو،جارجار که زه‌ر یاوا ده‌سم دوێ مشتێ

یه‌ویش په‌ی بسانوو،و خوا ئا ڕۆیه‌ نارۆ وه‌رۆ ئه‌گه‌ر روێو وینا

شه‌لاخۆ گێرته‌ن ده‌سۆ..... و ساتێو که جیا بیاوه‌ چنه‌شا

ده‌سشا که‌رذ گره‌وه‌هۆڕه‌.ئه‌وه‌ڵ تاته‌که‌ ده‌سش پنه‌ که‌رذ.

شۆنیه‌ره‌ ژه‌نه‌کێ ئاما ده‌سباریش.و شۆنیه‌ره‌ زاوڵه‌کێ

که‌وتێ شۆنیشا،و دنیاشا ئارذه‌بێوه‌ ده‌نگێ و

وه‌یشوومه‌شا ڤسه‌بێنه دارسانوو ئیلاو ئه‌وله‌یشا.و

ئاخرشه‌وه‌ چنی هه‌ره‌که‌ی بیێمێوه‌ وێما ته‌نیایی.

هه‌ره‌که‌ خارش که‌رذ و دارسانه‌که‌نه‌ زیاره‌.وه‌روو وێمه‌ره‌

واتم چن مامه‌ڵێوی شیرینم که‌رذ:مه‌گه‌ر کریێ هه‌رێو به‌

کرژوکۆڵی ئی هه‌ره‌یمه‌ یۆسه‌یاوه‌؟به‌ڵام هه‌ر ئینه‌ که

دارسانه‌که‌ما ئاست جێگا سه‌رئاماکه فاڕیا.هه‌ر سه‌روو

یاگۆ وێشه‌وه‌ ڕکه‌ش که‌رذێبێ و نه‌یش لاقۆرێوه‌

فاڕیۆوه‌‌.به‌ زوانێوی نه‌رم ونیان دڵگه‌رمم که‌رذ،به‌ زوانێوی

فره‌ شیرین نازم کێشا،به‌ڵام ئێنگار نه‌ ئێنگار.گۆشش نه‌بێ

چنه.که‌وتا ویروو ئینه‌یه‌ که به‌ شه‌لاغ به‌رووش ڕانه.حازر

نه‌بێ لاقۆرێوه‌ فاڕیۆوه‌.هه‌ر پاسه‌ ڕێک دلێراسه‌و جاذه‌ینه‌

مدراره‌.خه‌ڵک ویه‌رذه‌ی ویه‌رذێنێ،بڕێوشا ئا که‌سێ بێنێ

که چا بازاره‌ بێنێ و ئیسه‌ شاذی مه‌رگێ بیێ بێنێ.هه‌ر

که‌سێو پیشنیارێو و مۆچیاریێوێش که‌رذا،ئی هه‌رمانێ

که‌ره‌،وئا هه‌رمانێ که‌ره‌،گرذم به‌جه‌ر که‌رذێ،به‌ڵام ساتێو

که‌ یۆشا واتش هه‌ره‌که‌ی گێره‌ کۆڵێ و سه‌ذ مێترێ

به‌ره‌ش،ئێتر نه‌تاوام وه‌روو وێم گیروو و کابراکه‌م دا وه‌روو

کڵۆسننا.ئاخرش ناچار بیا ڤه‌زوه‌ره‌ و نه‌موه‌نه‌ هۆساره‌که‌یش،به‌ڵێ،ڕاسا،هه‌ره‌که‌ لکیابێ زه‌مینه‌ره‌

ومن هه‌ر کێشای کێشێنێش.... ئه‌گه‌ر بزاندێ چن دۆعاو

کابرا چاتۆڵبازه‌که‌یم که‌رذ که ئی هه‌ره‌شه‌ وره‌ته‌بێ پنه‌م!

به‌ڵام ئاننه‌شه‌ پنه‌ نه‌شی که چێوێوی سه‌مه‌ره‌م ئێستۆ.

ئی هه‌ره‌و منه‌ ڕه‌مه‌ن بێ و ده‌نگی وه‌شوو ڤای به‌ینوو

له‌ق و گه‌ڵایه‌کا فره‌ته‌ر جه‌ گۆرانیێ ئاذی ڕه‌م که‌رێنێ.

هه‌ر ساتێو که جاذه‌که‌نه‌ تخونوو له‌قه‌ داره‌کا بێنمێوه‌ ده‌س

ئازێ جه‌ ئینکاری و ئێتر دێویچ نه‌یارێش پنه‌.وه‌ڵێنه‌

گۆشه‌کاش شلێ که‌رێ و پسه‌و تووتێوی که دلێ ئاوێنه‌

به‌رئامابۆوه ‌له‌رزێ و تا چه‌م ترووکنی پسه‌و تیرێ جه‌ لاستێقی به‌رشێ.به‌ڵێ کاکه‌!خاس یاوابێنێنه‌،به‌ڵێ.

هه‌ره‌که‌م بیناوه‌ ده‌سگیره‌و به‌رێوی،لوانێ دڵێ دارسانه‌که‌ی،که‌تتێوه‌ له‌ق و گه‌ڵام که‌نه‌ی،و پنه‌شا

کۆڵاوێوه‌م وه‌شه‌ که‌رذه‌ و هه‌ر ئینه‌ که دارسانه‌نه‌ زیه‌یمێوه‌

کۆڵاوه‌کێم نیا‌ سه‌ره‌و هه‌ره‌که‌ی. به‌سه‌زوان!پاسه‌

خار که‌رێ که‌ باوه‌ر نمه‌که‌ردێ.جه‌ ده‌نگێو که گۆشێشه‌نه‌ زرێنگیێوه‌

ئه‌جێش هێشتار ئینا دارسانه‌نه‌.ساتێو که یاوه‌یمێ بالی وان گرذوو شاره‌که‌ی ئامه‌ی تا چه‌مشا گنۆ ئی چێوه‌

سه‌مه‌ره‌یه‌...من و هه‌ره‌که‌م که کۆڵاوێوه‌ جه‌ له‌ق و گه‌ڵای

سه‌ره‌شه‌وه‌ بێ. من هێشتار ئی هه‌ره‌ سیاوڵه‌مه‌ هه‌ن و تا

ئا ڕوه‌ که مروو جیا نمه‌بوه‌وه‌ چنه‌ش.ئێمه‌،من وهه‌ره‌که‌م،

جاذێ فرێما ڤشکنه‌ینێ،چێروو ڤارانی و ڤه‌رڤه‌و بۆرانیه‌نه‌.

هه‌روه‌ره‌نه‌ هه‌ره‌که‌م جه‌ فره‌و کاتانه‌ قیزه‌وناش ده‌سش

ئاسته‌ن....هه‌رمانێوه‌ که من وێم نه‌تاوانم که‌رووش.و به‌

ڕاوینم هه‌ره‌ سیاوڵه‌که‌م زانانش پی چێوه‌یه‌. ئه‌وه‌ڕۆ

عه‌ره‌بانێو سه‌وز و وه‌شڵه‌م په‌ی ئه‌سان و باوه‌ر نمه‌که‌ردێ

چ عینوانێوێش پنه‌ که‌رۆ.به‌سه‌زوان هه‌روه‌ره‌نه‌ جوانته‌ر بۆوه‌!!

نویسته‌ی:پادریک ئۆکانێر(1883-1928)

هۆرگێڵن:بێهرووزحاجی

‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌هه‌ساره‌ی وه‌شبه‌ختی...

aragel — Sun, 26 Aug 2012 19:26:37 GMT

‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌هه‌ساره‌ی وه‌شبه‌ختی...

هه‌رکه‌سێو ژیوایشه‌نه‌ ته‌نیا که‌ڕه‌تێو تاڤۆ هه‌ساره‌ی

قلیچکه‌داری وینۆ.بڕێوشا پسه‌و وێم ئا یه‌ک که‌ڕه‌تیچه‌

نمه‌تاوا ویناش.ساڵوو1912ی که هه‌ساره‌ی قلیچکه‌دار ئا

سمانه‌نه‌ دیاریش دا،من په‌نج شێش ساڵه‌ بێنێ. ئه‌ذام و

واڵه‌کێم په‌ی وینته‌ی ئی هه‌ساره‌ سه‌مه‌ره‌یه‌ لوه‌ی

سه‌روو بانی و نیشانه‌و منیچ دێنێ و واچێنێ:وینیش؟

قلیچکه‌که‌ش وینی؟من خاس ناوه‌زیێم که هه‌ساره‌ چێشا

نه‌زانێنێ که هه‌ساره‌ی قلیچکه‌دار یانێو چێش، نه‌ذیم

به‌ڵام واتم:ئه‌رێ دیم.ساڵوو1992ی که هه‌مته‌ر ئی

ئی هه‌سارێ ئاسمانه‌نه‌ مزیۆوه‌ من ئتر نیه‌نا و ئه‌گه‌رێچ

مه‌نه‌بوو چه‌مه‌کێم یارمه‌تیم نمه‌ذا ئی هه‌ساره

سه‌مه‌ره‌یه‌ وینوو.قاچێم ئیزنێم مه‌ذا پنه که بلوو سه‌ روو

بانی و چه‌مم پنه‌گنۆ.که‌ڕه‌تێو،ته‌نیا که‌ڕه‌تێو ئی چێوه‌ ژیوای

یۆیه‌نه‌ قۆمیۆ.وه‌شبه‌ختیچ پسه‌و هه‌ساره‌ی قلیچکه‌داری

ته‌نیا که‌ڕه‌تێو ژیواو خه‌ڵکیه‌نه‌ دیاری مذۆ.بڕێویه‌ک که‌ڕه‌تیچ

ئی وه‌شبه‌ختیه‌یه‌ نمه‌وینا.ئیره‌ج و رۆشه‌نه‌ پێڕوو ئاکه‌سا

بێنێ که مه‌حه‌ل بێ یه‌ک جار وه‌شبه‌ختێ با،به‌ڵام ناوامه‌

سه‌رئاماو ژیوای شه‌قه‌ش دا به‌ختیشاوه‌،چیروو چه‌رخوو

فیسپه‌گایه‌نه‌ مه‌نێوه‌ و ساویه‌یوه‌ و چه‌مشا نه‌که‌وت به

هه‌ساره‌ی قلیچکه‌داروو وه‌شبه‌ختی.نمه‌زانوو کێن،به‌ڵام

ئه‌جۆ یۆ جه‌ بواچه‌کاو"گویندگان"فه‌ره‌نگیا که ماچۆ: ڕۆحێ

قنیشانا وه‌شبه‌ختیۆ ئانزانه‌کا.من نه‌ باوه‌رم هه‌ن به‌ ڕۆحی

و نه به ئینه‌که‌ چنی ئێمه‌مانا دژایه‌تیشا هه‌ن. به‌ڵام

ئینه‌که‌ ژیوای جه‌نگا، جه‌نگیچ یانێو چڵی"درد" فره‌ فاڕیۆ

به‌ چڵی که‌مته‌ر،ئاخرش هه‌ر ئێش،قسه‌م نیه‌نه‌. ئیره‌ج

عالته‌رین ڕه‌فێقم بێ. عالته‌رین ڕه‌فێق قسێوه‌ گۆتره‌یه‌نه‌.

من ته‌نیا دوێ که‌سێم گه‌ره‌کێ بێنێ،ئه‌وه‌ڵ وێم شۆنیه‌ره‌ ئاذ.ئیره‌جم په‌وکی گه‌ره‌ک بێ که پسه‌و وێم بێ،ویرش

پسه‌و وێم بێ،پسه‌و وێم هه‌رمانه که‌رێ یام نه‌که‌رێ، هه‌ر

چێوم بێ هینوو ئاذی بێ،وئاذیچ هه‌رچێوێش بێ هینوو

من بێ. هه‌ر بۆنه‌و ئینه‌ینه‌ که جه‌ سیا به‌ختێش دڵم

سۆچای سۆچۆ،پڕووزیانا.ئاخ،ئه‌گه‌ر چیه‌نه‌ جه‌ باره‌شۆ باس

که‌روو،وه‌روو ئینه‌ینه‌ که وێچم مه‌راره‌تم کێشته‌ن،نه‌په‌رمانا

که‌سیه‌ره‌ که چنیش ده‌رذی دڵ که‌روو.به‌ کێ واچوو که بلۆ

و من و ئیره‌جی ڤزۆوه‌ سارا.چکۆ بزانوو ئا که‌سه‌ که

ڕواڵه‌تی دڵ سۆچنۆ په‌یم،نهێنیه‌نه‌ جاسوسوو ئیتڵاعاتی

نه‌بۆ.منویسوو په‌ی ئینه‌یه‌ که‌ ناچاره‌نا،په‌ی ئینه‌یه‌ که‌

گڵویمه‌نه‌ لکه‌یوه‌ زیه‌ینه و ئه‌گه‌ر په‌ی وێم ده‌رذی دڵ

نه‌که‌روو،دڵم ته‌قۆوه‌.منویسوو گاهه‌ز ڕه‌حه‌ت بوو. گاهه‌ز

مه‌رذا،گاهه‌ز ئیره‌ج مرۆ،و گاهه‌ز چه‌وما که‌سێو یۆزیاوه‌

و گه‌ره‌کش بۆ بزانۆ که ڕزگاری ئێرانی به‌ چ نرخێو

ئه‌سنیان.ئاخ! هه‌ر وه‌خت من مه‌راره‌ت کێشێنێ، ته‌نیا دڵ

وه‌شیم ئینه‌ بێ که نه‌سه‌قێ ڕۆحیێ وێم گێڵنوه‌وه‌ په‌ی

ئیره‌جی.چکۆ ئیره‌جی بێزوه‌وه‌؟خه‌ریکا دلێ وڵه‌ تاریک و

نسرمه‌کاو زینانیه‌نه‌ پوویای پوویۆ.ده‌سم نمیاڤۆ لاش. ئینه

کاغه‌زێوا که ئارۆ پارێزگه‌رێوه‌ کیاسه‌ناش په‌ی:ئه‌گه‌ر

تاوی چی جه‌حه‌ننه‌مه‌نه‌ ڕزگارم که‌ره‌.ڕۆشه‌نه‌ ئینا چکۆ؟

ساتێو نه‌سه‌قم دێنێ،نیم سه‌عات به‌ڵکووم یه‌رێ چاره‌کێ

نیانێشا چیروو ده‌سبه‌نی قه‌پانی"نوعی دستگاه‌ شکنجه"،

به‌ ته‌رزێو که ویه‌رذانێوه‌ و ئاخرش ئا چێوه‌شا که گه‌ره‌ک

بێ چنه‌م،نه‌تاواشا به‌ ده‌سش بارا،واتشا ئیسه‌ ملمێ

ژه‌نه‌کێت که‌له‌مچه که‌رمێ.داخۆم گێرتێبۆشا...؟ هه‌مته‌ر

خه‌ریکا شێت بوو.خه‌ریکا هۆسارم ده‌سمه‌نه‌ نه‌مه‌نۆ.

لاوێشه‌وه‌ ئه‌ستێکه‌م"شرط"که‌رذێنه چنی وێم که به‌

نتم بوو و باسوو ئا چێوا که ئه‌واڕه‌م یانێو هه‌ر پاسه‌ که

به‌ره‌وه‌ قۆمیه‌ینێ،گێڵنووشاوه‌.گه‌ره‌کما جه‌ ڕۆ وه‌شبه‌ختیۆ

ئاذی ده‌س پنه که‌روو و جه‌ ڕۆ سیا به‌ختیش دمه‌ینه‌ش

باروو. هه‌روێ،رۆ زه‌ماوننێشه‌نه‌ قۆمیه‌ی. ڕۆ زه‌ماوننێ مه‌به‌ست

ڕۆ شیرینی وه‌ریا.بڕێو یانه‌و رۆشه‌نێ داوه‌تێ بێنێ.تاته‌ش

خۆڵکوو مێمانا که‌رێ.فرێ جه‌ قۆم و ڕه‌فێقێ تاته‌یش چانه

جه‌واڵه‌شا"حضور"بێ. گیانێوی شاذ و دڵ پاکیێو چانه زاڵ

بیه‌بێ.تاته‌و رۆشه‌نێ شاذی مه‌رگ بیه‌بێ.زه‌ماوننه‌و

رۆشه‌نێ ئاذێش ڤسه‌بێوه‌ ویروو ئا وه‌شیێ که دلێ

ژیوایشه‌نه‌ قۆمیه‌ی بێنێ.ئه‌سێح رۆشه‌نه‌ فره‌ شێوه‌

ئه‌ذایش و په‌وکی تاته‌ش شۆنوو مه‌رذه‌و ئه‌ذایشه‌نه‌

ئه‌ره‌ویایوی تایبه‌تیش بێ پی ته‌نیا کناچێشه‌ و تا تاوابێش

جه ئامووچیاری کناچه‌کێش هیچ کۆتاییش نه‌که‌رذه‌ بێ.

ئارۆ رۆشه‌نه‌ دلێ سیپاڵه‌ چه‌رمانه جه‌ حاڵه‌توو زاوڵه‌یه‌نه‌

به‌رئامه‌ینه‌ وبه‌ ڕاسی ژه‌نێوه‌ زه‌ریف و به‌ نتمه‌ دێ چه‌مۆ.

جلێش ڕێک و پێک و زه‌ریفێ بێنێ،گیجیه‌که‌ش تا مێش

"کمر"لیکیابێش پۆره‌‌.و پالاملێ درێژ و پانێش که

شۆنیشه‌وه‌ شه‌په‌شا ئه‌ی ئاذه‌شا که‌رذێ بێ پسه‌و ژه‌ناو

ئۆسای،شازاذه‌ خاتوونێ که ئانزان ڕازێنه‌ وه‌نێنێشۆ و

فیلمێنه‌ دیێنێش وپسه‌و په‌ریێ عاڵه‌موو خیاڵیه‌نه‌. نه‌لێ

ڕانه‌،له‌نجه‌ که‌رێ.له‌نجه‌ نه‌بێ،ئاسمانه‌نه‌ خلووزکێ که‌رێ.

ئه‌سێح تاته‌ش چی زه‌ماوننێ وه‌شحاڵ بێ و زه‌ماش

گه‌ره‌ک بێ. به‌ڵام بناخوو دڵیه‌وه‌ چی هۆرچنیه‌یه‌ ڕازی

نه‌بێ.ویرما که ڕێوێو جه‌ باره‌و ئیره‌جی پنه‌م واتش:

فره‌ سه‌ر خه‌را! واتم:چه‌نی؟ واتش:یانێو تۆ نمه‌زانی

مه‌به‌ستم چێشا که پنه‌ت ماچوو سه‌ر خه‌را؟! منیچ

واتم:تۆ ماچی که ئیره‌ج پسه‌و خه‌ڵکی کاوێڕ نیا....

تاته‌ش قسه‌کێش بڕیه‌نه‌ ده‌م و واتش:چ قازانجێوێش

هه‌ن،قسێت که‌روو چنی.شمه‌ هه‌روێتا ویرێ ئاخیزیێتا

"انقلابی" هه‌نێ.ماچووتا پنه که وێتا نمه‌ذه‌یدێ

مه‌ته‌ره‌سیه‌وه‌،فره‌ چنی ئیره‌جی قسێم که‌رذێنێ.من

گرذوو ئا قساتا قه‌بوولێمه‌نێ.منیچ نه‌یاروو"مخالف" ئی

زۆڵم و جه‌فایه‌نا که مازیۆ خه‌ڵکیش ماڕته‌ن.به‌ڵام خه‌ڵکه‌که‌

ویرشا پسه‌و شمه‌ن؟گرذ که‌س مزانۆ که ئی ده‌م و ده‌زگا

به‌رده‌وام نیا و گره‌کێت بۆ گه‌ره‌کێت نه‌بۆ ڕێوێو ئی ده‌وڵه‌ته‌

پیچیۆوه‌.به‌ڵام به‌ شمه‌ چێش؟چ هه‌رمانێوه‌ تاودێ کردێ؟

شمه‌ دوێندێ و چێش تاودێ که‌ردێ؟بازدێ ئاژه‌که‌ هه‌ر

پێسه‌ بۆ وێش وه‌ش بۆ. واتم ئاخۆر چه‌نی کریۆ ویش وه‌ش

بۆ؟ تاته‌و رۆشه‌نێ دالێو ویرێش که‌رذێوه‌ شۆنیه‌ره‌ یه‌واشێو

واتش:وه‌ش بۆ.ڕاسه‌و گه‌ره‌که‌نه‌ من فره‌ته‌ر چێنه‌یه‌ که

ویروو شمه‌نه‌ بوو ئینانا ویروو کناچه‌کێمه‌نه‌.من چی ئاخراوه‌

هیچ ئاذێ نمه‌شناسوو.هه‌رچی که هیزی ده‌موو شمه‌وه‌

مێژنه‌وو،ئارۆ ئاذه‌ دووباره‌شا که‌رۆوه‌. به‌ڵام من ئی کناچێ

خاس مێشناسوو.ماوێوی فره‌ چنیش ویارانمه‌ره‌.به‌ڵام

هه‌جگیز پسه‌و ڕۆ زه‌ماوننێش دڵ کێشش نه‌که‌رذه‌ بێنێ.

نه‌ ئینه‌که‌ وه‌شڵێ نه‌بێ ویام ئینه‌که‌ ئارۆ وه‌شڵه‌ته‌ره‌

بیێبێ،به‌ڵام ئی زه‌ریفییه که‌ ئارۆ وێش ئێرمانێ چنی

ئه‌و ڕوه‌کاته‌ری فره‌ جیاوازیش بێ.گاهه‌ز ئی زه‌ریفیه‌،ئا

وه‌شبه‌ختیه‌ بێ که پاذێوه‌ برێقه‌ دێوه‌.وه‌شبه‌ختی که‌ڕه‌تێو،

ڕێوێو،چن سه‌عاتێ ئی کناچێشه‌ گێرتێبێ چیروو

په‌له‌کاشه‌وه‌.هه‌ر پی وه‌شڵه‌یشه‌وه‌ ئیره‌جێش دڵ کێش

نه‌که‌رذه‌بێ.ئیره‌ج عینوان که‌رێ که مسیارێوێش ئێسته‌نۆ،

که‌مامه‌ ئانزانێوێش ئێسته‌نۆ که تاڤۆ به‌ ده‌سباریۆ ئاذێوه‌

ویرێ ڕزگاروازی وێش وه‌ڵا که‌رۆوه‌.هه‌ر ڕۆ زه‌ماوننه‌کێنه‌

رۆشه‌نه‌ قسێش که‌رذا چنی که من هه‌جگیز ویرم نمه‌شۆوه‌-

نزیکوو نیم سه‌عاتی بێ که فره‌و مێمانه کا ئامه‌ی بێنێ و

ئیره‌ج وێش هه‌ڵای نامابێ-واتم:خاس بێ ئارۆ ئتر چه‌م

پۆشیش که‌رذه‌یا جه‌ هه‌رمانه زیاذه‌کاش و سه‌روو وارذه‌ی

حازر بیه‌یا. رۆشه‌نی وات:نمه‌زانوو،چێش بیه‌ن،ختووره‌ما.

خوا چی دێرش پنه بیه‌ن؟ واتم:چه‌نی بیه‌ن؟هیچ خه‌به‌رێو

نیا. ئاذێ وات: کریۆ هزار چێوێ قۆمیه‌ی با.کێ چی وڵاته‌نه‌

بێ خه‌ما؟گۆتره‌ی ئانزانی که‌له‌مچه‌ که‌را.من واتم:ئاخۆر

ئیره‌ج هیچش نه‌که‌رذه‌ن تا گێراش. داواچش داوه‌:مه‌گه‌ر

ئانێ که ئینه‌ی زینانه‌نه‌،چێششا که‌رذه‌ن؟ئیره‌ج وێش هزار

جارێ گێڵنانشه‌وه‌ په‌یم که گرذوو زیناناو‌ ئێرانی ته‌قه‌ڵبڕا جه‌

بێ تاوانا و تاوانوو گرذێشا ئینه‌نه‌ که نه‌یاروو ئی زۆڵم و

دیکتاتۆریه‌نێ.من یه‌ک جار ویرێو ئاما په‌یم که تا ئا ساته‌

نامابێنه مه‌ژگێم:واڵێ،مه‌له‌نه ویروو ئی چێوا،پاسه‌یچه‌ نیا،

ئاخۆر تا چێوێو نه‌بۆ،ئانزانی نمه‌گێرا. واتش:نا،چی،بێ وێچ

گێرا.به‌ڵام قسه‌و تۆنه‌،چه‌نی کریۆ گێراش،ئاذێچ ڕۆ

ده‌سگیرانیش.سه‌مه‌ره‌ شه‌مسێوێم هه‌ن.ڕاسه‌ت

گه‌ره‌که‌نه‌،گرذوو ئی وه‌شیه‌یه‌ بێ ئاذی هیچ شه‌وقێوێش

نیا.من به‌ ئی گرذ برێقه‌و شاذیه‌یه‌ بێ ئه‌ره‌ویانا.من ته‌نیا

متاوو دنیای به‌ چه‌ماو ئاذیه‌وه‌ وینوو.ئه‌گه‌ر پێوه‌ نه‌له‌یانمێ

گێڵای تا بڕێو چێوێ که به‌ ڕاوینوو ئاذی زه‌ریفێ بێنێ،

نیشانه‌ش نه‌ذه‌یانێ،من چێوێویم ده‌سگیر نه‌بێ. مزانی

من هه‌ر جه‌ زاوڵه‌یه‌وه‌ کاتانه‌م که‌رذه‌ بێ به‌ کتێب وانای.

تاته‌م گه‌ره‌کش بێ که کتێبێ وانوه‌وه و فره‌یچ وانوه‌وه‌.

چن دانێ کتێبێ تاوو نامێ به‌روو که وانه‌ی بامه‌وه‌ بێ

ئینه‌که‌ یاوابوه‌نه‌ زه‌ریفیشا.ساتێو ئاذ که نیشانه‌ش دانێ،

ئاوه‌خته‌ له‌زه‌تم به‌رذ.چن ساڵن که من ویۆلۆن مذه‌ونه‌،

به‌ڵام وه‌شته‌رین ئاهه‌نگ ئانێنێ که ئاذی گه‌ره‌کێنه. من

ساتێو زینێنا که بیه‌و وێم نقم جه‌ ژیانوو ئاذی بزانوو.چن

چی ڕوانه باسوو ڕزگاریۆ ژه‌نا کریۆ.ژه‌نی وێشا هامیار چنی

پیاکا مزانا هه‌ر ئا حه‌قشا گه‌ره‌کا که پیاکێچ نیاشا.

گه‌ره‌کشانا ڕزگارێ با.تۆ مێشناسیم.مزانی که من ئی

چێوا به‌ که‌سێوی ته‌ر بێژگه‌م به‌ تۆ نمه‌تاوو واچوو. په‌ی

ئینه‌یه‌ که‌ گاهه‌ز یۆته‌ر نیاڤۆنه قسه‌کام و لاقرتیم پنه که‌رۆ.

به‌ڵام تۆ ڕه‌فێقوو ئاذیه‌نی ئامان چێوێوێش واچی پنه.

دڵش نیا پوه‌ که من ئه‌پێسه‌ که هه‌نا و ویرم چێمنه‌‌ بۆ.

مزانی من نه‌یاروو ئی قسانا.من ئی وه‌رده‌سیمه‌ گه‌ره‌کا.

هیچێو په‌ی من شیرینته‌ر چێ وه‌رده‌سیه‌ نیا.ئی

وه‌رده‌سیه‌ که گرذکه‌س قنیشا چنه.په‌ی من چ ڕزگارێو بێ

ئاذی؟21ساڵێ جه‌ ته‌مه‌نیم ویه‌رای ویه‌رۆ.نزیکوو12

ساڵه‌گیه‌نه‌ تاته‌م ڕزگاریش دانا پنه.شێش ساڵێ ڕزگاره‌

بیێناو کۆره‌.ژیوایم نه‌چه‌شته‌ن،یه‌رێ ساڵن که ئاذم گه‌ره‌کا.

شێته‌ بیێنا و زینێنا،وه‌رده‌سیم په‌ی ئاذیا ڕزگاریما.ساتێو

ئی قسا که‌رێ،گه‌ره‌کما واچوو که چه‌مێش فیسیێنێ.

تڵانه‌نه‌ وه‌روو یانه‌که‌ی قه‌راخوو هه‌ساره‌کێ بڕێو جه‌

مێمانه‌کا پاڵوو تاته‌و رۆشه‌نێ مدره‌ی بێنێره‌ و چنیش

قسێ که‌رێنێ.تاته‌ش چڕیه‌ش ونه‌ و لوا.منیچ لوانێ

سه‌وه‌ره‌نه‌و شریته‌کێ. نه‌وارێوێم که که‌وت ده‌سم جه‌

فیلموو(جه‌مخانه هۆڕپڕۆ)بێ.ده‌نگش خاس ویرما.به‌ڵام

هونیه‌کێش ویرم شیێنێوه‌.هۆرگێڵنایش به‌ هۆرامی چێوێوی

چێمنه‌نه‌:ته‌نیا که‌ڕه‌تێو قۆمیۆ،که‌ڕه‌تێوی ته‌رش نیا.ئاچێوه‌

که ژیوای یه‌ک جار پێشکه‌شما که‌رۆ،ئتر نمه‌ذۆماوه‌،ئتر

نمه‌ذۆماوه‌.سیپاڵه‌ ڕه‌نگاره‌نگێو مێمانه‌کا دلێراسه‌و گۆڵه‌

زه‌ریفه‌کا،پا قسا که من ده‌موو رۆشه‌نێوه‌ ئێژنیێم،که

شاریابێوه‌ دلێ ئی ده‌نگه‌ نه‌رم و نیانه‌یه‌‌،گرذوو ئی چێوا

حاڵه‌تێوی نهێنیم دێ پنه،پسه‌و ئینه‌یه‌ که په‌رذێوی خیاڵی

سه‌روو ئی دنیه‌ینه‌ یاویابۆره‌. ئننا ئننه‌ مڕیایی و

سه‌رگه‌ردیه‌،ئی گه‌ره‌ک بیه‌یه‌ ته‌نیا کتێبه‌نه‌ تاوی بێزیه‌وه‌،

نه‌ جه‌ دنیاو به‌ری،هه‌ر پاسه‌ که واتم،ئی کناچێ هینوو

دنیه‌یوی خیاڵی بێ،و ئاذه‌شا ڤه‌راڤه‌روو دنیاو به‌ری

نیێبێشاره‌.دنیاو به‌ری که دلێشه‌نه‌ چێوانێوی به‌ذیۆمن،

پیسی،به‌خێڵی،چه‌ته‌گه‌ری،فه‌نتازی و زۆڵموو ده‌سه‌ڵاتدارا

مه‌راره‌ت و نه‌سه‌قووئیداره‌و ئێتڵاعاتی و هزاران پیسیێ

ته‌رێ که زاڵێ بێنێ.ئی گرذ خاسیه‌وزه‌ریفیه‌ ڤه‌راڤه‌روو

ئی گرذ پیسیه‌و قیزه‌ونه‌یه‌!قینیم ئاما خه‌ڵکه‌که‌ی.لوانێ

کۆنجێو و گه‌ره‌کم بێ ماتڵوو ئیره‌جی بوو.چی دێرش پنه

بیه‌ن و چه‌نی بیه‌ن که هێشتار نامان؟چه‌نی بی که ئیره‌ج

که‌وت ویروو زه‌ماوننێ.ته‌نیا ویرێو مه‌ژگوو ئاذیه‌نه‌ ڕاش بێوه‌

وئاذیچ ئاخیزوو ئێرانی بێ.ویروو جه‌ به‌ین لوه‌ی و جه‌ به‌ین

به‌رذه‌ی که‌سانێو که ئێرانشا کاوڵ که‌رذه‌ن.دلێ مه‌ژگێوی

چێمنه‌یه‌ چه‌نی ویروو ژه‌ن ئاذه‌ی یۆزیانه‌وه‌؟شێش مانگێ

وه‌ڵێ ئاشناییش چنی رۆشه‌نێ ئه‌گه‌ر که‌سێو واته‌یاش

چنی که چی ژه‌نی نماری بێژگه‌م زه‌رذه‌خێوه‌ داواچێوی

ته‌ر نه‌گێرێ.به‌ ڕاسی ته‌نیا ویرێو که نه‌یاوێ به‌ مه‌ژگیش،

ویروو ژه‌ن ئارذه‌ی بێ.ئه‌وه‌ڵین ڕێوێو که پێوه‌ره‌ لوه‌ی گێڵه‌ی

گاهه‌زحه‌فتێو یام دوێ حه‌فتێ شۆنوو ئاشنا بیه‌شا بێ.

هه‌ر ئاڕوه‌ ئیره‌جی واتا پنه:ئینه‌ ژه‌نێوه‌نه‌

که ده‌رذه‌م وه‌رۆ.پێوه‌ شاره‌نه‌ زیه‌یره‌،په‌شتوو ده‌ربازێوی

وێرانه‌ دێژێوی قه‌ذیمی که هینوو دێهاتێویا،که هێشتار

مه‌نه‌ن،دێوارێوی نیمه‌ وڕیا و هه‌ڕینا .رۆشه‌نه‌

گه‌ره‌کش بێ بلۆ سه‌روو دیواره‌که‌ی و چوون نه‌تاواش،

ئیره‌ج نزیک بیه‌وه‌ تا ده‌سباریش که‌رۆ.کناچێ سووره‌

بیه‌وه‌ و ناسش ده‌سوو ئیره‌جی تلیۆ پوه‌شۆ.چن جارێ

هه‌وڵێش دا که دیواره‌که‌نه‌ بلۆ سه‌ر نه‌تاواش.ئاخرش

تاگجیه‌که‌ش تۆزین نه‌که‌رذ وده‌سش ئۆگار،سه‌رکه‌وتێ

نه‌بیه‌.ئی حاڵه‌تی زاوڵه‌یێشه‌ که ساکاریو ئاذێ نیشانه‌

دێ،ئیره‌جش دڵ کێش که‌رذه‌بێ.جۆرێو که شۆنیه‌ره‌ واتاش

چنی:ئینه‌ کناچێوه‌نه که درذه‌م وه‌رۆ.دیمه‌نێو ته‌ر که من

هه‌جگیز ویرم نمه‌شۆوه‌.یانه‌و ئیره‌جی بێنێ.رۆشه‌نه‌یچ

ئامه‌ی بێ شونوو شریته‌کێ که به‌رۆش یانه‌و وێشا.یانه‌و ئیره‌جی تائا

حه‌ننا که ئه‌سپ کێشه‌کێ ئامه‌وشۆ که‌را گاهه‌ز یاڤۆ

پانسه‌ذ لاقۆرێ.ساتوو لوای ئێمه‌یش هۆرستیمێوه‌ که

تا سه‌روو خیابانی شریته‌کێش هۆر گێرمێ چنی.رۆشه‌نه‌

په‌ڵپه‌ش گێرته‌ که گه‌ره‌کم نیا بوو ملۆزمتا.وێم شریته‌کێ

به‌روو.ئاخرێش گه‌ره‌کما نه‌بی بازمێش جێگا،ئیره‌جی وات:

ده‌ی خاسا ئێمه‌ ته‌نیا ڕه‌وانێت که‌رمێ تۆ وێت هێقم

شریته‌کێ گێره‌. شریته‌کێ قۆرسه‌ بێ به‌ڵام ته‌نیا

گه‌ره‌کش بێ ئینه‌یه‌ یاڤنۆ و واچۆ من پسه‌و ئی کناچه‌

عینواندارا نیه‌نا،ئی کۆڵه‌ قۆرسه‌شه‌ یاونا تا سه‌روو

خیابانی،بێ ئینه‌یه‌ که شۆنه‌مه‌یۆ جه‌ مانیایی دۆ چه‌مۆ

وهه‌ر چیم که‌رذ که شریته‌کێش گیروو چنه‌ ناسێش.ئی

وه‌رچه‌مه‌مه‌ ویر نمه‌شۆوه‌،چوون چن ڕوێ شۆنوو ئی

جه‌ریانیه‌ چنیم واتش که گه‌ره‌کما ژه‌نی باروو. ئه‌رامه‌ننه‌!

خیاڵێوی سه‌مه‌ره‌ش بێ.ئیسه‌ ڕووت سه‌روو

چیمه‌نتوویه‌وه‌ که ته‌نیا چێرگێجیێو و چێرپانتۆڵێوێش ئینه‌ی

پۆره‌ خه‌ریکا پوویۆ.په‌ی چێشی؟ئاخۆر چی؟ ته‌نیا وه‌روو

ئینه‌یه‌ که سه‌رپرێسوو شارداری دوێ ساڵێ فره‌ته‌ر تاوو

درێژه‌ دۆ به زۆڵم و مل هۆڕیش.ڕه‌نگا ئیسه‌ خه‌ریکێنێ

مه‌راره‌تش مذا،گاهه‌ز مه‌رذه‌ بۆ....ته‌نیا په‌ی ئینه‌یه‌ که

بڕواش چامنه‌نه‌ که دیکتاتۆری جێهانی خه‌ریکا ئه‌و وڵاته‌کا

ته‌ری کێشنای کێشنۆ به‌ سه‌وه‌رێنه‌و نه‌بیه‌ی و

سیابه‌ختی.... واته‌ی ئی ویریه‌ شۆنه‌مایوی سه‌مه‌ره‌ش

هه‌ن په‌یم.باوه‌رش سخڵه‌تا.عانوو حاڵیه‌نه‌ هه‌وڵ دێنێ،

ئی کێشه‌یه‌ په‌ی وێم لابه‌روو.چن ساڵێ بێ که‌ ئیره‌جی

ئێشناسێنێ.پێوه‌ره‌ گه‌ورێ بیێبێنمێ.وانگایوه‌نه‌ بێنمێ.

هام که‌ی یۆی بێنمێ.پێوه‌ ئه‌زمه‌نه‌ما"امتحان"دا. پێوه‌

لوه‌یمێ په‌ی فه‌ره‌نگی.فره‌و چێوا بیه‌بێ دیارکه‌و ئانه‌یه‌ که

ئێمه‌ بیمێ هام ویرێ.چن شه‌وێ پێوه‌ ڕۆما که‌رذه‌ بێوه‌

چن سه‌عاتێ پێوه‌ره‌ ده‌مده‌مێ که‌رێنمێ که مشۆم

چه‌نی ئێران و ئانزانیه‌ت ڕزگاربۆ.گاهه‌ز ڕێش چه‌رمێ ویروو

ڕزگاری ئانزانی و وه‌شبه‌خت که‌رذه‌ی فیسپه‌گای"اجتماع"

هه‌رمانێوی مه‌حاڵ زانا،به‌ڵام جوانێ،گرذ وێشا هۆرکارێوی

"عامل"ئه‌رین"مثبت"په‌ی‌ ڕزگاربیه‌ی ئانزانی زانا.من و

ئیره‌جیش پسه‌و هه‌نترینی بێنمێ.ساتێوه‌نه‌ که په‌ی

ئه‌سای کتێبێوچن کاغه‌زێ نویسێ په‌ی تارانی،

ده‌مده‌مێ که‌رێ چنیم که هه‌رمانه‌کێو فه‌رانسه‌ی په‌ی

وه‌ڵاکه‌رذه‌ی کتێبا هه‌ڵه‌ن و ده‌م و ده‌زگاو ئامریکای

خاسته‌ر ئه‌ی ڕاوینش...مه‌رذه‌ی ئه‌ذایش که کت وپڕ

تارانه‌نه‌ قۆمیابێ که‌لاوه‌ ڕووحیه‌ش فاڕنا.خواینه‌ته‌رش که‌رذ

.رواڵه‌تی جه‌ زه‌وقیش که‌مته‌ر بیه‌وه‌.دڵداری چنی کناچا

وارشێوی ته‌رش گێرت وێ،هه‌روه‌ره‌نه‌ که‌مته‌ر بێوه‌.

ساتێوه‌نه‌ که ‌ هه‌رمانێ کۆمه‌ڵگایش

فره‌ته‌ر بێوه‌.به‌ هه‌ر جۆرێو بێ گه‌ره‌کش بێ هام ویرێ

وێش بێزۆوه‌.به‌ داخه‌وه‌ ته‌نیا ویرشا تانپه‌ڕ بێ په‌یش

و شه‌خسیه‌تشا ڤزێوه‌ لا.و ئه‌سێح هه‌ر ئی باوه‌ره‌

ته‌رسه‌زاڵه‌، و لاژاوه‌یه‌ و زه‌ڕ دۆسیه‌ ئاذشا ڤسه‌وه‌ سارا.‌

چی ئاخراوه‌،چ ئورووپانه‌ و چ ئێرانه‌نه ‌ڕه‌نگا جارێویچ ئاذێم

چنی کناچا نه‌ذیه‌بۆ.په‌وکی ساتێو که واتش:خیاڵما چنی

رۆشه‌نێ زه‌ماوننه‌ که‌روو،باوه‌رم پنه‌ نه‌که‌رذ.من که جه‌

گرذوو هه‌رمانه‌کا باوه‌رم به‌ ڕێکینیا"نظم"و هه‌وڵ مذه‌و که‌

جه‌ هه‌ر هه‌رمانێوه‌ بانچه‌مێ نادیاریش بێزوه‌وه،ماوێو

سه‌ره‌م سڕ مه‌نه‌بێ.ئه‌جێم ئی ژه‌ن ئارذه‌یه‌ وه‌رپه‌رچوو

"عکس العمل"مڕیایێویا که‌ ژیوایشه‌نه‌ تووشیش ئامه‌ینێ.

گرذوو ڕه‌فێقه‌کاش که‌وتێ بێنێ سه‌روو کارانێوی فره‌ تانپه‌ڕ

و ئه‌گه‌ر ده‌و‌ڵه‌مه‌نێ نه‌بیێ یانێ،قلیچکه‌و مڵه‌یچ گنێ

مشته‌و ئاذیشه‌یچ!ساتێوه‌نه‌ که ئیره‌ج جه‌ پابله‌ی"مرحله‌"

فره‌ دوور که‌وته‌بێوه‌.ده‌سه‌ڵاتدارێ که کسمشا به‌ش

که‌رذه‌ بێوه‌،کارمان"شرکت"و هه‌رمانگاو مامه‌ڵه‌یێ و

به‌تایبه‌تیێ ته‌نیا به‌شوو ئانیشا بێ که پسه‌و وێشا بێنێ،

به‌ که‌سێوی هه‌رمانه دێنێ که‌ په‌ی ئاذیشا هه‌رمانه که‌را

و قازانجوو ئاذیشا فره‌ته‌ر که‌رۆ.به‌ڵام ئاذ چامنه نه‌بێ.

شۆنوو ئانه‌یه‌ که چنی رۆشه‌نێ ئاشنه‌ی بیێ ماڵووم بی

پنه‌م که ئه‌ره‌ویه‌ی ئیره‌جی پی کناچێ ده‌سکه‌وته‌ی فره‌

بیه‌ی هه‌ستێویا که جه‌ مه‌رذه‌و ئه‌ذایشه‌نه‌ دروونشه‌نه‌

زینانی بیێنێ‌ و ئیسه‌ وه‌شه‌ویسی ڕه‌یوه‌ بێ‌ که په‌ی ئی

ده‌رذێشه‌ ئێسته‌بێشۆ.به‌تایبه‌ت ئینه‌که رۆشه‌نه‌یچ بێ

ئه‌ذه‌ی بێ و ئاذێچه‌ شۆنوو که‌سیوی بێ که پاڵش دۆ پوه‌،

ئاذێش تخونوو هه‌نترینیش که‌رذێوه‌ و خه‌ره‌فیاو هه‌نترینیش

که‌رذێ بێنێ.ئیره‌ج و رۆشه‌نه‌ ته‌ژنای وه‌شه‌ویسی بێنێ

و ئه‌گه‌ر پی جۆره‌ مه‌ته‌ڵه‌شا نه‌کریه‌یاوه‌،مشیه‌یا یۆشا

به‌رذه‌یا زینان و ئه‌وه‌که‌شا به‌رذه‌یا شێتخانه. زینان؟ کێ

مزانۆ زینان یانێو چێش؟په‌ی فره‌و خه‌ڵکی ئی واتیڵه‌

مانایوی نامالوومێش هه‌ن.به‌ڵام که‌ڕه‌تێو مشۆم په‌شتوو

نه‌رده‌ ئاسنیه‌کانه لچێ وشک و هۆرته‌قا،و دیمه‌نی ڕه‌ق و

ته‌قوو ئیره‌جیش دیه‌یا و ئا ساته‌ زه‌ینه به‌رێ‌،ته‌قه‌لا دێ زه‌ینه‌

به‌رۆ،که ئی واتیڵه‌ یانێو چێش؟دوێ چه‌مێ که پسه‌و

ئاسن کێشێو یۆی کێشنێ،چه‌مانێو که سه‌رچه‌مه‌و

هازوهێزی بێنێ،ئیسه‌ په‌شتوو ئی نه‌رده‌ قایماوه‌،

بێ برێقه‌ به‌ڵام پته‌وته‌رێ بیێ بێنێ.به‌ گرذوو ئی

مه‌راره‌تاوه‌ هێشتار نه‌به‌زیان،هه‌مته‌ر چا هازیه‌،هازێوی

قووڵ چکای چکێره‌،پسه‌و ئینه‌ینه‌ که‌ واچۆ:من نمه‌خه‌ینوو،

نمه‌تاودێ به‌ردێم به‌ینه‌نه‌،په‌ی چێشی گه‌ره‌کتانا

به‌ردێم به‌ینه‌نه‌؟ته‌نیا په‌ی ئینه‌یه‌ که من ماچوو و باوه‌رم

هه‌ن که شمه‌ خه‌ڵکوو ئێرانی جه‌ به‌ین به‌ردێ.هه‌مته‌ر

جه‌ وتاره‌که‌ی دوور گنوه‌وه‌،هه‌مته‌ر هۆساروو باسه‌که‌ی

ده‌سمه‌نه‌ به‌رمشۆ. هه‌ر ساتێو که گنوه‌وه‌ ویروو ئیره‌جی

بێ ئیختیار وه‌رچه‌موو ئی زه‌ماوننێ مه‌ی وه‌روو چه‌مام.

هه‌رچن که وێش چا نه‌بێ،ئی زه‌ماوننێ وه‌شبه‌خته‌رین

ڕۆ ژیوایش حه‌سێب کریۆ.که‌لاوه‌ زه‌ماوننه‌کێ به‌ زه‌وقوو

وێش ڕێکه‌ش ڤسێ بێ.رۆشه‌نه‌ ڕێکینش دابێ پنه،به‌ڵام

مالووم نه‌بێ چ ئه‌نازێو جه‌ زه‌وقوو وێش که‌ڵکش هۆر

گێرته‌بێ.ئانزانی جۆراجۆرێ مێمانوو شاذیه‌که‌ی بێنێ.

هام کارێ ئیره‌جی،سه‌رپرێسوو کارمانوو یانا،ئانێ که

په‌ی هه‌رمانا ئه‌ینێوه‌ لاش.یانه‌سازێ دلێ سیپاڵێ

نۆزهوورشا که له‌مه‌ی زله‌شا قه‌ره‌وڵوو"نشانه"بیبێنی

بێ که‌ تا چن ساڵێ چیه‌ وه‌ڵی بینێنێ.یۆ یام دوێ

سه‌رکاریگه‌رێ و هه‌رمانکه‌رێچ چا بێنێ.ئاذێ به‌ نتم و

داماگیه‌وه‌ کۆنجێو مدرای بێنێره‌ وجه‌ قه‌ره‌بالق و شادیۆ

ئه‌وه‌کاته‌ری به‌شداری نه‌که‌رێنێ،پسه‌و هامکارێ ئۆرووپا

لوای ئیره‌جی چنی ژه‌نه‌کاشا هۆرنه‌پڕێنێ.مه‌شرووبیچ

نه‌وه‌رێنێ وته‌نیا جارجار چای و به‌سته‌نی وه‌رێنێ.به‌ڵام

رۆشه‌نه‌،بۆنه‌و ئانه‌یه‌که‌ گۆل نه‌ویه‌رۆ په‌یشاو ڵایذه‌یی

"بیگانه"نه‌که‌را لوا لاشا،قسێش که‌رذێ چنیشا،نه‌وارێ

ئێرانیش ڤسێ سه‌ر په‌یشا.چنی واڵه‌ و ژه‌نه‌ کاریگه‌ره‌کا

فره‌ته‌ر گه‌رمی دێ خه‌رجه‌وه‌.په‌ی ئینه‌یه‌ که گاهه‌ز

زه‌ینه‌ش به‌رذێ بۆ که ژیوایشانه ڕه‌نگا که‌ڕه‌تێو قۆمیۆ که شه‌وێوه‌

چێمنێ هام ده‌نگوو گه‌ورا با، هه‌ر پاسه‌ که ژیوای وێشانه

که‌ڕه‌تێو ئا هه‌ساره‌ قلیچکه‌داری وه‌شبه‌ختیه‌ میۆزیۆوه‌.

ته‌نیا که‌ڕه‌تێو مه‌ی وه‌ره‌وه‌.هه‌ساره‌ی قلیچکه‌دار دیسان

مه‌ی په‌ی ئاسمانی،به‌ڵام ئاساته‌ ئانزان پیر و چه‌میان و

نمه‌تاڤۆ جه‌ ‌چه‌م پنه‌که‌و‌ته‌یش که‌ڵک هۆر گێرۆ.شریته‌کێچ

هه‌ر ئی وتاره‌یه‌ دووباره‌ که‌رێوه‌.ئاچێوه‌ که ژیوای پێشکه‌شش

که‌رذه‌ن،که‌ڕه‌تێوا و دووباره‌ش نمه‌که‌رۆ.ماوێو بێ که ئیره‌ج

گه‌ره‌کش بێ زه‌ماوننه‌ که‌رۆ.به‌ڵام هه‌میشه‌ وه‌روو بێ

زه‌ڕی و که‌م ده‌سی نه‌تاوێ زه‌ماوننه‌ که‌رۆ.ساڵێوه‌

هه‌میذێش ئینه‌بێ که یۆ جه کارمانوو ئاسن ڕاکا

هه‌رمانێوه‌ گه‌ورش داپنه وبه‌ زه‌ڕێو که چی ڕانه به‌ ده‌س

ئارێ،تاڤۆ زه‌ماوننه‌ که‌رۆ.مانگێوه‌ وه‌ڵێ زه‌ماوننه‌کێش

سه‌رکه‌وته‌ بی،نه‌خشه‌ی پرذێوی گه‌ورێ که په‌ی

ئامه‌وشۆ ئاسن ڕاکێ پنه‌واز بێ به‌ ده‌وڵه‌تیه‌کا

سه‌له‌منۆ.هه‌رچن که چی کێوه‌ڵکانێنه‌ بڕێوی فره‌

به‌شداریشا که‌رذه‌بێ نه‌خشه‌و ئاذی قه‌بووڵ بی،به‌ڵام

هه‌ر نه‌تاواش وارشه‌که‌و نه‌خشه‌که‌یش سه‌له‌منۆ.چوون

یۆجه‌ قینه‌به‌ره‌کاش"رقیب"که وێش داذواچوو گڵێره‌بیه‌و

شۆرای ملی بێ،تاواش سمێڵوو سه‌رپرێسوو کارمانه‌که‌ی

چه‌رب که‌رۆ و هه‌رمانه‌کێ مشته‌و ئیره‌جیه‌نه‌ به‌رێش

کێشۆ.وئینه‌ یۆجه‌ سخڵه‌ته‌رین له‌تمێو بێ که ئاما ملشه‌ره‌

مه‌به‌ستش جه‌ به‌ده‌س ئارذه‌ی ئی هه‌رمانێ ده‌وڵه‌مه‌ن

بیه‌ی نه‌بێ.ئه‌سێح ئاذ مرخێوی"طبع"به‌رزته‌رش بێ.ئاذ

گه‌ره‌کش بێ به‌ راوبه‌رذا‌و ئی نه‌خشه‌یه‌، به‌ دژمه‌نه‌کاش

سه‌له‌منۆ که‌ چێش تاڤۆ که‌رۆ و مالووماتش تا چ ئه‌نازێوا

چوون گه‌ره‌کش نه‌بێ خه‌فه‌ت و په‌ژاره‌ش گرذوو دنیای

گێرۆره‌،به‌تایبه‌ت قینیش بێ جه‌ ئینه‌یه‌ که که‌سێو دڵش

سۆچنۆ په‌یش،وپی جۆره‌ بێ که زه‌ماوننه‌ش که‌رذه‌ تا

دژمه‌نه‌کێش نه‌خواش پنه وجه‌ سیا به‌ختیش وه‌شی

نه‌که‌را.رۆشه‌نه‌و تاته‌ش یاوابێنێنه‌ که ئی مڕیایه‌ چن

گران بیه‌ن په‌یش.هه‌رچن نارشا ڕوه‌شه‌‌وه‌.دڵگرمیشا داوه‌

که ئی زه‌ماوننێ به‌را ڕاوه‌.تاته‌یچێش دڵش پوه‌بێ که ئی

زه‌ماوننێ زووته‌ر کریۆ.چا ساته‌وه‌ لا که ژه‌نه‌کێش مه‌رذێ

بێ،ته‌نیا به‌شه‌کارێوێش نیابێره‌ په‌ی وێش وئاذێچ

وه‌شبه‌ختیۆ کناچه‌کێش بێ.ته‌نیا ئاواتش ئانه‌ بێ که‌

وه‌ڵێ مه‌رذه‌یشه‌نه‌ سامانێوه‌ دۆ به‌ کناچه‌کێش و

وه‌شبه‌خته‌ش زانۆ.به‌ڵام هه‌ر چێرچێو ڕوه‌و ئی ڕیش

چه‌رمه‌یه‌،و هه‌ر ئاخیزوو چه‌ماش یاونێ که ژیوای

ئامۆ چیارێوی خرابش که‌رذه‌ن و به‌ذوینش که‌رذه‌بێ.

جه‌گرذوو مه‌راره‌ته‌کاو ژیوایش چێوێو مسابێ و ئانه‌

ئینه‌بێ که نمه‌بۆ ژیوای زاڵ بۆ ملته‌ره‌.بۆ که‌رێ،ئه‌گه‌ر

رووپێویا نه‌وینێ،به‌ڵام دووراندوور ڵێڵ وینێ که وه‌شبه‌ختی

کناچه‌کێش پسه‌و وه‌شبه‌ختی وێش هیچ و گۆتره‌یا،به‌ڵام

وێش نه‌به‌زنێ.چ خاس ئامان ملوو وێشه‌ره‌ وبه‌ چه‌م

دیه‌بێش که که‌ڕه‌تێو،ته‌نیا که‌ڕه‌تێو هه‌ساره‌ی قلیچکه‌دار

ژیوایشه‌نه‌ دیاریش دابێ،و جاری ته‌رش نه‌بێ. –ئاچێوه‌ که

ژیوای که‌ڕه‌تێو دانش پنه‌ما،ئتر نمه‌ذۆوه‌،ئتر نمه‌ذۆوه‌.‌ بڕێو

ماچا :مشۆم دوه‌ ده‌سی لکیه‌ی ژیانیه‌ره‌،هه‌ر

ده‌یه‌قێوێش گران نرخا.بڕێویچ ماچا ژیوایۆ که ئه‌پێسه‌ به‌

ڕه‌حه‌تی دمه‌ینه‌ش مه‌ی،پووشێو نمه‌یژۆ.... تاته‌و رۆشه‌نێ

په‌ی وێش باوه‌رش به باوه‌ری دووهه‌م بێ و په‌ی

کناچه‌کێش باوه‌رش به وه‌ڵینی بێ،په‌وکی دڵ گه‌رمی

دێوه‌ به‌ زاوڵه‌کا که‌ کرژوکۆڵ ژیوایشا ده‌س پنه که‌را.

نزیکوو سه‌عاتێوێ بێ که مێمانه‌کێ گرذ گڵێرێ بیێ

بێنێوه‌،ده‌مه‌ته‌قێ که‌رێنێ،خوێنێ،هۆرپڕێنێ،گۆرانیێ

واچێنێ و شاذی که‌رێنێ!به‌ڵام هێشتار هیچ هه‌واڵێو

جه‌ ئیره‌جی نه‌بێ.تاته‌و رۆشه‌نێ قسێ که‌رێ چنی

گرذی و خوێ وهیچ نارێ ڕوه‌و وێشه‌ره‌ که ماتڵوو که‌سێویا.

کناچه‌کێچێش ڕه‌مێ لاش و واچێ:زه‌نگه‌م دا په‌ی فڵان

یاگێ نه‌بێ چا،فڵان که‌سم کیاست په‌ی فڵان یاگێ به‌ڵام

چاگه‌یچه‌ نه‌بی،واچێ:هه‌ریاگێوه‌ بۆ وێش مه‌یوه‌.

به‌ڵام ساتێو که ته‌قه‌شا دا به‌ره‌و حه‌و‌شه‌کێ و که‌سێو

ناما چوه‌ر و خزمه‌تکاروو یانه‌که‌ی ئاما لام و چنیم واتش:

کاکه‌،یۆ ئامان تۆش گه‌ره‌که‌نی.ئا ساته‌ وێم چه‌مم چنه‌بێ

چه‌مچێو که تاته‌و رۆشه‌نێ چایش پنه تاونێوه‌،ده‌سشه‌وه‌

که‌وته‌ره‌ زه‌مین.چی وه‌خته‌بێ که به‌ کناچه‌کێش وات:

هه‌ریاگێوه‌ بۆ وێش مه‌یوه‌.ڕاس واچێ.ئاخرش هه‌ساره‌ی

قلیچکه‌دار وێش مه‌یوه‌،به‌ڵام ساتێو که ئتر نمه‌تاومێ

وینمێش. من چنی ئا که‌سیه‌ که هه‌رمانه‌ش بێ پنه‌م جه‌

هۆذێو نزیکوو تڵانه‌کێ ده‌سما که‌رذ قسه‌ که‌رذه‌ی.هه‌رچن

باسه‌که‌ما فره‌ش پنه‌نه‌شی،به‌ڵام من ماوێو چا مه‌نانێوه‌.

واقم به‌رذه‌بێ و نه‌تاوێنێ باوه‌ر که‌روو پا چێویه‌ که‌

ئێژنیه‌بێم.لوانێ فێکرێنه‌،چه‌نی و به‌ چ زوانێو ئینه‌یه‌ واچوو

به‌ تاته‌و رۆشه‌نێ.ساتێو که هۆذه‌که‌نه زیانێره‌ هه‌مته‌ر

ماوێو بانجێڵه‌که‌نه‌ مدرانێره‌.چه‌مم چنه بێ که‌ تاته‌و

رۆشه‌نێ هاگاش لامنه‌وه‌ بێ لوانێ لاش،ئاذێچ ئاما

به‌ سه‌وه‌رێنه‌م.خۆڵکه‌و جێگه‌ره‌یش که‌رذا.ده‌س وه‌شیم

چنه که‌رذ.تاته‌و رۆشه‌نێ جێگه‌ره‌ی فره‌ کێشێ.به‌تایبه‌ت

ساتێو که ختووره‌ش بیه‌یا،جێگه‌ره‌که‌ی گیسنێنه‌،بڕێو

نه‌فه‌سێش دێونه‌،وشۆنیه‌ره‌ فڕه‌ش دێ.یاوه‌یمێ قه‌راخوو

هێساره‌کێ یۆجه‌ خزمه‌تکاره‌کاش چڕی و واتش:واچه‌

دالێو ئاوی پێژگنا.خزمه‌تکاره‌که‌ که لوای لوێ،په‌رساش

چنه‌م:دڵت پوه‌ن مه‌شرووب وه‌ری؟داوه‌ته‌که‌م قه‌بووڵ

نه‌که‌رذ،شۆنیه‌ره‌ ده‌سوورش دا سه‌نه‌ڵیێشا ئارذێ و من و

ئاذ دوور جه‌ خه‌ڵکه‌که‌ی نیشتی مێره‌.مه‌شرووبشا ئارذ،

هیچکاما ده‌سما نه‌ذاونه‌،ماوێو بێ ده‌نگ نیشتی مێره‌ ،ئاخرش

تاته‌و رۆشه‌نێ وات:نمه‌زانی چی ئیره‌جی دێرش پنه‌

بیه‌ن؟ واتم:خه‌به‌رێوی گۆڵم هه‌ن. بێ هیچ ختوورێو واتش

چێش بیه‌ن؟ واتم:ئارۆ ساعبێو ئیداره‌و ئێتڵاعاتی ئیره‌جشا

گێرته‌ن.گه‌ره‌کما بلوو بزانوو چێش بیه‌ن؟و ئه‌گه‌ر کریۆ یاگێ

و چاشتیش په‌ی کیانوو.تاته‌و رۆشه‌نێ مه‌شرووبه‌که‌ش

نزیکوو لچاش که‌رذۆ و واتش:په‌له‌ نمه‌که‌ره‌.هه‌رمانێوه‌

نمه‌که‌ره‌ که بۆ بانچه‌می نکوونی گه‌وره‌ته‌ر.چی گێرته‌نشا؟

هه‌ڵبه‌ت بانچه‌مێوێش بیه‌ن.به‌ڵام باسێوی تانپه‌ڕته‌ر هه‌ن.

بذیه‌ په‌ی کناچه‌کێم.وینی به‌ چ شه‌وق و زه‌وقێو مه‌ی

ده‌موو مێمانه‌کاوه‌،وینی،چن وه‌شبه‌خته‌نه‌.هیچکه‌یۆ

ته‌مه‌نشه‌نه‌ پسه‌و ئارۆی،پسه‌و ئی لاذه‌یه‌"لحظه"

نه‌خوه‌ینه‌.سیپاڵی زه‌ماوننێش ئینه‌ی پۆره‌....ئه‌رامه‌ننێ...

په‌نجا یام شه‌س ساڵێ ته‌ر مژیوو. ئارۆ،ئی ساته‌

وه‌شبه‌خته‌رین ڕۆ ژیوایشا.تۆ تاوی به‌ قسێو،واتیڵێو،یام

ئاخیزێوی هه‌ڵه‌،ئی وه‌شبه‌ختیه‌یه‌ به‌ری به‌ینه‌نه‌،گه‌ره‌

شێڵێش که‌ری،سه‌عاتێوه‌ فره‌ته‌ر نیا.به‌ڵام خاتێرێوا که

ته‌مه‌نێو مه‌نۆ.تۆ گه‌ره‌کتا به‌ بنجکێو ته‌مه‌نێو به‌ری به‌ینه‌نه‌.

چی؟ئی هه‌رمانێ نمه‌که‌ره‌.چیه‌نه‌ مه‌نه‌وه‌.ئی زه‌ماوننێ

نمه‌شێونه‌.ته‌نیا خاتێرێوا.تۆ پاسه‌ زانی خه‌ڵه‌تیانا که ژه‌نیم

ده‌ینه ئیره‌جی.نا،من خاس زانێنێ که ئی دوه‌ به‌ ئه‌رکێوی

فره‌ قۆرس وه‌شبه‌ختی به‌ ده‌س مارا.خاس زانێنێ که

وه‌شبه‌ختیشا نه‌یاری چنی ژیوایا و په‌ی ژیوای ده‌س پنه

کریۆ.تۆ ئه‌جۆت که من نیاوانانه‌ ویرێ کناچه‌کێم.هه‌ر

واتیڵێو که‌ چی دوه‌ ساڵه‌نه‌ ده‌مشه‌نه‌ به‌ر ئه‌ی،زانێنێ

که سه‌رچه‌مه‌شا ئینا چکۆ.په‌ی ئینه‌یه‌ که فره‌ته‌ر ڕووحیه‌و

کناچه‌کێم بێشناسوو وێم ئاشنا که‌رذ چنی ویره‌ ئاخیزیاو

ئیره‌جی.تۆ گه‌ره‌کتا بلی و په‌رسی که چی گێرته‌نشا،

مه‌گه‌ر نمه‌زانی؟ئه‌سێح وێت مزانی،من بێ خه‌م بێنێ

که ڕوێو تووشوو گێچه‌ڵێ ئه‌ی.به‌ڵام نه‌ پی کرژیه‌.مشۆم

گێراش.ئه‌گه‌ر نه‌گێرته‌یاشا،ئه‌سێح به‌ڵه‌یۆ ته‌ر ئارێنێ

سه‌رش.ئاخۆر ژیوا گرذش زۆران گێرته‌یا.مشۆم چی

ئیره‌ج تووشوو گێچه‌ڵێ به‌ی!په‌ی ئانه‌یه‌ که ئێژای

مه‌راره‌ت و گێچه‌ڵیا،ئاذ مێژۆژ ونه‌،نه‌که‌سێو ته‌ر. ئینه‌

تانپه‌ڕ نیا که‌ وه‌روو چێشی که‌له‌مچه‌شا که‌رذه‌ن و داخۆم

مانگێوه‌،ساڵێوه و یام ده‌ساڵێ ته‌ر تاوو زرێ وێش و

مه‌حاڵوو ئێرانی پڕچنۆ و ڕزگار بۆ،تانپه‌ڕته‌ر ئینه‌نه‌ که ئیره‌ج

وه‌ش کریان په‌ی جه‌نگی،مشۆم مه‌راره‌ت کێشۆ،ئێش

چه‌شۆ،گێچه‌ڵێ وینۆ،تا تاشیۆ،ساف و سۆڵ بۆ بێ هیچ

لۆن له‌کێ و سیاوی....

چی ساته‌نه‌‌ رۆشه‌نه‌ ئاما لاما و تاته‌ش قسه‌کێش بڕیه‌ش.

من له‌رزای له‌رزێنێ نه‌زانێنێ چه‌نی ئی خه‌به‌رشه‌ ماچۆ

چنی.به‌ڵام دیمه‌نوو کناچه‌کێش ماچ که‌رذ و جه‌ داواچوو

رۆشه‌نێ که‌ په‌رسه‌ی بێ:تاته‌ گیان،چه‌نیا ئیره‌ج هێشتار

نامان؟واتش:رۆشه‌ن گیان،خه‌به‌رێوی وه‌شم هه‌ن په‌یت.

پرذه‌ گه‌وره‌کێو ئاسن ڕاکێشا دان به‌ ئیره‌جی وتۆ ئتر

وه‌شبه‌خته‌نی.لوه‌،خه‌م مه‌وه‌ره‌ و چنی ڕه‌فێقه‌کات

شاذی که‌ره‌.وزیروو ڕای وێش چڕیرن و ئاذ ئینا لاو ئاذیه‌وه‌

په‌وکه‌تی دێرش پنه‌بیه‌ن؛شیرینی وه‌ریما که‌وت ڕوێو ته‌ر.

به‌ڵام ئامان ئی سه‌رپرێسوو کارمانا نه‌زانا.ئاذێ

دژمه‌نوو ئیره‌جیه‌نێ و هه‌رمانه‌کێش په‌که‌ مذا.

که‌ڕه‌تێو ته‌ر پاڵمه‌نه‌ په‌شتوو نه‌رده‌ قایمه‌ ئاسنیه‌کاو

زینانی چه‌مم که‌وت رۆشه‌نێ.به‌ینوو ئێمه‌و ئیره‌جی

فره‌ته‌ر جه‌ مێترێوی بێ.به‌ جۆرێو که ئه‌گه‌ر ئیره‌ج و

رۆشه‌نه‌ ده‌سێشا کێشته‌یانێشاره‌،ناخوونێشا تلیێنێ

هه‌نترینیه‌وه‌ و پینه‌یه‌ سه‌له‌میێنێ.چننا که من گرذ

حه‌فتێ یه‌ره‌شه‌مانه‌ی ملوو چه‌م پنه‌که‌وتوو ئیره‌جی،

رۆشه‌نه‌یچ هێشتار مه‌ی.....

زینانوو قه‌سری-سه‌رماوه‌زوو1317ی رۆجیاری

نویسته‌ی:بزۆرگ عه‌له‌وی(1283-1375ی رۆجیاری)

هۆرگێڵن:بێهرووز حاجی

‌

شه‌و‌و جه‌ژنێ....

aragel — Wed, 08 Aug 2012 20:25:13 GMT

شه‌و‌و جه‌ژنێ....

ڕوێو چنی پیه‌یوی که‌ سیپاڵێ کۆنێش پۆره‌ بێنێ،چاشت خانه‌نه‌ نیشته‌بێناره‌. ڕواڵه‌تی پیاکه‌ی پاسه‌ دێ چه‌مۆ که‌ ئه‌رک و مه‌راره‌تی فره‌ش کێشته‌ بۆ.پۆسوو ڕوێش پاسه‌ کیشیابێ که‌ ئه‌جێ گه‌ره‌کشا چانه پێشێو پڕتافیۆ‌ به‌ر،چرچێ ورذێ و گۆلالێ دیمه‌نش پۆشنابێشاره‌.هه‌رچن دلێ ئا جله‌ کۆنانه،فره‌ته‌ر شێوه‌ نه‌یجه‌ی،به‌ڵام چه‌مێ تێژ و زاقش پاسه‌ نیشان دێ که‌ ژیوایوی دڵ کێشش ویارابۆره‌؛په‌ی ئینه‌یه‌ که بێ تاقه‌ت نه‌بوو، ڕاچنم گێرت که‌ بارووشۆ ده‌نگێ تا جه‌ باره‌و ژیوایشه‌ره‌ باسم په‌ی که‌رۆ.ئاذ که‌ ئه‌جۆ یاوابێنه مه‌به‌ستیم،په‌رساش:گه‌ره‌کتا جه‌ باره‌و ژیوایمه‌ره‌ باست په‌ی که‌روو؟سه‌مه‌ره‌ن ،فره‌ سه‌مه‌ره‌ن،چێش که‌روو مێمانه‌نا و نمه‌تاوو ڕوه‌و ده‌و زه‌مین.ئه‌گه‌ر گه‌ره‌کم بۆ گرذ چێوێت په‌ی گێڵنوه‌وه‌،درێژو تاقه‌ت به‌را. تازه‌ واته‌یچێش هۆکه‌ی"حوصله"فره‌ش گه‌ره‌کا،چوون به‌ڕاسی بێ ئه‌ناز ژیوانا.به‌ڵام ئه‌گه‌ر دڵتا پوه‌وه‌ بۆ ته‌نیا هه‌یتێو جه‌ ژیوایم گێڵنوه‌وه‌ په‌یت.هه‌یتێو که‌ فره‌ته‌رمشۆوه‌ سه‌ر‌ئامای.تاقه‌توو ئێژنیه‌یت هه‌ن؟ فره‌ خاسا، به‌ڵام ئیسه‌ که‌ هه‌رمانه‌کێما یاوه‌ینه ئێگه‌:تووش ده‌سوور ده‌ دوێ ئاوجۆوێ بارا. ئاخر زانی ویر که‌رذه‌و ئۆسای جیاوازێوی چامنه‌شه‌ نیا چنی ئه‌ره‌که‌و‌ته‌ی دڵێ زه‌لکایه‌نه.کاکه‌ گیان!گاهه‌ز سه‌رئاماکه‌م په‌ی که‌سانێو پسه‌و تۆ و یان نوسه‌رێو دڵ کێش نه‌بۆ،به‌ڵام په‌ی وێم ئه‌رێ.هه‌رپێسه‌یچه‌، ئه‌گه‌ر ورذ بیه‌وه‌ وینی که‌ ژیانم فره‌ ساکار بیه‌ن،ساکار و ساکار"ساده‌". به‌هه‌رحاڵ،ڕوێو وه‌ڵێ شه‌وو جه‌ژنێ چنی ڕه‌فێقه‌که‌م ،یاشکا،دلێ کووچه‌و بازاره‌نه‌ گێڵای گێڵێنمێ،و جه‌ ژه‌نا که‌ چێوشا ئه‌سابێ داوا که‌رێنمێ تا ئیزنما دا پنه جه‌ هۆرگێرته‌ی چێوه‌کاشانه که ئه‌سه‌ی بێنێشا ده‌سباریشا"کمک"که‌رمێ. به‌ڵام ئاذێ بێ ئانه‌یه‌ که سه‌ره‌نجێوما دارا سواروو ئه‌سپ کێشی بێنێ و لوێنێ.وینی چن به‌ذشه‌شه‌مسێ بێنمێ؟ بێژگه‌م ئینه‌یه‌، سواڵه‌یچ که‌رێنمێ.هه‌رپاسه‌که‌ ئا ڕوه‌ دالێو زه‌ڕێوما گلێر که‌رذۆ،من ویس و نۆ کۆپکم بێ که دوێ کۆپکش فه‌نتاز"تقلبی" بێ که گه‌ورێو وه‌روو داذگاینه دابێنێش پنه و یاشکا که سواڵه‌نه‌ مه‌ژگێوی سه‌مه‌ره‌ش بێ،یانزه‌ رۆبلێ و حه‌فتاوشێش کۆپکش گڵێرکه‌رذه‌بێوه‌،ئی زه‌ڕه‌ چنی کیف و په‌ڕۆیو ژه‌نێوه‌ دابێش پنه که به واته‌و وێش وه‌شش ئامابێ چنه و دابێش پنه. مزانی که چێوی چێمنه فره‌ قۆمیۆ.وجار هه‌ن ئانزان وه‌روو ڕه‌حم و دڵسۆزی فره‌وه‌، ئاوه‌زش جه ده‌س مذۆ،چوون ئی لۆنه ده‌سباری و زه‌ڕده‌ی‌ یاگۆ ئانه‌یه‌ خاسی کێریۆ حه‌قوو یۆیه‌نه‌،ورذوهانش که‌رۆ.به‌هه‌رحاڵ، یاشکا لوه‌ینه په‌له‌ش بێ:ده‌ی کرژ به! بێ داواکاری ئاذێچ،ئێمه‌ خه‌ریک بێ ڕه‌مه‌ی ڕه‌مێنمێ. ئاذ ئه‌واڕه‌م دیه‌ی دیێ پیلاو پۆلاشه‌ره‌ وجه‌ باره‌و ئا ژه‌نێ قسێ که‌رێ و ڕه‌نگا پی جۆره‌ گه‌ره‌کش بێ ده‌س وه‌شی که‌رۆ جه‌ خاسیه‌کاش. به‌ڵام من به گرذوو هازیمۆ ڕه‌مه‌ی ڕه‌مێنێ و گه‌ره‌کم بێ هه‌رپۆسنه که بیه‌ن وێم یاونوو یاگێوی گه‌رم. ڤه‌رڤه‌ وارێ.هه‌وا فره‌ سه‌رذ بێ.دیمه‌نم بیا بێ و ملم که پسه‌و چێوێ وشکه بێ وته‌رسوو مڕیایش لوێ دلێراسه‌و پێڵه‌کام‌ شاریابێوه‌. ڤه‌رڤه‌ که نێشێره‌ سه‌روو ملیمۆ،ئه‌واڕوه‌م تاویێوه و به‌ذه‌نمۆ ئه‌ی چکیێره‌.هیچ کاما سیپاڵی زمسانیما نه‌بێ پۆره‌.یاشکا جه زه‌ڕێو که به‌ده‌سش ئارذه‌بێ وه‌شحاڵ بێ،ساتێوه‌نه‌ که من جه‌ سه‌رذا و به‌خێڵیێنه‌ له‌رزای له‌رزێنێ.زانی که من ئانزانێوی به‌ذشه‌مسه‌نا.چی شه‌مسا نمه‌یا سۆراخوو من،ته‌نیا که‌ڕه‌تێو سه‌ماوه‌رێوشا به‌خشانێ پنه که ئاوێوه‌ قۆڵ به قۆڵه‌ش بێ و گرذوو لاشه‌یم سۆته‌ره‌ و ده‌ ڕوێ وسنانێشا.... هه‌رپاسه‌ که ڕه‌مێنمێ، یاشکای وات:شه‌وێوه‌ فره‌ وه‌شه‌ما هه‌نه‌،خاس شاذی که‌رمێ! یان واچێ:کرایه‌کێچما مرذه‌یمێ.ماچمێ:پیره‌ژه‌نی قیزه‌ونه‌ بۆ گێره‌ ئینه‌یچه‌ به‌شوو تۆ! ڕاسی چنی مه‌شرووبی چه‌ینه‌نی؟پاسه‌ زانوو چنی گۆشتوو کۆڵۆکوو کۆنسێروێ،چێوێوی خراپ نه‌بۆ.به‌ڵام خواگیان، ئه‌سێح زانوو گرانا،پاسه‌ نیا،نرخوو کۆڵۆکی ئینا ده‌سته‌نه‌؟ جه‌ نرخوو گۆشتی خه‌به‌رم نه‌بێ. ڕاچنما گێرت په‌ی ئه‌سای بلمێ وره‌شگه‌یوی گه‌وره‌.چوون ئێژنیه‌بێما چی وره‌شگایا گرذ چێو تاوی بسانی.یاشکا ئه‌واڕه‌م بۆقه‌ نیێ خه‌ڵکیه‌ره‌،په‌ی وێش ڕا که‌رێوه‌ و یه‌کبین واچێ:تۆخوا گۆشته‌ کۆنسێروه‌کێتا نیشانه‌م ده‌یدێ!لته‌ گه‌وره‌ و عاله‌که‌ش گه‌ره‌کێمه‌نێ! یان واچێ:چێشتا هه‌ر نه‌قیزم مره‌یدێ ونه؟من ئانزانێ ماقوڵوو ئێگه‌یه‌ خاسته‌ر جه‌ شمه مێشناسوو،به‌ڵام مزانوو ئێگه‌ که‌س سانه‌روو ماقوڵی نیا. ئاذهه‌ر پاسه‌ قسێ که‌رێ:چێش بی؟ده‌سم که‌وته‌وه‌ باخه‌ڵێت؟ من چ تاوانێوم هه‌ن که ئێگه‌ ئێننه‌ قه‌ره‌بالقا "شلوغ". ‌چنه‌م ویه‌ره‌ گه‌ره‌کم بێ ده‌س که‌روو باخه‌ڵوو وێمه‌ره‌ که که‌وته‌وه‌ باخه‌ڵوو تۆ..... ئاخر چێشتانا؟چی پێسه‌ ڕه‌وتم که‌ردێ چنی؟مه‌گه‌ر من زه‌ڕ مه‌ذه‌و؟شمه چێشتا زیاذا چنه‌م؟... یاشکا پاسه‌ ڕه‌وتێوێش بێ که‌ ئه‌جێ گه‌ره‌کشا یه‌ره‌سه‌ذ قوتوێ کۆنسێروی بسانۆ.به‌هه‌رحاڵ ساتێو که شیشێوه‌ مره‌با،شیشێوه‌ ڕوه‌ن زه‌یتوون و دوێ به‌سێ کاڵباسی گه‌ورێما ئه‌سه‌ی، یاشکا به وه‌شحاڵیه‌وه‌ واتش:ئیسه‌ بێ خه‌مێ بیه‌یمێ.تاومێ خاس جه‌ژنه‌ گێرمێ! خاس شاذی که‌رمێ! واچینی یاشکا وه‌شیه‌نه‌ باڵێش به‌رئارذه‌یبێنێ.دیمه‌نش شاذیه‌نه‌ سوور و سنج بیه‌بێ،چه‌مش برێقه‌ دێنێوه‌. منیچ وه‌شحاڵ بێنێ.مزانی بڕێو جارا گۆشت وارذه‌ی په‌ی ئه‌رامه‌ننا له‌زه‌تی و شاذی مه‌رگا. به‌ڵێ کاکه‌ گیان!که‌وتیمێ ڕا په‌ی یانه‌ی.ڤه‌رڤه‌و واگژه‌ په‌شتیۆ فه‌لاقه‌ما دێره‌. یانێو که چانه ژیوێنمێ جه پیره‌ژه‌نێوه‌ به باوه‌ره‌ گێرته‌بێما کرایه‌.ئیلاو ئه‌ولاو یانه‌که‌ی چۆڵ و هۆڵ بێ.سه‌عات شێشوولا که‌س چانه ئامه‌ و شۆ نه‌که‌رێ و ئه‌گه‌ر ناچار پی هه‌رمانێ بیه‌یا به‌ دزیۆ ویه‌رێ. عانوو ڕه‌مه‌ینه تووشوو پیه‌یوی مه‌سی ئامه‌یمێ.ئاذ فره‌ مه‌س بێ و ئه‌واڕه‌م ڕه‌تێ پێکێ.یاشکا تا چه‌مش که‌وت ئا پیایه‌ یه‌واشێو واتش: بذیه‌ په‌ی پاڵتاوه‌که‌یش! مزانی چی وه‌شحاڵ بێ؟ چوون پاڵتاوه‌که‌ قۆڵۆپچه‌ش نه‌بێ و ڕه‌حه‌ت تاوینی ڤه‌ژیش چنه.به‌هه‌رحاڵ شۆنوو پیا نه‌شناسه‌که‌یره‌ ده‌سما که‌رذ ڕه‌مای و چوون یاوه‌یمێش پنه زاناما که ئاذ پیه‌وی زلام و‌ به‌هێزا.ئاذ خه‌ریک بێ وه‌روو وێشه‌ره‌ قسێ که‌رێ و ئینه فره‌ته‌ر سه‌ره‌نجوو ئێمه‌ش هۆرنیا. ناکانه پیا نه‌شناسه‌که‌ مرذا و پاسه‌ سه‌ره‌ش گێڵناوه‌ که مه‌حه‌ڵ بێ لووته‌ش ماڵیۆ دیمه‌نمه‌ره‌. پیاکه هه‌رپاسه‌که قاچێش وه‌ڵه‌ی که‌رذێبێنێوه‌ به‌ ده‌نگی به‌رز نه‌ڕا: که‌سی گه‌ره‌ک نیه‌نا! ئی بنجکه"جمله" پسه‌و گرۆڵیێ ده‌مشه‌نه‌ پڕتافیا و ئێمه‌ش ته‌رسنه‌یمێ. هه‌رپاسه‌ که پیه‌وی ژیرو وریا بێ، گۆرج یاوانه ئاژه‌یما"وضع" و ساتێو که وڕ بیه‌بێنه دیمه‌نیما واتش:شمه‌ کێندێ؟چه‌تێندێ؟ یاشکا به‌ نتمۆ"فروتنی" داواچش داوه‌:سواڵ که‌رێنمێ! ئاذی وات: ده‌ی فینناره‌وه‌،ئیسه‌ که هیچ له‌یوێم نیا بلوو، چنی شمه سواڵ که‌را مه‌و!ئه‌گه‌ر به‌ردم چنی وێتا مه‌شرووبتا مذه‌و،نانه‌تا مذه‌و.به‌یدێ عالێ بیدێ چنیم،په‌نام ده‌یدێ! یاشکا یه‌واشێو واتش:خۆڵکه‌ش که‌ره‌! ده‌نگوو پیا نه‌شناسه‌که‌ینه،زایێڵه‌و"انعکاس"نه‌سه‌ق و مه‌راره‌توو ئانزانی ئه‌رامه‌ننه‌ به‌ ته‌رزیوی ڕووپێویا"واضح"ئێژنه‌ویێ.ئاخر زانی ماوێو قسه‌که‌روو ته‌ماشاخانه‌ی بیه‌نا و کرژ یاووه‌نه داماگی و ئه‌رامه‌ننی ئانزانا. به‌ڵێ،من ئاڕوه خۆڵکه‌و‌ ئانزانێویم که‌رذ که ئه‌وپه‌ڕوو داماگی و هه‌ژاری بێ و ئاذ هه‌ر پاسه‌ که ئاخێ هۆر کێشێ داوه‌تش قه‌بووڵ که‌رذا:مه‌و!به‌ڵێ سواڵ که‌را،من خۆڵکه‌تا قه‌بووڵ که‌روو! ساتێو که که‌وتیمێ ڕا ناوامه واتش: مزاندێ من کێنا؟خاس،وێم مشناسنوو پنه‌تا.من ئارۆ جه‌ شه‌وو جه‌ژنێ به‌رشیه‌نا.چه‌م پێک"درواقع" وێمم ڕزگار که‌رذه‌ن!و یرکهای دیمتری،گرنجایۆف....ویندێ گرذوو ئی ئانزانا مشناسوو،به‌ڵێ من پێسه‌ ئانزانێوه‌نا!ژه‌نیم هه‌نه‌،دوێ کۆڕم هه‌نێ،سه‌رته‌ر چنیشا هه‌روێم گه‌ره‌کێنێ.به‌ گۆڵێ یانه‌شا ڕازنانه‌وه‌ په‌یم،پۆخته‌ کۆمێده‌نه‌ کتێبێشا هۆرچنیه‌نا، یانێوی گه‌رم و ڕه‌حه‌تم هه‌ن.هه‌رچێو که واچدێ هه‌نم.ڕاسی خاسته‌ر نه‌بێ گرذوو ئی چێوا هینوو شمه بیه‌یا؟!به‌ زه‌روو ئی چێوا تاوێندێ مه‌شرووب وه‌ردێ،هه‌رچێو که دڵتا پوه‌وه‌ بۆ وه‌ردێ.به‌ڵام شمه دوێ هه‌شێندێ، که خۆڕیێندێ.ئیسه‌ منیچ مه‌سه‌نا به‌ڵام ئه‌ڵکۆڵی نیه‌نا،خۆڕیچ نیه‌نا. په‌ی ئینه‌یه‌ مه‌سم که‌رذه‌ن که خه‌ریکا خنیکیه‌و.هه‌میشه‌ ڕۆ چه‌ژنێ ئی حاڵه‌تمه‌ هه‌ن. ئه‌وه‌جه‌م به هه‌واو به‌ریا،هه‌وای ئازاذ، یاوودێنه مه‌به‌ستیم؟چڵی"درد"گه‌وره‌و من ئینه‌نه‌،ئێشوو من هه‌ر ئینه‌نه‌. به حه‌زی فره‌وه‌ گۆشم شل که‌رذه‌ بێ په‌ی قسه‌کاش و ئاذ یه‌کبین قسێ که‌رێ: هه‌میشه‌ ساتێو که‌،ئانزانی به ڕواڵه‌ت ساق و سه‌لیم وینوو، وه‌روو وێمه‌ره‌ ماچوو:ئانزانێو سیا به‌ختا.ژیوای هینوو ئانزانانی ساق نیا،به‌ڵکووم هینوو ئانزانانی بێ هێز و گۆلاله‌یا.شمه ماساوی گه‌وره‌،پسه‌و نه‌هه‌نگێو وزدێدێشه‌نه‌ دلێ زه‌لکاوێو،خێرا خنیکیۆ.ساتێویچه‌نه‌ که قوورواقی،چه‌مچه‌قۆڵێ و ئه‌و گیانه‌وه‌ره‌ قیزه‌ونێ،نمه‌تاوا دلێ ئاوێ پۆختێ و زه‌راڵه‌ درێژی‌ دا به ژیوایشا. به‌ڵێ ئی ئانزانه پا ده‌نگه‌ قایم و ئه‌ره‌ یاواشه‌ فره‌ دڵ کێش بیه‌بێ په‌یم. به‌هه‌رحاڵ،پیا نه‌شناسه‌که‌ما برذۆ یانه مه‌به‌ست جه‌ یانه‌ی،چێرزه‌مینێو بێ که چانه ژیوێنمێ.ساحیب یانه‌که‌ما فره‌ ته‌رسه‌ی بێ.ئه‌جێش ئاذما ئارذه‌ن تا ڕووته‌ش که‌رمێوه‌.به‌هه‌رجۆرێو بێ ناسما بلۆ پازگا و حاڵیه‌ما که‌رذه‌ که ئانزانێ لاواز و هه‌ژار پسه‌و ئێمه‌ نمیارا پا ئانزانه‌ گه‌وره‌ و به هێزیه‌ و ئاذ پا مشته‌کۆڵه‌ ئاسنیناشه‌ و پا وارشه‌"هیکل"زلامه‌یشه‌ ڕه‌حه‌ت تاڤۆ ورذوهانێما که‌رۆ. ساتێو که ڕازیه‌ بیه‌،کیاسه‌ما مه‌شرووب خانه‌ و بیه‌یمێوه‌ وێما ته‌نیه‌ی. وه‌ره‌وه‌ره‌ی وێش ئاماذه‌ که‌رێ که‌ ساڵه‌ تازێ بۆوه‌.پیا نه‌شناسه‌که‌ پاڵتاوه‌که‌ش وه‌ته‌بێ. ئاذ بێ په‌سه‌ک،وته‌نیا به‌ گیجیێو وه‌راوه‌رماوه‌ نیشته‌ره‌ و هه‌ر بۆڵێش ئه‌ینێ:ئه‌جۆم هه‌روێتا چه‌تێندێ.بێوێ وێتا مه‌رذه‌یدێ سواڵ که‌ریه‌ره‌،هه‌رزه‌کارێ پسه‌و شمه نمه‌تاوا سواڵه‌ که‌را.چه‌م وسه‌یتا پیس و بێ نتمانه‌ن. به‌ڵام جیاوازوێش نیا په‌ی من!چێوێو که یاواناشه‌نه‌ ئینه‌نه‌ که جه ژیوه‌ینه ته‌رێقێ نمه‌بیدێوه‌،و ئینه فره‌ تانپه‌ڕا!ساتێوه‌نه که من ته‌رێق بوه‌وه‌!بۆنه‌و ئینه‌ینه‌ که یانه‌نه‌ به‌رشیه‌نا.... ئازیزا،داخۆم تائیسه‌ زانابۆتا نه‌وه‌شی چێمنه‌یچه‌ هه‌ن؟ فرێ هه‌نێ که ئه‌راگێڵوو هۆرپڕای ویتایێنێ،چه‌م پێک نه‌وه‌شیشا ئینه‌نه‌.منیچ ئی نه‌وه‌شیمه هه‌ن. یانه‌و منه‌نه‌، گرذ چێو ڕێکوپێک و سپۆرکا "کامل".گرذچێو ئینا یاگۆ وێشه‌نه‌. وه‌روو ئینه‌ینه‌ که قینیمه‌نێ‌ چنه. ژیوای به‌ینوو ئی ئامرازا که پاک وپۆخته‌ هۆرچنیه‌‌ینێ و یان دیوارۆ ئالۆچیه‌ینێره‌،بێ تام و نکوونیا. گرذچێو یاگۆ وێشه‌نه‌ لێکیانه‌ره‌.وێنێ،سه‌نه‌ڵیێ،مۆبلێ... ته‌نانه‌ت بمه‌له‌رزه‌یچ نمه‌تاڤۆ ڕێکوپێکی ئی چێوا شێونۆ پێوه‌ره‌. ئی ڕێک و پێکیه‌ دلێ دڵ وگیانوو ژه‌نه‌کێمه‌نه‌ ڕێخێش پێکه‌ینێ. ده‌روونوو گرذیمانه ڕێخێش پێکه‌ینێ. هه‌رپاسه‌ ته‌نانه‌ت وێچێم،نمه‌تاوو بێ ئاذیشا بژیوو.میاودێنه‌ چێش ماچوو؟ کاتانه که‌رذه‌ی به ئامرازا ئانزانی که‌رۆ پسه‌و ئامرازی‌. ساتێو ئانزان دڵ به‌سه‌ییش په‌یذا که‌رذ به چێوا، پارێزنۆشا. حه‌زکه‌رۆ چنیشا ته‌نیا بۆ.تف په‌ی ئی ئامرازا،تف په‌ی ئی ژیانیه‌.ئی چێوێ و ئامرازێ ئێننه‌ فرێ با که یاگۆ گرذ چێوی داگیر که‌را. یاگۆ هه‌وای گێرا. پاسه‌ که نمه‌تاوی هه‌ناسه‌یچ کێشی.ویرێ که‌ردێوه‌،ئیسه‌ گرذ جلێ جه‌ژنێشا که‌رذێنێنه،مه‌لێشا که‌رذێنه، سمێڵ وڕیششا تاشته‌ن، ئێننه‌ وێشا ساف و سۆڵ که‌رذه‌ن که برێقه‌ مذاوه‌.ئانزان چی گرذبرێقه‌یه‌ و چی گرذ برووکه‌یه‌ زێڵه‌ شێوه‌ش مه‌ی.ئاذێ لاقرتیم پنه که‌را...به‌ڵێ لاقرتیم پنه‌که‌را.ئی ئامرازێ شه‌یذێنێ که من ئه‌وه‌ڵۆ هیچم نه‌بیه‌ن.جه‌ ماڵوو دنیه‌ی ته‌نیا که‌تێو و سه‌نه‌ڵیێو و لته‌ وێنێوم بیه‌ن، به‌ڵام ئیسه‌ ژماره‌و مۆبله‌کام،ئه‌وه‌ده‌را"بی حد واندازه‌". بیه‌و ئی مۆبلا پاسه‌ یاونۆ،که ئانزان سه‌رشاوه‌ نیشۆره‌. ئانزانانێو که بێژا پی مۆبلا.... په‌ی ئینه‌ینه‌ که ڕۆبه ڕۆ مێمانه‌کێم فرێ با. ئاذ مه‌شرووبه‌که‌و وێش تا ئاخر هۆرقۆڕنا و پێسه‌ درێژه‌ش دا به قسه‌کاش: مێمانه‌کێم گرذ گه‌ورێ و ماقووڵێنێ. گاوێ به باوه‌رێنێ که به عاڵفی شیرینوو وێژه‌و"ادبیات"رووسیه‌ی له‌وه‌ڕیا و زلێ با. ساتێو که ئینانا چنیشا،بێ له‌ش گنوو،دڵم ته‌میۆره‌.خنیکیه‌و.قسێشا فره‌ته‌ر خنیکنام.مزانوو جه‌ باره‌و چێشیه‌ره‌ قسێ که‌را، زانوو که گه‌ره‌کشانا وێشا وریا و تانپه‌ڕ دا چه‌مۆ.به‌ڵام هازوو هیچ هه‌رمانیویشا نیا.ئاخ ئاخ!ئی ئانزانێ پاسه‌ ده‌روونه‌نه‌ شیۆیه‌‌ینێره‌ که ئانزان جه‌ چه‌م پنه که‌وته‌یشا زاڵه‌گه‌وا بۆ. به‌ڵام ڕواڵه‌تی ئانزانێ وه‌شحاڵێ و به‌نتمێنێ.قسێشا پسه‌و ته‌وه‌نی هێقم و کاریا. پاسه‌ که پی قسا،تاوا ئانزانی ورذوهان که‌را.....ساتێو که مه‌یا په‌ی یانه‌یم،ئه‌ره‌ویا که‌روو ده‌ورم خشتێشا هۆرچنیه‌ینێ!و به‌ینوو خشته‌کانه ئێسپه‌رذه‌م که‌را. ئاخ چن قینیمه‌نێ‌ چنه‌شا،چن قینیمه‌نه‌.داخی گرانم نمه‌تاوو وه‌رشا گیروو ونازوو به‌یا په‌ی یانه‌یم. په‌ی ئینه‌ینه‌ که ته‌رسووشا چنه. هیچ کامشا،وه‌روومن،که‌ ئانزانێوی قه‌پۆسنه‌نا، نمه‌یا یانه‌م.ئاذێ وه‌روو ئینه‌یه‌ مه‌یا په‌ی یانه‌یم که سه‌روو مۆبلاوه‌ نیشاره‌.داخه‌کێم مه‌شۆ نمه‌تاوو ئی مۆبلا فڕه‌ ده‌و،چوون ژه‌نه‌کێم فره‌ گه‌ره‌کێشه‌نێ.ڕاسه‌تا گه‌ره‌که‌نه‌ وه‌روو ئی مۆبلانه که زینێنه!بۆخوا ڕاس ماچوو!ئیسه‌ ئتر منیچ بیه‌نا پسه‌و مۆبله‌کا! منیچ بیه‌نا ئامرازێو!‌ ئاذ پاڵێش داوه‌ دیواری و به‌ ده‌نگێوی به‌رز قله‌ش دا چنه.یاشکا که به قسه‌کاش شاذی مه‌رگ بیه‌بێ واتش: چی مۆبله‌کا ورذوهان نمه‌که‌ری سه‌ره‌و ژه‌نه‌کێته‌ره‌‌؟ داواچش داوه‌:چه‌نی؟ یاشکای وات:هه‌رمانه‌کێ یه‌کسه‌ره‌ که‌ری، ته‌مامنیش،هه‌رچێو قۆمیا!قۆمیا! پیانه‌شناسه‌که‌ به‌تووڕه‌یوه‌ واتش:بێ ئاوه‌زی نه‌فام! ئاذ ساتێو که سه‌ره‌ش ڤسه‌بێره‌ واتش:دڵم ته‌میاره‌!دڵم مڕیا!ئاخ چن من ته‌نیانا!چن ته‌نیانا!سه‌وای جه‌ژنه‌نه‌،ساتێوه‌نه‌ که من نمه‌تاوو بلوه‌وه‌ په‌ی یانه‌و وێم،به‌ڵێ ئه‌سێح چامنه‌نه‌. یاشکای وات:لاماوه‌ نیشه‌،مێمانما به‌! پیاکه‌ی وات:شمه کێندێ؟ ساتێو که چه‌مش وست په‌ی هۆذه‌که‌یما که شپێرز بێ و په‌ر بێ شه‌خه‌ڵ ومه‌خه‌ڵ و ئامرازی ڕه‌حه‌تیش نه‌ئێستۆ واتش: ئینه که یانه نیا،زه‌لکان،به‌ڵام مزاندێ زاوڵاو ئانزانی که مشۆم چێش که‌رمێ؟به‌یدێ سه‌وای یه‌ره‌یی بلمێ مه‌شرووب خانه، خاس مه‌س که‌رمێ و وینمێ ژیوای چن له‌زه‌تیا،ئاماذێندێ؟بۆخوا ڕاس ماچوو،ئیسه‌ مشۆم نه‌بی ویروو ژه‌نیه‌نه‌!ئینه‌یچتا ویر نه‌شۆوه‌ که شمه دوێ خوڕیێ و دزێندێ. واتم:مزانوو نکوونی هه‌رمانه‌کێ ئینا چکۆ! په‌رساش:تۆ؟تۆکینی؟ واتم:منیچ زه‌مانێو ئانزانێوی ماقووڵ بێنێ.تاموو ژیانی ڕه‌حه‌تیم چه‌شته‌ن.به‌ڵام ژیان مه‌راره‌تش دانێ و جه وێش دوورش وسه‌ناوه‌.ئیسه‌ ده‌روونۆ تێک شیه‌نا و پسه‌و تۆ مات و مه‌لووله‌نا.په‌ی ئینه‌ینه که په‌نام ئارذێنه مه‌شرووبی، وه‌یلان و خووڕی بیه‌نا. به‌ڵام ئیسه‌ هۆسارم ئینا ده‌سوو تۆنه! پیه‌ی نه‌شناس بێ ئانه‌یه‌ قسێوه‌ که‌رۆ،به‌ زه‌رذه‌ خوه‌ وڕ بیه‌نه‌ دیمه‌نیم وبه حه‌زۆ دیه‌م دیێ په‌ی.کت وپڕ یاوانێنه که لووته‌ش چرچێش چنه‌نێ و چیروو سمێڵه‌ زله‌کاشۆ لچێش له‌رزای له‌رزێ،به لاقرتیه‌وه‌ دیه‌ی دیێم په‌ی وواتش:هه‌ر ئینه؟ واتم:به‌ڵێ،هه‌ر ئینه.ساتێوه‌نه‌ که هه‌مته‌ر وڕ بیه‌نه دیمه‌نیم په‌رساش:ده‌ی سا تۆ کینی؟ واتم:ئانزانه‌نا، هه‌رکه‌سێو که هه‌نا،هه‌ر تووته‌ بابێو که‌ هه‌نا،ئانزانه‌نا،ئانزان میاوویه‌نه؟ من که وێم هۆرده‌سوو باسه‌که‌ی زانێنێ ئه‌ره‌ویام که‌رذ که هیچ چێو نمه‌زانوو به‌ڵام ئاذ بێ ئانه‌یه‌ که چه‌مش هۆرگێرۆ چنه‌م واتش:ها!قسێ فیلسووفانێ. یاشکا به سارایوه‌"ساده‌لوح" واتش:ئێمه ئانزانێ ئه‌نه‌ یاوه‌ینمێ،ویرما پسه‌و تۆن.درووسا که ئانزانێ سارای مرذه‌یمێ چه‌مۆ،به‌ڵام ئاوه‌زما هه‌ن، میاوومێنه،ئێمه‌یچ پسه‌و تۆ قینیمانه مۆبلا، قینیمانه جه لووکس و ئاڵتوونی.ئاخر مۆبل ده‌رذه‌و چێشی وه‌رۆ؟به‌یدێ تا بیمێ ده‌سه‌ بره‌یێ،یاوومێنه‌ هه‌نترینی. ئاذ که واچینی نۆزهوور وێش ئێسته‌بێشۆ‌ واتش:من؟ یاشکای وات:به‌ڵێ تۆ،ئێمه سه‌وای لا ڕازوو ژیانیما گێڵنمێوه‌ په‌یت تا....... پیا نه‌شناسه‌که‌ ناکانه یاگۆ وێشه‌نه‌ هۆرستۆ و به مل هۆڕیۆ واتش: ده‌ی پاڵتاوه‌که‌م په‌ی باردێ! ئاذ هه‌ر پاسه‌ که مرذابێره‌،به ده‌نگی به‌رز یه‌کبین قسێ که‌رێ..... په‌رسام: په‌ی کۆگه‌ی ملی؟ داواچش دا:کۆگه؟ ئاذ ساتێوه‌نه که سه‌رذایه‌نه‌ له‌رزای له‌رزێ،و به چه‌مێ زاقش دیه‌ی دیێ په‌یم واتش: یانه‌و وێم. دیانش په‌ی،به‌ڵام هیچم نه‌وات. ئاذی وات:گیانه‌وه‌رێ ڕێکوو زاتوو وێش،وه‌ڵنیوسشا"سرنوشت"هه‌ن.هه‌رچی هه‌وڵ که‌را،جۆتلێ شانا یێوه‌شا نمه‌بۆ به دوێ،هاها! پیه‌ی نه‌شناس هه‌ر پی بنجکه‌وه‌ "جمله"ئاسیمێش جێگا.به‌ڵام من هێشتار ده‌نگش ئێژنه‌وێنێ که چڕا‌ی چڕێ ئه‌سپ کێشی. هام ده‌نگه‌که‌م،بێ ده‌نگ بی و گۆلمیت گۆڵمیت ده‌سش که‌رذه‌ بێ ئاوجۆ وارذه‌ی. ساتێوکه ئاوجۆکه‌ش د‌مه‌ینه‌ ئارذ‌،به‌ کێلکه‌ش ماڵه‌ی ماڵێ سه‌روو که‌ته‌که‌ی و ده‌سش که‌رذ فیکه‌ که‌رذه‌ی. په‌رسام: شۆنیه‌ره‌ چێش بی؟ داواچش دا:شۆنیه‌ره‌؟ هیچ،گه‌ره‌کتا چێش بۆ؟ واتم:ئه‌ی جه‌ژنه‌کێتا چێش پنه‌که‌رذه‌؟ واتش:ها!به‌ڵێ نه‌واتم که‌ ئا پیا زه‌ڕش دا یاشکای.به‌ڵێ ئێمه ئا ڕوه‌ ویس و شێش مناتێ و چن کۆپکێ جه‌ژنانه‌ما گێرت....

نویسته‌ی:ماکسیم گۆرکی(1868-1936)

هۆرگێڵن:بێهرووز حاجی

ئالفۆنس گیان فه‌رماوه‌....

aragel — Tue, 31 Jul 2012 19:17:00 GMT

ئالفۆنس گیان فه‌رماوه‌....

دێده‌ ویلسونه نۆزهوور خه‌ریکه‌ بێ ئارگاگێنه نان‌ زه‌نجه‌فێڵه‌کێ به‌ربارۆ که‌ ئێژنیش جانی، به‌رۆ چنی یۆی قسێ که‌رۆ. چڕا:جانی،دێرت پنه بۆ،بۆرێ نانه‌کێت وه‌ره‌. جانی واتش:ئه‌ذا ئیسه‌ مه‌و.فه‌رماوه‌ ئالفۆنس گیان. ده‌نگێو ته‌ر واتش:تۆ فه‌رماوه‌ ئالفۆنس گیان. جانی واتش:نا،تۆ فه‌رماوه ئالفۆنس گیان. دێده‌ ویلسۆنه‌ به‌ره‌که‌ش که‌رذۆ.واتش:جانی،هه‌ر ئیسه‌ بۆ چوه‌ر و نانه‌کێت وه‌ره‌.شۆنوو نانه‌کێته‌ره‌ متاوی گه‌مه‌ که‌ری. جانی، ئه‌سه‌م ئه‌سه‌م شۆنیشه‌ره‌ ئاما چوه‌ر و واتش:ئه‌ذا،بویدم په‌ی نان وارذه‌ی ئاذه‌ن چوه‌ر. بوید؟دێده‌ ویلسونه دالێو لوا فێکرێنه،"پاسه‌ بزانوو تا ئیسه‌ بویدم نه‌ذیه‌ن، ،ئیسه‌ داوه‌تێت که‌رذه‌ن باره‌ش چوه‌ر.چاشتی ئاماذێنه. جانی قێرناش:بوید!بویدهۆ،بۆ چوه‌ر. خه‌ریکا مه‌ی مه‌و،وه‌ڵێنه مشۆم ئینه‌یه‌ هاڵی که‌روو. "ده‌ی کرژ به ئننا ئه‌ذام تووڕێ بۆ." دێده‌ ویلسۆنه واتش:ئی قسێ نه‌ په‌ی ڕه‌فێقه‌که‌ت و نه په‌ی ئه‌ذایت،هیچ ژیرانه نیا. بوید بۆ نیشه‌ره‌. ساتێو گێڵاوه‌ تا یاگۆ بویدی نیشانه دۆ پنه‌ش،دیش که کۆڕه‌که سیاوپۆسا، گۆلاله‌ته‌ر جه‌ جانیا،به‌ڵام هه‌م ته‌مه‌نێنێ، مشته‌ش په‌ره‌ بێ جه‌ وێرذه‌ چێوێ چه‌رمێ. په‌رساش:جانی،ئینیشا بنیه‌و کۆگه‌؟ دێده‌ ویلسۆنه ڕوه‌ش که‌رذه‌نه‌ جانی و واتش: بویدێت به چێ هه‌رمانێوه‌ ناچارۆ که‌رذه‌ن؟ئی چێوێ چێشێنه؟ جانی به نه‌رم و نیان واتش:ژاپۆنیێنێ که‌ مه‌رذێنێ،منیه‌یمێشاره‌ سه‌روو زه‌مینی وبه تانکه منیشمێ ملشاره‌. بوید واتش: وه‌شه‌نی دێده‌ ویلسۆن؟ تۆ چه‌ینه‌نی بوید؟مشۆم نازی جانی ناچارت که‌رۆ که‌ گرذوو ئی چێوا هۆر گیری،ئیسه‌ بنیشدێره‌و نیمه‌روانه‌که‌تا وه‌ردێ.جانی وات: چی مشۆم ئاذ ئی چێوا هۆر نه‌گێرۆ،ئه‌ذا؟ئی چێوێ هینوو وێشه‌نێ.پاڵوو یانه‌یشانه ئێستێ نێماوه‌. دێده‌ ویلسۆنه واتش:نانه‌کێت وه‌ره‌ جانی. "خاس" ده‌وری هێڵه‌وته‌ماته‌که‌ش دابه بویدی و واتش:فه‌رماوه‌ ئالفۆنس گیان. بویدی وات: تۆ ئه‌وه‌ڵ فه‌رماوه‌ ئالفۆنس گیان. جانی واتش:شۆنوو تۆره‌ ئالفۆنس گیان.هه‌روێ قله‌ شاداچنه.دێده‌ ویلسۆنه واتش:بوید ئاوراتا؟ داواچش داوه‌:به‌ڵێ،دێدێ گیان. ژه‌نه‌کێ وات:ده‌ی سا نمازه‌ جانی مدێرنۆت.هه‌میشه‌ ئاذ ساتوو نان وارذه‌ینه ورنگه‌ ورنگی فره‌ که‌رۆ،تۆ هاگات لا چاشته‌کێته‌وه‌ بۆ.هه‌رچن تا گه‌ره‌کا هۆرگێردێ چاشته‌کێ فرێنه و وه‌سێتا که‌رۆ. بویدی وات:ده‌ست وه‌ش بۆ دێدێ گیان. جانی وات:ها ئالفۆنس،ونیمه‌و چاشته‌کێش که‌رذه‌ره‌ په‌ی بویدی،بوید دیه‌ی دیێ په‌ی دێده‌ ویلسۆنێ که کاسه‌و ته‌ماته‌ سووره‌وه‌ کریه‌کێش نیا پاڵوو ده‌وریۆ ئاذی.جانی وات:بوید ته‌ماتێ نموه‌رۆ.پاسه‌ نیا بوید؟ ژه‌نه‌کێ وات: تۆ ته‌ماتێ نموه‌ری جان،و چوون وێت ته‌ماتێت گه‌ره‌کێ نیه‌نێ، ئی ده‌سووریه‌ مه‌رذه‌ بویدی.بوید گرذ چێو وه‌رۆ. جانی ساتێو که هه‌وکه‌ که‌رێ په‌ی هێڵه‌کا واتش:به‌ڵام ئاذ که نموه‌رۆ. ژه‌نه‌کێ وات: بوید گه‌ره‌کشا زل بۆ و بۆ پسه‌و پیه‌وی گه‌وره‌ و به‌ هێز که تاڤۆ خاس هه‌رمانێ که‌رۆ. دێده‌ ویلسۆنه درێژه‌ش دا:‌ئه‌ستیکه‌"شرط"که‌روو تاته‌و بویدی ته‌ماتێ سووره‌وه‌کریه‌ی وه‌رۆ. بویدی وات:تاته‌م هرچێوێش گه‌ره‌ک بۆ وه‌رۆ. جانی وات:تاته‌و منیچ هه‌ر پاسه‌.بڕێو جارا گرذچێو وه‌رۆ،هه‌رچن پیه‌یوی گۆلاله‌ن، مه‌شێوه‌یچ دڵوه‌ر نمه‌که‌رۆ. بویدی وات:تاته‌و منیچ گۆلاله‌ن. دێده‌ ویلسۆنێ وات:به‌ڵام ئه‌ستیکه‌ که‌روو پیه‌وی به‌ هێزا. و به‌ دووشکه‌ په‌رساش:ئاذ.... هه‌رمانه که‌رۆ؟ جانی وات:مالووما،تاته‌و بویدی هه‌رمانگانه هه‌رمانه که‌رۆ. دێده‌ ویلسۆنه واتش:ها دیت؟ ئاذ مشۆم به‌ هێز بۆ که تاڤۆ هه‌رمانگانه چێوێ هۆرگێرۆ . جانی وات:تاته‌و بویدی ناچار نیا،چوون که سه‌رپرێسوو کاریگه‌ران. دێده‌ ویلسۆنه ئه‌ره‌ویای مێڕیایی که‌رێ واتش:بوید ئه‌ذات چێش که‌رۆ؟ بوید به سه‌مه‌ره‌ واتش:ئه‌ذام،ئاذه‌،چه‌مداریۆ زاوڵا که‌رۆ. ژه‌نه‌کێ وات:ئێ،سا هه‌رمانه نمه‌که‌رۆ؟ جانی که‌ ده‌مش ئاخێنیابێ جه‌ هێڵه‌ی واتش:مشۆم چی کار که‌رۆ؟تۆ که هه‌رمانه نمه‌که‌ری. ژه‌نه‌کێ وات: بوید، به ڕاسی ته‌ماتێ سووره‌وه‌کریه‌یت گه‌ره‌کێ نیه‌نێ؟ بویدی وات:نا،ده‌ست وه‌ش بۆ دێدێ گیان. جانی وات:نا، ده‌ست وه‌ش بۆ دێدێ گیان،نا، ده‌ست وه‌ش بۆ دێدێ گیان،نا، ده‌ست وه‌ش بۆ دێدێ گیان،واڵێ بویدی کار که‌رۆ،ئاذه‌ گه‌ره‌کشا بۆ به فێرکه‌ره‌. ژه‌نه‌کێ وات: ئی ڕاوینێ فره‌ خاسا که واله‌کێت هه‌نه‌ش بوید. شۆنیه‌ره‌ واتش:پاسه‌ بزانوو گرذێتا شانازیش پنه که‌ردێ. بویدی وات:ئه‌جۆم پاسه‌نه‌. دێده‌ ویلسۆنێ وات:ئه‌ی ئه‌و واڵه‌و براڵه‌کێت؟پاسه‌ بزانوو گرذێتا گه‌ره‌کتانا بیدێ به ئانزانێ ویر به‌رزێ. بویدی وات:ته‌نیا من و جینێنمێ. هێشتار نمه‌زانوو ساتێو که گه‌وره‌ بیا گه‌ره‌کما بوو چێکاره‌. جانی وات:من و بوید،گه‌ره‌کمانا بیمێ رامنه‌روو تانکا. ساتێو که پڕپۆڵوو جانی پسه‌و تانکی ده‌س که‌رۆ هه‌وکه‌"حمله‌" که‌رذه‌ی،کرژ دێده‌ ویلسۆنه ئیلاوئه‌ولاو لێوانه‌ شۆته‌که‌و بویدیش گێرت. بویدی وات:بذیه‌ جانی،ئێگه‌ سه‌نگه‌ره‌نه، ئیسه‌ چێوێت په‌ی شانوو. دێده‌ ویلسۆنه گۆرج که به‌رئاما جه‌ ژیری فره‌یا،نانه زه‌نجه‌ فێڵیه‌که‌ش هۆرگێرت و به ورذی فره‌وه‌ نیاش به‌ینوو سه‌نگه‌ره‌کێ و تانگه‌کێ. ژه‌نه‌کێ وات:ئیسه‌ تا تاوی وه‌ره‌ بوید.گه‌ره‌کما وینوو که که‌لاوه‌ تێر بینه. جانی وات:بوید فره‌ وه‌رۆ، به‌ڵام نه ئێننه‌و من،من چاذی زلته‌ره‌نا. بویدی وات:فره‌ زل نیه‌نی،ڕه‌مه‌ینه گنوه‌وه‌ وه‌ڵێت. دێده‌ ویلسۆنه هه‌ناسێوی قووڵێش هۆرکێشا و واتش: بوید.هه‌روێ کۆڕه‌کێ گێڵه‌یوه‌:بوید، جانی چن ده‌سێ سیپاڵێش هه‌نێ که گۆلالێنێ په‌یش و کۆتێوی زمسانی.هه‌ڵبه‌ت تازێ نیه‌نێ،به‌ڵام هه‌ڵای تاوی که‌ڵکشا هۆرگیری چنه.ئه‌ذات تاڤۆ پنه‌شا ،په‌ی گرذێتا فره‌و چێوا ورازۆ ومن فره‌ وه‌شحاڵه‌ بوو که ئی جلاته‌ ده‌و پنه.جله‌کا دلێ تۆشه‌به‌رێوه‌نه پێچوه‌وه‌‌ وشۆنیه‌ره‌ تۆ و جانی خێرا به‌ردێشا په‌ی ئه‌ذه‌یت.... ده‌نگوو ژه‌نه‌کێ ساتێو که حاڵه‌تی سه‌مه‌ره‌و بویدیش دی له‌رزا.بویدی وات: "به‌ڵام جلێ فرێم هه‌نێ. ده‌ست وه‌ش بۆ،خیاڵ نمه‌که‌روو ئه‌ذام زانۆ چێوێ ورازۆ،به‌ هه‌ر حاڵ هه‌ر چێوما که په‌نه‌وازا وێما مسانمێ،ده‌ست وه‌ش بۆ. جانی وات: ئه‌ذا ئێمه وه‌ختما نیا چێوی کۆنێ به‌رمێ پیلاوپۆلاره‌،ئارۆ قه‌رارا چنی زاوله‌کا که‌ی که‌رمێ. ژه‌نه‌کێ نانه‌ زه‌نجه‌فێڵه‌کێش ساتێو که بوید گه‌ره‌کش بێ لێتێو ته‌ر وه‌رۆ سه‌روو که‌ته‌که‌ینه هۆرش گێرت و واتش:فره‌و زاوڵا پسه‌و تۆ هه‌نێ،که فره‌ مه‌منوونێنێ ئه‌گه‌ر ئانزانێ عالێ سیپاڵێشا دا پنه. جانی وات:ئه‌ذا ئه‌گه‌ر جه‌ بویدی داوا که‌ری سیپاڵه‌کا به‌رۆ. بویدی وات:مه‌به‌ستێوێم نه‌بێ تۆڕێت که‌روو. ژه‌نه‌کێ وات:پاسه‌ نمه‌زانه‌ که تووڕێ بیێنا،ته‌نیا مه‌یۆزه‌ بیێنا چنه‌ت

هه‌رئینه.ئیسه‌ با چی باره‌وه‌ قسێ نه‌که‌رمێ. ژه‌نه‌کێ هوه‌ڕه‌کێش گێلێرێ که‌رذێوه‌،جانی ده‌سوو بویدیش گێرت و کێشاش په‌ی لاو به‌ره‌که‌ی:خواحافێز،ئه‌ذا. بوید ده‌یه‌قێو مرذاره‌ و لاتره‌کوو به‌ره‌که‌ینه وڕ بیه‌نه‌ دێده‌ ویلسۆنێ. فه‌رماوه‌ ئالفۆنس گیان.جانی به‌ره‌که‌ش که‌رذه‌بێوه‌. دێده‌ ویلسۆنه‌ ده‌نگوو بویدیش ئێژنی که یه‌واشێو په‌رساش:هێشتار ئه‌ذات تووڕێنه؟ جانی داواچش داوه‌:نمه‌زانوو،بڕێو وه‌ختا جۆڕیۆ. بویدی وات:ئه‌ذاو منێچ چامنێنه‌،دالێو ماتش که‌رذ،"فه‌رماوه‌ ئالفۆنس گیان...."

نویسته‌ی:شێرلی جه‌کسۆنه‌(1965-1919)

هۆرگێڵن:بێهرووز حاجی

نامه‌ په‌ی خوای....

aragel — Wed, 25 Jul 2012 18:56:00 GMT

نامه‌ په‌ی خوای....

یانێو که سه‌روو کۆمایوی که‌م بارسا"ارتفاع" کریابێوه‌ ته‌نیا یانه‌و بێ که‌ چا ده‌ره‌نه دێ چه‌مۆ. ئانزان چی سه‌رۆ تاوێ له‌وه‌که‌ی "رودخانه" وینۆ.پاڵوو بارووموو کشت و کاڵه‌که‌ی،لووبیه‌و پیویێ که نیشته‌بێ هه‌راڵه‌ و مزگانی به‌رهه‌مێوی فره‌ دێ.ته‌نیا چێوێو که زه‌مین ئه‌وه‌جه‌ش بێ پنه ڤارانی نه‌رم و نیان یام لانی که‌م هۆره‌ تریشقێوی تێژو تن.لنچکۆ گرذوو ڕۆی هه‌رمانه‌ش نه‌بێ بێژگه‌م ئانه که چه‌م ڤزۆ په‌ی ئاسمانی سه‌رنیشتوو وه‌رهۆرزی"شمال شرقی". مڵکوو وێش ئێشناسێ. "ژه‌نه‌کێ!ئه‌گه‌ر خوا مه‌یلش بۆ ئارۆ ئاوێوه‌ یاڤۆ مڵکه‌که‌یما". ژه‌نه‌کێ که وێره‌گانه ئاماذه‌ که‌رێ واتش:"په‌نا به خوای!" کۆڕێ گه‌ورێ مڵکه‌که‌نه‌ هه‌رمانه که‌رێنێ، ساتێوه‌نه که گۆلاله‌کێ نزیکوو یانه‌که‌ینه‌ خه‌ریکوو که‌ی"بازی"بێنێ.ژه‌نه‌کێ چڕیێش ونه"به‌یدێ وێره‌گانه وه‌ردێ". سه‌روو سفره‌ی هه‌ر پاسه‌ که لنچکۆ وه‌روینیش"پیش بینی" که‌رذه‌ بێ،ڤارانێوی تێژ ده‌سش پنه که‌رذ.هۆرێ سیاوێ په‌شتوو که‌شه‌ به‌رزه‌کاو سه‌رنیشتوو وه‌رهۆرزی تخون بیێوه‌.هه‌وا پۆخته‌ و دڵگیر بێ. پیاکه‌ هۆرستۆ وته‌نیا په‌ی ئینه‌یه‌ که تکێ ڤارانی سه‌روو لاشه‌یشۆ ئه‌ره‌ویا که‌رۆ و تاسه‌ش مڕیۆ،لوا په‌ی گۆڕوو دلێراسه‌و باروومه‌که‌ی و لاشه‌ش ئێسپارا ده‌سوو ڤارانی.ساتێو که گێڵاوه‌ په‌ی یانه‌ی واتش:ڤاران نیا!ئاسمانه‌نه‌ سکێ وارا.تکێ گه‌ورێ ئه‌جۆ سکێ ده‌ سنتوایێنێ و گۆلاله‌کێ په‌نج سنتوایێ. ساتێو که‌ دیا په‌ی کشت وکاڵه‌که‌ی،زه‌رذه‌ خوێوی وه‌ش سه‌روو دیمه‌نیشۆ نه‌خشش به‌س. لووبیاکه‌ی وینێ که نیشته‌بێ هه‌راڵه و وه‌روو چه‌ماشۆ هۆڕپڕێ و ڤاران،په‌رذێوی سیاوێش کێشته‌بێ وه‌روو چه‌ماش.ناوامه وای تێژ که‌وت وشۆنیشه‌ره‌،ڤارانی تێژ وارا و ته‌وه‌رگه‌و زلان کشت و کاڵه‌که‌ش دا وه‌روو مشت و له‌قه‌ی.ئینه‌ ئتر سکێ زیوینی بێنێ که ئاسمانه‌نه‌ مجیێنێره‌!زاوڵه‌کێ چیروو ڤاران و ته‌وه‌رگه‌کێنه‌،به‌ وه‌شحاڵی فره‌وه‌ ڕه‌مێنێ تا مرواریه‌کا که‌ بیه‌ی بێنێ پسه‌و بیلا گلێرێشا که‌راوه‌. پیاکه ژڵێژیا حاڵ واتش:ئه‌جۆ دۆخه‌که‌"وضع" خرابیا.شه‌ڵلا ویه‌رذه‌یا تا بێ خه‌مێ بیه‌یانمێ.به‌ڵام نه‌لا.ده‌روو سه‌عاتێوی ته‌وه‌رگه‌ پسه‌و مرواریا مجیه‌یره‌ سه‌روو بانوو یانه‌که‌ی و مڵکه‌که‌ و کۆماکه‌ و گرذوو ده‌ره‌که‌ی.مڵکه‌که‌ چه‌رمه‌ بیه‌بێ و ئه‌جێ مه‌کیشا پژگنان ونه.هیچ گه‌ڵه‌یۆ نمه‌نه‌بێ پۆ داره‌کاوه‌.گرذوو به‌رهه‌مه‌که‌ی لوابێ به‌ینه‌نه‌.هه‌راڵه‌و لووبیاکه‌ی گرذ رزه‌ی بێنێره‌.لنچکۆ که‌لاوه‌ ده‌یری بیه‌بێ.واگژه‌و زلانه‌که‌ که وت،دلێراسه‌و کشت و کاڵه‌که‌ینه‌ مرذاره‌ و به‌ کۆڕه‌کاش وات:ئه‌گه‌ر مه‌له‌کۆڕێچ هه‌وکه‌شا "حمله"که‌رذه‌یا ملوو کشت و کاڵه‌که‌‌یما،فره‌ته‌ر چینه‌یه‌ مه‌نێوه‌.زلان هیچش ناسته‌ن په‌یما.ئێساڵ نه گه‌رمه‌ شامیێما هه‌نێ و نه لووبیا. شه‌وه‌کێ، شه‌وێوه‌ خه‌مباره‌ بێ. "ئی گرذ ئه‌رکما کێشا؛ئاخریچۆ هیچما ده‌سگیر نه‌بی." "که‌سیچ نه‌مه‌نه‌ن ده‌سباریما که‌رۆ!" "ئێساڵ ئاورایه‌نه‌ نه‌مێرمێ شه‌مسما ئارذه‌ن" به‌ڵام بناخوو دڵوو ئاکه‌سا که‌ جه‌ یانه‌ی دوورکه‌وته‌و دلێراسه‌و ده‌ره‌که‌ینه ژیوێنێ،ته‌نیا هه‌میذێوشا مه‌نه‌بێوه‌؛ده‌سباریۆ خواڵه‌ی. "ئننه‌ ناهه‌میذانه قسێ نمه‌که‌ره‌.که‌رذێچما گرذ چێوما جه‌ ده‌س دابۆ،ئانزان که ئاورایه‌نه‌ نمه‌مرۆ!" "ئه‌رێ!گرذێتا هه‌ر ئینه‌یه‌ ماچدێ: کێ ئاورایه‌نه‌ مه‌رذه‌ن!؟" ئا شه‌وه‌ تا ساعبێ لنچکۆ وه‌رمش نه‌کۆت پۆره‌.لوابێنه ویروو ته‌نیا هه‌میذێش:یارمه‌تیۆ خوا‌ی.خواڵێو که گرذ چێوی وینۆ و هیچ چێو نهێن نیا جه‌ ئاذی. لنچکۆ تنه‌ ته‌بێعه‌ت بێ. ساعبێ تا وێره‌گا پسه‌و ماشینی مڵکه‌که‌شه‌نه‌ هه‌رمانه‌ که‌رێ.دالێو سه‌واذیچێش بێ.یه‌کشه‌مه‌ی دمایین شۆنوو ئانه‌یه‌ که‌‌ چنی وێش فره‌ گیژیا یاوا پی به‌رئامه‌یه‌"نتیجه‌"که هازێو چه‌م داری ئه‌رامه‌ننا که‌رۆ،نامێوێش نویست و لوا په‌ی شاری تا ڤزۆشه‌نه‌ سنۆقوو پۆسی. نامه‌که‌ په‌ی خوای بێ.نویسته بێش:"خواڵه‌!ئه‌گه‌ر به‌زه‌یت نه‌ی به وێم و کڵفه‌ته‌که‌یمه‌ره‌‌،ئێساڵ ئاورایه‌نه‌ جه‌ به‌ین ملمێ.ئه‌وه‌جه‌م به سه‌ذ هه‌مباران تا هه‌مته‌ر مڵکه‌که‌یم کاڵوو و کشت وکاڵ که‌روو،تا زیننه‌ مه‌نمێ،وێت مزانی که واوگژه‌ یانه وێرانێش که‌رذیمێ." په‌شتوو پاکه‌توو نامه‌که‌ینه نویستش:ده‌س یاوا:"گیرنده‌" خوا. نامه‌که‌ش نیانه پاکه‌ت و و پۆخته‌ به‌ره‌و پاکه‌ته‌که‌یش لکناره‌.هێشتار دڵ وه‌ر بێ.یۆ جه هه‌رمانبه‌راو ئیداره‌و پۆسی،به خوه‌هۆڕه‌ نامه‌که‌ش نێشانوو سه‌رپرێسوو ئیداره‌که‌ش دا.جه گرذوو ماواو خزمه‌تیشه‌نه‌ نامه‌ی ئه‌چێمنه‌شه‌ نه‌ذیه‌بێ.سه‌رپرێسوو پۆسی که‌ پیه‌وی زلام و وه‌ش ڕوو بێ، قلیاوه‌! به‌ڵام خێرا وێش گلێرش که‌رذۆ و حاڵه‌تێوی قۆرسش گێرت وێ.و سه‌روو که‌تیه‌وه‌ که‌ی که‌رێ چنی نامه‌که‌ی و واتش:شانازی که‌روو پی باوه‌ریه‌!شه‌ڵلای نیمه‌و باوه‌روو ئی پیه‌یه‌ ده‌روونوو منه‌نه‌ بیه‌یا.ئاپیا که ئی نامه‌شه‌ نویسته‌ن،باوه‌ری تایبه‌توو وێش بیه‌نش.ئاذ به که‌سێو هه‌میذش بیه‌ن که مه‌یۆزش نمه‌که‌رۆ. سا ده‌سش که‌رذه‌ن نامه نویسته‌ی په‌ی خوای.سه‌رپرێسوو پۆسی په‌ی ئانه‌یه‌ که‌ ئا باوه‌ره‌ پته‌وه‌یه‌ جه‌ به‌ین نه‌به‌رۆ و نامێو که‌ نمه‌تاڤۆ یاونۆش ده‌س یاوای جه شۆنه‌مای نه‌وزۆش،که‌وت ویروو ڕاچارێوی.مشۆم داواچوو نامه‌که‌ی ده‌وه‌. به‌ڵام ساتێو که نامه‌شا که‌رذۆ،زاناشا که داواچوو نامه‌ی به چێوێو‌ ئه‌وه‌جه‌ش هه‌ن که به ده‌وات و خامه وه‌ش نمه‌بۆ.به‌ڵام ئاذ هه‌رمانه‌کێش وێڵه‌ نه‌که‌رذه‌.جه‌ هامکاراش داواو ده‌سباریش که‌رذ و دالێو جه مووچه‌و مانگانه‌و وێش نیا سه‌رۆ و برێو جه دۆسه‌کاش یارمه‌تیشا دا تا ئی هه‌رمانه‌ خاسێ گنۆوه‌ ڕا. گلێره‌وه‌ که‌رذه‌ی سه‌ذ هه‌نبارێ په‌ی ئاذی نکونی"مشکل"بێ.سا ته‌نیا به‌شێو جه زه‌ره‌که‌ی که لنچکۆ داواش که‌رذه‌ بێ ئاماذه‌ش که‌رذ.زه‌ره‌که‌ش نیانه پاکه‌ت و نامێوێچش هامیار که‌رذ.سه‌روو نامه‌که‌ی نویستش:جه سه‌وه‌رێنه‌و خوای. یه‌ک شه‌مه‌ی دمایین،لنچکۆ لوا په‌ی شاری و زووته‌ر لوا په‌ی پۆسی.نامه‌به‌ر وێش نامه‌که‌ش داپنه.و سه‌رپرێسوو پۆسی که‌ ئه‌ره‌ویای وه‌شحاڵی که‌رێ که‌ ئی هه‌رمانه خاسێشه‌ که‌رذێنه، لاتره‌کوو به‌ره‌که‌ینه دیه‌دیێش په‌ی. ساتێو که لنچکۆ زه‌ره‌که‌ش دی هیچ سه‌ره‌ش سڕ نه‌مه‌ن،چوون باوه‌رش بێ.ساتێو که زه‌ره‌که‌ش ئێژمارا لوانه فێکرێ،خوا که زانێ من چن زه‌رم گه‌ره‌ک بیه‌ن،ده‌ی ئه‌سێح ئا ئه‌نازه‌ که ئه‌وه‌جه‌م بیه‌ن کیاسه‌نش. لنچکۆ خێرا لوا پاڵوو سنۆقوو نامه‌کاو داواو خامه‌و ده‌واتیش که‌رذ.سه‌روو که‌تی دلێراسه‌و پۆسخانه‌که‌ینه نامێوێش نویست.که‌لاوه‌ دابێش پێوه‌ره‌.ساتێو که گه‌ره‌کش بێ واتیلێ ڕێکو پێکێ بێزۆوه ‌فێشار ئارێ به وێش. کارش که ته‌مامیا،ته‌مرێوێش ئه‌ساو لکناش پاکه‌ته‌که‌یره‌.تن به مشته‌کۆڵه‌ داش ونه تا هێقم لکیۆ.ساتێو که نامه‌که‌ش ڤسه‌نه‌ سنۆقوو پۆسی،سه‌رپرێسه‌که‌ لواو نامه‌که‌ش هۆرگێرت.نویسته‌بێش:"خواگیان!جه سه‌ذ هه‌مبارێ ته‌نیا هه‌فتا دانێ یاوه‌ینێ. ماباقیچێش زووته‌ر کیانه که فره‌ په‌نه‌ وازما. به‌ڵام خواگیان!ئه‌گه‌ر کیانی،پۆسه‌ره‌ نمه‌کیانه‌.ئی هه‌رمانبه‌رێ ئیداره‌و پۆسیه چه‌تێنێ!فێداکارت،لنچکۆ."

نویسته‌ی:گرێگۆریۆ لۆپێز فۆئێنتێس( 1895-1966) نوسه‌ر و ڕازنویسی مکزیکی.

هۆرگێڵن:بێهرووز حاجی

ده‌رزوو په‌نج شه‌مانه‌ی.....

aragel — Fri, 13 Jul 2012 21:53:00 GMT

ده‌رزوو په‌نج شه‌مانه‌ی.....

بابا دارودێل که کسمش پاڵاورازته‌ی بێ،ئاما و پیشنیاروو ئی مامه‌ڵه‌یشه دا پنه‌م: شمه نمه‌تاودێ که‌لاسه‌نه ته‌نیا هاگاتا لا کۆڕه‌که‌و منه‌وه‌ بۆ.په‌نج شه‌مانه‌ی ده‌رزی تایبه‌تیش ده‌یدێ پنه تا بتاڤۆ ئیزن نامه و بنه‌ڕاییش"تصدیق نامه‌ی ابتدایی" گێرۆ. منیچ یاگێشه‌نه‌ پاڵا‌کات ورازوه‌وه‌.مزانوو فێرکه‌رێ "آموزگار" مووچه‌ی"مستمری"خاس نمه‌گێرا و منیچ کاریگه‌ره‌نا. مشۆم ئه‌رامه‌ننێ چه مشا هه‌نترینیه وه بو.هه‌رچێوتا هه‌ن په‌ی په‌ڕۆکه‌رذه‌ی ئی وڵۆ پاڵه‌یا ده‌یدێم‌ پنه.ئه‌گه‌ر مانه‌گه‌زێ"چکمه" و سه‌ر‌پایێ کۆنێت هه‌نێ بسپاره‌شا به من، نۆزهوورو تازه‌ مذه‌وته‌وه‌ پنه.ئه‌وه‌ڵین که‌ڕه‌ت بێ که لالۆ دارودێل مه‌ی په‌ی وانگایما"مدرسه". ده‌ی سا چکۆ زانانش پاڵاکێم دڕیه‌ینێ؟ ئه‌سێح کۆڕه‌که‌ش،که‌ مسیارما"دانش آموز" واته‌نش پنه.ئی کۆڕه‌ سراڵه‌"تنبل" هیچ گۆش مه‌ذۆ به ده‌رزه‌که‌یم.به‌ڵکووم ماوێوی فره‌،چ ئینه‌کێ پاو ته‌خته‌ی بوو و خه‌ریکوو شیه‌وه‌که‌رذه‌ینا یام په‌شتوو که‌تیه‌وه‌ ئێملاکێشا هه‌ڵه‌ گیری"غلط گیری" که‌روو، چه‌م داریۆ پاڵه‌یه‌کام که‌رۆ.چ کاتانێوی"عادت" قیزه‌ون!هه‌ر چێو ماچووش پنه فه‌یذه‌ش نیا: هه‌ر پاسه چه‌ مش ئینا پاڵه‌یه‌کامۆ.به‌ڵام من هه‌رمانێ تانپه‌ڕته‌رم"مهم"هه‌نێ که مشۆم بیاوو پاذیشاره.به‌ڵێ، بابه‌ته‌که‌ پێسه‌ بیه‌نه.کۆڕوو دارودێلی،ئی مسیاره‌ سراڵه،ئاژه‌و"وضع" خرابوو پاڵه‌یه‌کام یاونانش تاته‌یش،که پیه‌یوی قابلیه‌ت دارا،یه‌ک ڕاس ئامان وانگا سۆراخم و پیشنیاروو ئی مامه‌ڵه‌یشه دان. هه‌ڵبه‌ت ڕاسا هۆذه‌مه‌نه‌"اتاق"یه‌رێ هیتێ پاڵه‌ی کۆنێ و شڕو وڕم هه‌نێ.و ئینه‌یچه ڕاسا که فره‌و وه‌ختا فلسێو نیا باخه‌ڵه‌مه‌نه. به لالۆ دارودێلیم وات:خاسا،قه‌بووڵما. نه‌زانام چی ئه‌ره‌ویام که‌رذ که وه‌شم نمه‌ی ئی پیایه‌. گاهه‌ز چه‌مه‌کێش که واقم بیێ بێنێ پۆره‌ جه به‌خێڵی بێ ئه‌نازی باس که‌را. و په‌نج شه‌مانه‌ی جه ژیوای فێرکه‌ریمه‌نه‌ ڕوانێوی وه‌ش و مه‌کینێنێ که هه‌له‌و"فرصت" هه‌ناسه کێشته‌یم مذا پنه.وه‌روو وێمه‌ره‌ واتم: سه‌عاتێوه‌ ده‌رزواته‌ی هیچ تانپه‌ڕ نیا.ودڵێ ئی ساڵانه که خه‌ریکوو ده‌رز ده‌ینا جاری ئه‌وه‌ڵا که‌ پیشنیاروو خه ڵاتێوی تایبه‌تیم مذا. سا په‌نج شه‌مه‌ی دمایین کوڕوو دارودێلی ئاما تا ئه‌وه‌ڵین ده‌رزش وانۆ.ئی ئه‌رامه‌ننه‌ واتیڵوو "بۆ"ی چنی واتیڵوو"بیه‌"ی تاقی نمه‌که‌رۆوه‌. ته‌وێڵه‌ش کۆتان و چه‌مێ زاقێش نێهین یێنێ و حاڵه‌توو دیمه‌نیش چێوێوی زێرڤوو دماکه‌وته‌ن"عقب مانده‌"که وارشوو"شکل" شه‌یتانێش مذۆ پنه. هه‌جگیز،هه‌جگیز مسیارێوی چێمنه‌مه‌ نه‌ذیه‌ن.ئی گیانه‌وه‌ره‌ ئه‌جۆ قه‌سی نمه‌یاڤۆنه. به‌جه‌رم جه ده‌س دا. نه‌ڕانێ.هۆرئامانێ په‌یش: ئه‌گه‌ر که‌لاسه‌نه پا ئه‌نازه‌ که هاگات لا پاڵه‌یه‌کامۆ بیه‌ن تا شۆنیه‌ره‌ بلی و واچی تاته‌یت، هه‌وڵت کرذه‌یا چێوێوی ساکار"ساده‌" پسه‌و واتیڵ واته‌ی مسه‌یانی ئیسه هه‌رمانه‌ما نه‌کیشیێ ئارۆ! ئاخرۆ پاسه مانیاو پڕووکیا بێنێ که ئه‌جێ گرذوو ڕۆکه‌ی خه‌ریکوو هه‌رمان که‌رذه‌ی بیه‌نا. به‌ڵام کۆڕله‌که‌،په‌ی ئه‌وه‌داو هه‌رمانه‌کێ،هیتێو جه پاڵه‌یه‌کام که جه‌ ئه‌وه‌کاته‌ری کۆنه‌ته‌رێ بێنێ به رذێش چنی وێش تا دۆشا به پاڵا ورازی.و شه‌مه‌ سه‌ر ساعب په‌ڕۆ کریا و نۆزهوور بارۆشاوه‌.په‌نه‌ مه‌و که ئی ڵاذه"لحظه"‌ فره‌ شیرینا په‌یم. جه بیه‌ی ئی پاڵه‌یاوه‌ ئه‌ره‌ویای وه‌شحاڵی که‌روو. به ڕاسی نۆزهوور گنا وه‌روو چه‌ما.به ڕاسی تازێ بیێ بێنێوه‌!ته‌نانه‌ت ئاوات وازێنێ که ئا ڕوه‌ سه‌رکیشیارێو "بازرس" به‌ی و چه‌مش گنو پنه م.ئایا نه ‌بیه‌نا پسه‌و زاوڵا؟

مه‌گه‌ر حه‌فتێو چننا؟وه‌خت کرژ ویه‌رۆ.چ نه‌سه‌قێو"شکنجه"!ئه‌یزه‌ن بارودێل ئامانۆ تا ده‌رزوو دووهه‌می وانۆ.په‌نج شه‌مێ وه‌شم پسه‌و خرۆتله‌ی خۆلیای خۆلیا و دوور گناوه‌‌ چنه‌م و جه شه‌وقی گنای گنا.ڕاچنم گێرته‌ن که‌ به زوانی وه‌ش و ئه‌هوه‌ن چنی کۆرله‌که‌ی قسێ که‌روو.ده‌روونوو هه‌ر فێرکه‌رێو که نه‌ڕای نه‌ڕۆ عیسه‌ێو هه‌ن که گه‌ره‌کش نیا سێ داره‌نه باڵۆچیۆره‌ و مرۆ،چوون وێش بێ تاوان زانۆ و ئینه‌یه‌ به‌ زوانی به‌رز یاونا‌ی یاونۆ.به‌ڵام کۆن گۆشی ئه‌ژنه‌ویا؟ ئیسه‌ من و مسیاره‌که‌ په‌شتوو که‌تی نیشتێنمێره‌.هه‌روێما زانمێ که به زوانوو یۆی قسێ نمه‌که‌رمێ.هه‌روێما زانمێ که نمه‌تاومێ یاڤمێنه قساو هه‌نترینی. به‌ڵام ئێمه‌ پابه‌ن به‌ په‌یمان نامه‌‌ینمێ. ئی جاره‌ کۆری بێ ئاوه‌ز ته‌نانه‌ت نمه‌تاڤۆ درووسی که‌م که‌رێو"تفریق"تاقی که‌رۆوه‌. به نتمی ته‌مام شیم په‌ی که‌رذۆ.جم نه‌وه‌رێ،داواچ نه‌ذێوه‌.ماچی په‌ی لابه‌رذه‌ی به‌شه‌کارێو "وظیفه‌" ئامان په‌ی ئێگه‌یه‌.ئه‌جۆ هه‌ر ئینه وه‌سێن که چی یاگه قیزه‌ونه‌‌یه‌ نیشۆره‌ و بزانۆ که‌ من زینه‌نا و پاڵه‌ی ئینه‌ی پامه‌نه‌.هۆرمه‌و .هه‌ڕه‌شێ که‌روو.نه‌ڕوو.هه‌روێ ده‌سێم به‌روو وه‌رۆ،ڵاڵیه‌ۆوه‌.به مشته‌کۆڵه‌ ماڵۆ سه‌روو که‌ته‌که‌ی.ته‌رسێوی بێ وێنه زاڵ بۆ ملمه‌ره‌. ماچی ده سوو گیانیمو تووڕه‌ بیه‌نا. ماچوو: ئه‌ی هه‌ری نه‌فام، گۆره‌که!تۆ هیچ وه‌خت هیچێو فێر نمه‌بی! و ئاوه‌ختیچه چه‌م داری پاڵای فێرکه‌ره‌که‌یت که‌ری تا بلیه‌وه‌ و واچی به تاته‌یت!مه‌گه‌ر من چێشم جه تۆ گه‌ره‌ک بیه‌ن؟ قسێ که‌ره‌،ده‌ی قسێ که‌ره‌؟ ئایا ته‌نانه‌ت که‌ره‌تێویچ گله‌ییم که‌رذه‌ن جه پاڵه‌یه‌کام؟...ئه‌گه‌ر پینون که تاته‌ش که‌یبڕا"قصاب"،و ئه‌گه‌ر داگۆنۆ که تاته‌ش نانه‌واش هه‌ن به گۆشت و نان ده‌رزێ تایبه‌تیم داوا که‌را چنه نمه‌کێشۆ ساڵێوه‌ که منیامه‌نه‌ قه‌بره‌.کۆڕه‌که‌،تۆ ئه‌من کوشی، ئاخرشۆ من کوشی! ژان دارودێل،ئی ڕواسه‌ چاتۆڵبازه،سه‌ره‌ش ڤزۆره‌ و وڕ بۆنه پاڵه‌یه‌کام که‌ تاته‌ش وراسێنێوه‌.ئی چه‌مه‌ سامداره‌ که‌ وزۆ به پاڵه‌یه‌کام چا وه‌خته‌ که ئاذی مێشناسوو ته‌نیا هه‌رمانێوه‌نه که ده‌سشه‌نه‌ به‌ر مه‌ی. ئه‌چی ساته‌نه‌ به‌رۆسته‌"آشکارا" ئه‌ره‌ویا که‌روو که به‌ینوو من و کۆڕه‌که‌ و چنی پاڵایه‌کام پێوه‌زێو وه‌ش بیه‌ن،پێوه‌زێو که نه پێوه‌ندا به مساو ئامۆچیاری و نه پێوه‌ندا به ترۆقی مسیاره‌کا که ئه‌سێح چه‌مه‌ڕاشانا چنه‌م.ده‌رزه‌که‌ی دمه‌ینه ماروو و ماچوو: هۆرزه‌ لوه‌!هۆرزه‌ لوه‌! و سه‌ره‌م که داخش که‌رذه‌ن منیه‌وش به‌ینوو ده‌سه‌کام. به‌ڵام ژان دارودێل هیتێو ته‌ر جه پاڵه‌یه‌کام ڤزۆ چیروو که‌شیش و به‌رۆ چنی وێش.

هه‌مته‌ر وراستێوی درۆشیا. پاڵه‌ی سیاوم که پسه‌و وه‌رگیریوی"سپر" زیوین"نقره‌ای" نووره‌نه‌ برێقه‌ مذاوه.په‌یم که ئه‌جۆ به ده‌سوروو ئاسن کێشێو"آهن ربا" کیشیای کێشیا گۆرج برووشا چوه‌ر و پاسه‌ ئه‌ره‌ویای ڕه‌حه‌تی که‌روو که ئه‌جۆ سه‌روو سه‌وزه‌ڵایه‌وه‌ لاقۆرێ منیه‌وره.دیسان ئاواتی بێ ئاوه‌زانه‌ی ئامای سه‌رکیشیارێو یام ئه‌ذای زه‌ریفه‌و یۆ جه مسیاره‌کام په‌ی که‌لاسی. هه‌مته‌ر ده‌رزوو په‌نج شه‌مانه‌ی.ئه‌یزه‌ن نه‌ڕه‌هۆڕه‌و دژمان دای.هه‌مته‌ر مانیه‌یوی ئه‌وه‌ده‌ر"بی حدواندازه‌". هه‌به‌سێوی شێتانه‌م مه‌ی په‌ی که شه‌قێوه‌ ده‌و گرذوو ئی چێواوه‌ و جه شه‌ڕیشا وێم ڕزگار که‌روو.به‌ڵام نمه‌کریۆ. یاساخوو ئی پاڵه‌یێ بێ پرگامه"بی عیب و نقص" بیه‌نا که جار هه‌ن دلێشانه ئه‌ره‌ویا که‌روو که‌ به‌ینوو گڵم وگژوو"دادوفریاد" لێوانه‌ی چه‌م داره‌کا نقم بیه‌نا. دارودێل هه‌ر یه‌ره‌ هیته‌کێش به‌رذه‌نا و شۆنیه‌ره‌ ئاذێنێشه‌وه‌. به‌ڵام په‌نج شه‌مه‌ی دمایین به سه‌مه‌ره‌ی فره‌ وینوو که دیسان په‌ی ده‌رز وانای ئامانۆ و هه‌مته‌ریچ په‌نج شه‌مانێو ته‌ر و شۆنێچشه‌ره‌ په‌نجشه‌مانێو ته‌ر. و په‌نج شه‌مانێو ته‌ر شۆنوو په‌نج شه‌مانێ ته‌ری! بابه‌ته‌که‌ فره‌ ساکارا"ساده‌": کۆروو دارودێلی ئه‌واڕه‌م مه‌ی تا په‌نج شه‌مانه‌ی لامۆ ده‌رزی تایبه‌تی وانۆ به‌ڵام من ئتر پاڵام نیا ده‌وش پنه‌.نه پاڵه‌یۆ،نه سه‌رپایێو،نه مانه‌گه‌زێو! و نه ڕه‌فێقێو که پاڵه‌ی شڕش با تا بتاڤۆ جه‌ خاسی پاڵاورازی که به من هه‌نش که‌ڵک هۆر گێرۆ. خاسی نا،چه‌ته‌ گه‌ری،مل هۆری به باوه‌ری!تاوانێوی سامدار که مشۆم یاگۆ مووچه‌ی"دستمزد"قه‌بووڵ که‌روو. شه‌وانه دلێ یاگێنه حه‌یبه‌تیێ ده‌رزوو په‌نج شه‌مانه‌ی وه‌رمم نمه‌گنۆ پۆره‌. به‌ڵام ساعبانه‌ی ئی یه‌ره‌ هیته پاڵه‌یێ که‌ ئینه‌ی پاڵوو یاگه‌کێمه‌نه‌ پسه‌و پۆپه‌و که‌ڵه‌شیری مل به‌رز که‌را و برووسکه"برق" مذاوه‌.ئینێ بیێنێ داوه‌رێم. ئه‌ره‌ویا که‌روو ویرێم واناوه‌ و ساتێو شه‌که‌ نمه‌که‌روو که ڕۆنه چه‌م داری هه‌رمانام که‌را. گرذ چێوو هۆذه‌که‌یم"اتاق" ‌ دلێ هاڵیگاو"فضا" یۆبیه‌ی"یکنواخت" بێ سه‌ره‌نجوو مه‌رگیه نه، نقمێ بیێنێ،به‌ڵام پاڵه‌یه‌کێم ڵنگه‌ ڵنگه‌ به حاڵه‌تێو که قره‌وڵ"نشان" جه وێ دڵنیای و هه‌ذه‌ریا وه‌راوه‌رمۆ مل به‌رز که‌راوه‌. ئایا ئینه‌مه‌ وات که ئی پاڵه‌یێ ئه‌وه‌جه"احتیاج" به پۆخته‌ بیه‌یشا نیا.برووسکه‌ی درۆشیا و بێ خه‌مێشا ساتوو وه‌ر پێک"برخورد" چنی هه‌ر لۆن گۆماڵاوو کۆڵانا جه یه‌کده‌ سی و ده‌سه‌ برایی چه‌مێوم په‌ی نامناره‌. ئیسه‌که‌ ویه‌رذه‌و ڕۆزگاری زاڵێوێش نیا ملوو ئی پۆسه‌ شه‌یتانیه‌ره ‌خه‌فه‌ت و مه‌راره‌توو منیچ ئاخرش نیا. هه‌ر ئیسه‌وه‌ قژێ سه‌ره‌یم بووڵینێ بیێنێ. جه‌ هه‌ر ده‌رزی تازه‌، بجگه‌م نرخی ته‌مام بیه‌ی یام مۆحیتوو چوار گۆشه‌ی یام فره‌ بیه‌ی "ضرب"چن ژمارێ،هه‌میشه ئا هۆرئاما و تووڕه‌ بیه‌یه‌ هه‌ن.نه‌زانی ئی کۆڕه‌یه‌ سامدارا ده‌یریێۆ که فره‌و جارا مه‌ی په‌یم. ئاذ نه مه‌ژگێژ هه‌ن،نه‌ ویر و نه برز مرخیچا"طبع". ته‌نانه‌ت وینونوو"ذهن"وه‌شه‌سیایش نیا و ئینه خرابته‌رین ئه‌رامه‌ننیشا. ئاخ،چی من تاقه‌تم نارذ که به پاڵا کۆنه‌کام ویم بژیونوو! چوون گنوه‌وه‌ ویروو ئۆسای هه‌رسیم مجیاره‌. ئی پاڵا قیزه‌و‌نێ نۆزهوورێ"تازه‌" نه ته‌نیا بیێنێ خه‌فه‌تێوی گه‌وره‌ په‌یم به‌ڵکووم بیه‌ن پسه‌و خیاڵێوی که چا‌نه‌ هازوو سووکی گرذوو تاته‌یا تێکه‌ڵ بیه‌ن چنی تۆندته‌رین زێروی ژیوای.ڤیان به عداڵه‌ت و شه‌وقوو ئاوه‌زی که‌ ئامانجوو ژیوایم ده‌وره‌و زانشتگه یم"دانشسرا" بێ ئیسه‌ فاڕیان به ته‌رس و به‌خێڵیێو په‌ی وه‌شبه‌ختیێوی که جه به‌ینیش لوان.

ئیسه‌ کارم یاوان یاگێوه‌ که ئاشکرا دارودێلی ته‌پڵه‌کۆ که‌روو: وه‌ره‌،داماگ،تا مسی چه‌نی خه‌به‌ر ده‌ی تاته‌یت که پاڵه‌یکێم دڕیه‌ینێ! بێ ئاوه‌ز،گه‌ره‌کت بێ سووکم که‌ری و وێت وێستت چیروو مشت و له‌قه‌ی؟چی پێسه‌ته‌ که‌رذ؟ ڵاڵیه‌وشه‌وه‌ ونه‌ که داواچم دۆوه‌ و هه‌ر پاسه‌ ئاذ مذیۆ په‌ی پاڵه‌یه‌کام،و چوون تووڕه‌ییم جه پیمانه‌ی ترازنوو جه ختووره‌ی چه‌مم نقمێ با. ئی بێ ده‌نگیه‌ مانایوێش هه‌ن.مزانوو مه‌ژگێژ هاڵیا و چوون ئی که‌لێنیه‌ "خلاء" ماروو ویر له‌رزای له‌رزوو،ماچی یاوم که‌رذه‌ن.ئامانجوو تاته‌یش ئینه‌ نه‌بیه‌ن که روێو کۆڕه‌که‌ش کاغه‌زش په‌ی بنویسۆ، به‌ڵکووم ته‌نیا ئینه‌ بیه‌نه‌ که هه‌تا شه‌راره‌ی مه‌رگ نه‌سه‌قم که‌رۆ.ئینه‌نه‌ ئاچێوه‌ که یاواناشه‌نه‌. لۆنێو جه دیه‌ی به‌ذیۆمنی"نحس"، چه‌مم گنۆ به یاساخ "زندانی" بیه‌ی وێم، چوون من بیه‌نا یاساخوو پاڵه‌یه‌کام.

ئه‌ی شمه که تاوانبارێم که‌ردێ.شمه نمه‌زاندێ ده‌رزدای به ژان دارودێلی یانێو چێش. ده‌یری بیه‌ و زه‌بوونیم ئا چێوه‌ بیه‌نه‌ که پاڵاورازی گه‌ره‌ک بیه‌ن. چی به‌ینه‌نه‌ ‌ دماڕۆم"آینده‌" چێش بۆ؟ده‌روونمه‌نه،‌ ئا پیا باوه‌ر که‌ره‌ به مسا و ئامۆچیاری"آموزش و پرورش" مه‌رذه‌ن،مه‌رذه‌ن. مسیاره‌که‌م گرذوو تووڕه‌بیه‌م قه‌بووڵ که‌رۆ و هه‌جگیز لا تاته‌یشۆ گله‌یی نمه‌که‌رۆ. سامدارا ئه‌واڕه‌م چه‌م پنه که‌وته‌ی هه‌ر په‌نج شه‌مانێو. و سامدارته‌ر جه‌ ئانه‌یه‌ بێ هازی منا جه کۆنه بیه‌ی پاڵه‌یه‌کام. ڕانه لوه‌ی درێژم جه‌ بنار تا بناروو پاریسی،جه کۆماو والرینی تا ئیسی له‌مه‌لینو،جه سن سیری هه‌تا شارتێر،هیچ شۆنه‌مایوێش نیا و ساتێو که گیڵوه‌وه‌ په‌ی یانه‌ی پاڵه‌یه‌کێم هه‌ر پسه‌و ئه‌وه‌ڵی برێقه‌شا مه‌ی. دیمه‌نی بێ ده‌نگ و ئه‌هوه‌نم ئیسه‌ حاڵه‌‌تێوی ناوه‌شش گێرته‌ن وێ که زاوڵێ ته‌رسنۆ و سه‌رکیشیارو ئه‌ذای زه‌ریفوو مسیاره‌کام دوور ڤزۆوه‌ چنه‌م. هه‌ڵبه‌ت ئتر پاڵاورازه‌که‌ نمه‌ی سۆراخم.به‌ڵام گه‌ره‌کما پسه‌و پاڵاورازوو ڕازوو لافونتنی، به گره‌وه‌وه‌ بلوو وه‌روو به‌ره‌یشا و واچوو به‌ ئی پیا به هازه‌یه‌: کارذێوه‌ هۆر گێره‌ و به ده‌ساو وێت پاڵاکام هۆرباره‌ تا هه‌مته‌ر پا وارشه‌"شکل" وینووشا که وه‌ڵێنه دانیم پنه، به‌ڵام تۆ ئاخوا زاوڵه‌که‌ت گێره‌ چنه‌م.ئاذ ئامان لام تا مڕیایی ئاوه‌زیم یاونۆ. به‌ڵام مزانوو ئی پیا شۆنوو قسه‌کامه‌ره‌ پێڵێو"شانه" ته‌کنۆ و ماچۆ: ده‌سه‌ڵات ئینا ده‌ستاوه‌، به‌ڵام شمه که فێرکه‌رێندێ، شمه پیه‌یوی گه‌وره‌ و یاگه‌ به‌وڕ، شمه گه‌ره‌کتانا به مه‌یلوو وێتا په‌یمان نامه‌که‌ی به‌تاڵ که‌ردێ. و مزانوو که ئینه وه‌ینامه‌ن"مصیبت،فاجعه" سامدارته‌ر جه مه‌راره‌ت و زگاریا"افسردگی‌" که به‌رئاما"ناشی" جه ده‌رزوو په‌نج شه‌مانه‌یا.

ئاخروو هه‌ر ساڵی،ئه‌واڕه‌م په‌ی گێرته‌ی ئیزن نامه‌ی بنه‌ڕایی ژان دارودێلی نام نویسیش که‌روو،هه‌ڵبه‌ت ئاذێچ زمنه‌نه‌ "امتحان"ره‌ذ بۆوه‌.داخۆم چن ساڵن وه‌روو ده‌ررزوو په‌نج شه‌مانه‌ی جه‌ ڕۆ ڕه‌جاڵیم"بیکاری" که‌ڵکم هۆر نه‌گێرته‌ن؟ چه‌م پێک من و ژان دارودێل خه‌ریکا پیرێ بیمێ. ئارۆ ئاذ مسیارێوی فره‌ پیرا و منیچ فێرکه‌رێو فره‌ فره‌ پیرته‌ر.دلێ ئاژه‌ سخڵه‌ته‌نه‌،ته‌نیا ڕاسیێو،کاتانێوی"عادت" گه‌وره‌ و سۆتیه‌و هه‌ن و ئانه ئینه‌نه‌ که هه‌جگیز پاڵاپۆسینه‌کێم دلێ په‌یامه‌نه‌ نمه‌ساویاوه‌.و ئاذێ برووکه‌شا پسه‌و ته‌وه‌نی چه‌خماقیێنێ،که دلێ سه‌یه‌ و تاریکیه‌نه‌ برێقه‌ مذاوه‌ ساتێوه‌نه‌ که ماچی پۆسه‌که‌شا نائانزانیا.و منیچ هه‌جگیز ده‌سوو مسیاره‌که‌یم ڕیاییم نمه‌بۆ. نمه‌تاوی ئاذیچی ساویه‌وه‌. دیمه‌نشه‌نه‌ هیچ ئه‌وه‌جێو به‌ که‌ی "بازی"،هیچ شۆنه‌مای جه ورذ دیه‌ی بجگه‌م په‌ی پاڵاکام،و هیچ ئه‌وه‌جه‌یۆ به پێوه‌ز چنی ئه‌وێته‌رێ نمه‌وینوو و یاوانانه‌ که برێقه‌و چه‌ماش پسه‌و برووکه‌و چه‌خماقینوو پاڵایه‌کامه‌نێ. وه‌ینامه‌و گرذوو ئی چێوا ناحاڵی بیه‌یا،نه‌بیه‌ی ڤیانیا،و ئێمه گرذێما په‌ی هه‌نترینی بیێنمێ زمنه‌و به‌تاڵی.چوون ئێمه هه‌رمانه نمه‌که‌رمێ،به‌ڵکووم ئاخێز"حرکت"و ڕه‌وتێ یه‌کده‌سێ واوه‌یشا"دوباره‌"که‌رمێوه‌ که ماچی یاساخێ کریه‌ینمێ.یاوه‌ی پی چێویه‌، ئاذێچ په‌ی پیه‌وی پسه‌و من که به‌شه‌کاریش فێرکه‌ریا،پسه‌و په‌ی گێڵای جه‌حه‌نه‌میا.به‌ڵام جه‌حه‌نه‌م چێشا؟ په‌رچینێوی هێقم و نه‌وڕا،چوون په‌ی که‌ڕه‌تی ئه‌وه‌ڵی چانه پێوه‌ز نامیمکێنا،هیچ پێوه‌زێو نمه‌کریۆ و ده‌روونوو هه‌رکه‌سیه‌نه‌ وه‌ربه‌ستێوا"بن بست" که وارۆسکه‌ی"غریزه‌" لاره‌مل که‌رۆ. شه‌یتان (تاته‌و ژان دارودێلی) نه‌ذیاش گێرته‌نا تا خاسته‌ر بتاڤۆ یاڤۆ ئامانجیش:وه‌رهه‌ڵه‌سوو "مقابله‌" دوێ که‌سا،تووشوو هه‌به‌سێوی تێژ که ئاذیشا مساڤۆوه‌ و جه وارشی ڤزۆشا، و چه‌مه‌ڕاو جه به‌ین لوای که‌سێوی لاوازته‌ر. چ قازانجێو جه لۆمه‌ که‌رذه‌ی ژان دارودێلی که‌ یاساخوو شه‌یتانیش که‌رذه‌نا؟ئاذیچ به گۆش دای ده‌رزه‌کام پسه‌و وێم تاوانێوی سامدار به‌جه‌ر که‌رۆ. چ ڕه‌حه‌ت وێم دڵ وه‌ش که‌رذه‌ن که یاوانانه‌ ئی چێوا و وه‌روو وێمه‌ره‌ ئی چێوامه‌ ئه‌وه‌خوا"تکرار گفته‌" که‌رذه‌ن که هه‌وڵ که‌روو په‌ی دڵنیایی،ناغافڵ چانه‌یه‌ که په‌نج شه‌مه‌نوو مسیاره‌که‌م مه‌ینه که‌ لاس.به‌ڵام ساتێو جه ساتانه،چوون سه‌یروو پیروو کۆڕه‌که‌ی وینوو که‌ واق بیه‌ن پاڵایه‌کامه‌ره‌ پسه‌و شێتێوی ویروه‌وه‌. هۆرمه‌و،دژمانی مذه‌و،ته‌پڵه‌کۆش که‌روو.ئاذ ڕۆ به‌ ڕۆ که‌مته‌ر میاڤۆنه شیه‌وه‌ که‌رده‌کام.و پاڵاکێ،ئی پاڵه‌یێ ئێ چێمنێمه که سی و دوێ ساڵێ چیه‌وه‌ڵی به به‌هانه‌و ناوه‌رزنی"صرفه‌جویی کردن"یام وێ ئێرمانه‌ی ڕازی بیا که‌رووشانه، پسه‌و پرذێوی ئاسنین و برێقه‌دار دووری ڤزا به‌ینما.ئی پاڵا قیزه‌ونێ که ڕاو فام و ئاوه‌زوو مسیاره‌که‌شا بینان و کێشناناشا تا حه‌نناو شێتی گه‌ری.به‌یدێ وئی پاڵا قیزه‌ونا پامه‌نه‌ به‌رشا کێشدێ تا ژان دارودێل بۆ به مسیارێوی وریا و زیته‌ڵ ومنیچ نه‌رم و نیان و خواینه‌‌ر"بردبار"بوه‌وه‌.

نویسته‌ی:رنه-ژان کلو(۱۹۹۷-1۹۱۳)

هۆرگێڵن:بێهرووزحاجی

دارسانه نه.....

aragel — Tue, 03 Jul 2012 10:20:42 GMT

دارسانه نه.....

ساتێو که خه‌به‌رشا دا شارداری که پارێزگه‌روو شارداری چنی دوێ زینانیا شارداریه‌نه‌ ماتڵێشه‌نه،هێشتار نیمه‌روانه‌ش نه‌وارذه‌بێ.ئاذ خێرا لوا په‌ی ئاگه‌یه‌ و چه‌مش که‌وت پارێزگه‌روو گێڵیه‌روو به‌روو شاری یانێو بابا هۆچدۆرکه مرذانه‌ره‌ و به حاڵه‌تێوی قۆرس چه‌م داری ژه‌ن و پیه‌وی پیر و وه‌ش جل و به‌رگی که‌رۆ. پیاکه زلام بێ.لووتێوی سوور و قژێ چه‌رمێش بێنێ و پیر دێ چه مۆ.ساتێوه‌نه که ژه‌نه‌که قه‌ڵه‌وه‌ و که‌لاوه‌ خرته بێ و سیپاڵی مێمانێش که‌رذه‌بێنه.کۆڵمێش برێقه‌ دێنێوه‌ و به تێڕۆ دیێ په‌ی پارێزگه‌ره‌که‌ی که که‌له‌مچه‌ش که‌رذێ بێنێ. شاردار په‌رساش: چێش قۆمیان بابا هۆچدۆر؟ بابا هۆچدۆر سه‌رئاماکه‌ێش گێڵناوه‌.ئاذ ساعبێ،پسه‌و گێجارێوی په‌ی چێرهۆردای قه‌راخوو دارسانوو شامپیۆی تا حه‌نذاو ئارژانتۆی یانه‌نه‌ زیابێره‌.چا ئۆڵگه هه‌واریه‌نه چێوێوی سه‌مه‌ره‌ش نه‌ذیه‌بێ،بێجگه‌م ئینه‌که هه‌وا وه‌ش بێ و خه‌له‌یچ گه‌ورێ بینێ.ناکاوێنه کوڕوو برۆدێلی که خه‌ریکوو مێۆ کاڵای بێ،چڕا:هۆ بابا هۆچدۆر!لوه‌ قه‌راخوو دارسانه‌که‌ی،ئا یاگێ که داره‌کێشا بڕیێنێ،چه‌مێت گنۆ دوێ کاوه‌ تڕیێ که پێوه‌ره‌ سه‌ذ و سی ساڵێ ته‌مه‌نشانا! ئاذ درێژه‌ش دا به ڕاکێش و لوا دلێ دارسانێوی ته‌قه‌ڵبڕ"انبوه‌".ده‌نگوو هه‌ناسه‌و وات و واچی یاوا گۆشش و زه‌ینش به‌رذ که خه‌ریکا تاوانێوی قیزه‌ون قۆمیای قۆمیۆ.په‌ی ئینه‌یه‌ که ناخافڵێشا که‌رۆ به گاکۆڵکانی لوابێ لاشا و ئی ژه‌نوو پیاشه عانوو ڤیان بازیه‌نه ڤێستێ بێنێشه نه ته‌ڵه‌. شاردار به حاڵه‌تێوی هاڵه‌ده‌وا"دستپاچه" دیێ په‌ی تاوانباره‌کا.پیاکه شه‌س ساڵه و که‌مامه"حداقل" ژه‌نه‌کێچ په‌نجا ساڵێ بێ. شاردار ده‌سش که‌رذ پرسیار که‌رذه‌ی. نامۆ پیاکه‌یش په‌رسا:و پیاکه به ده‌نگێوی زه‌بوون که په‌حاڵ ئێژنه‌ویێ،داواچش دا:نیکۆلاس بۆرن. شاردار په‌رساش:کسمتا چێشا؟ داواچش دا‌:خیابانوو مه‌رتیروو پاریسیه‌نه‌ لووکس وره‌شیم هه‌ن. په‌رساش:دارسانه‌نه‌ چێش که‌رێندێ؟ پیاکه‌ هه‌ر پاسه که سه‌ره‌ش کۆمنابێره‌ و ده‌سێش نیه‌یبێنێ سه‌روو قاچاش،وجم نه‌وه‌رێ. شارداری درێژه‌ش دا:ئا چێویه‌ که پارێزگه‌رما ماچۆ،حه‌شاش که‌ردێ؟ داواچش دا‌:نا کاکه. شارداری وات:سا‌ مه‌یدێ پنه؟ داواچش دا:به‌ڵێ کاکه.په‌رساشۆ:قسێوه‌تا هه‌نه‌ په‌ی وه‌رخۆل"دفاع" جه وێتا؟ -هیچ کاکه. شاردار په‌رساش:چکۆ چنی ئی ژه‌نێ که به‌شداروو تاوانیه‌نه‌،ئاشنه‌ی بیێندێ؟ نیکۆلاس داواچش دا:ژه‌نیمه‌نه‌ کاکه. –ژه‌نیته‌نه‌؟ -به‌ڵێ کاکه. –یانێو شمه پاریسه‌نه‌ پێوه‌ره‌ نمه‌ژیۆدێ؟ -به‌خشه کاکه،ئێمه‌ پێوه‌ مژیومێ. –سا شمه کاکه گیان،که‌لاوه‌ شێتێندێ چیه‌نه‌ وه‌روو چه‌ماو خه‌ڵکیه‌نه‌ پێسه‌ ئاخێزێوتا که‌رذه‌ن؟ پاسه دیار بێ که ساحیبوو دووکانوو لووکس وره‌شی جه‌ نتمی فره‌وه‌ مه‌حل بێ ده‌س که‌رۆ گره‌وه‌ی..... به ده‌نگێوی تاسیاواتش:ژه‌نه‌کێم دڵش پوه‌وه‌ بێ.من واتم که ئی هه‌رمانێ بێ ئاوه‌زانێنه، به‌ڵام وه‌ختێو خیاڵێو که‌وته‌نه سه‌ره‌و ژه‌نێوێ، مێزاندێ که ته‌نیا مه‌ژگشه‌نه‌ نمه‌پارێزنۆش. شاردار که وه‌شش ئه‌ی ئانزانی ڕووڕاسی، خواو واتش:شه‌ڵای جه باره‌و تۆره‌ چه‌په‌وانه بیه‌یا.چوون ئه‌گه‌ر ئی خیاڵه سه‌ره‌شه‌نه‌ مه‌نه‌یاوه‌،ئیسه شمه چیه نه‌ نه‌بێندێ. ئاغه‌ی بۆرن تووڕه بی و ڕوه‌ش که‌رذه‌ ژه‌نه‌کێشوو واتش:وینی پی هه‌رمانێته کێشنه‌ینمێت کۆگه؟ئینه‌ینمێ چکۆ؟مشۆم وازیه‌یمێوه‌ په‌ی داذگای.ئیسه پی ته‌مه‌ن و ساڵه‌وه‌،تاوانبارێ بیێنمێ به هه‌رمانه قیزه‌ونی که نه‌یاروو فیسپه‌گایا"اجتماع"ومشۆم دووکانه‌که‌ی بژه‌نوو،که‌لوپه‌لێش وره‌شوو.یانه‌که‌ما فاڕمێوه‌. ئێمه‌ چکۆنمێ؟ مادام بۆرن هۆرستۆ بێ ئینه‌یه‌ که بذیۆ په‌ی شوه‌که‌یش و بێ هیچ ته‌رسێو و نتمێو و یام دووشکێو پێسه شیش که‌رذۆ:خواگیان!ئاغه‌ی شاردار،خاس مزانوو که هه‌رمانه‌کێما قیزه‌ونه بیێنه.داخۆم ئیزنم ده‌یدێ پنه که پسه‌و داذواچێو"وکیل"یان که‌مامه پسه‌و ژه‌نێوه‌ ئه‌رامه‌ننێ بانچه‌مێ"دلیل" وێم واچوو؟وپه‌نه‌وازه‌نا ڕزگارێما که‌ردێ تا گێڵمێوه‌ په‌ی یانه‌ی و جه شه‌ڕوو تاوانباری ڕیایما"نجات"بۆ.ئۆسا،کاتێو که جوانێ بێنمێ،یه‌ک شه‌مانێو،هه‌رچی شاره‌نه‌ چنی ئاغه‌ی بۆرنی ئاشنا بیانێ.ئاذ وره‌شگاو لووکسیه‌نه‌ کار که‌رێ ومنیچ خیاتیه‌‌نه هه‌رمانه که‌رێنێ.ئه‌جۆ هیزی بێ.تا ئا وه‌خته‌ یه‌ک شه‌مانه‌ی چنی ڕه‌فێقێوه‌م ڕۆزلۆوێک ویارێنێش که پێوه‌ره‌ یانه‌ما خیابانوو پیگالیه‌نه‌ بێ.ڕۆز دڵێوێش بێ،به‌ڵام من نه‌بێم.ئا کۆڕه ئێمه‌ش به‌رذیمێ په‌ی ئا دارسانه‌یه‌.شه‌مێو که هه‌ر پاسه دۆسوو ڕۆزی خوای خوێ مزگانیش دانێ پنه که سه‌وای یۆ جه ڕه‌فێقه‌کاش مارۆ چنی وێش.یاوانێنه مه‌به‌ستیش،به‌ڵام داواچم دا که بێ فه‌یذه‌ن. ئاخر کاکه ئاوه‌زیێم. سه‌وایش مرذاگاو ئاسن ڕاینه چه‌مم که‌وت به ئاغه‌ی بۆرنی.ئاوه‌خته‌ هه‌رزه‌کارێوی زه‌ریف و ڕێک وپێک بێ،به‌ڵام ڕاچنم گێرت که نه‌مڕیه‌وه‌ و بێ هیچ لۆنێویچ نه‌مڕیانێوه‌. ئاخرش یاوه‌یمێ بزۆنی.فره‌ هه‌وا وه‌ش بێ.چا لۆن هه‌وایا که دڵوو ئانزانی له‌رزنێ.وه‌ختێو که هه‌وا وه‌ش بیه‌یا،ته‌نانه‌ت ئیسه‌یچه پسه‌و ئۆسای،دڵم پوه‌ن گره‌وو و وه‌ختێو ئینانێ دلێ ته‌بیعه‌تیه‌‌نه

که‌لاوه‌ ئاوه‌زم منیه‌وره‌. سه‌وزه‌ڵایی، په‌له‌وه‌رێ ده‌نگ وه‌شێ،خله‌و گیواوێو که هۆرپڕا،مریچڵێ که کرژو کۆڵ باڵێ گێراوه‌،بۆ گیواوی،ده‌نگوو که‌ڵه‌شێرا و گۆڵێ زه‌ریفێ، گرذوو ئی چێوا شێته‌م که‌را!پسه‌و شۆنه‌ماو شامپانی ملوو که‌سێوی که تا ئیسه موشرووبێش نه‌وارذه‌ بۆ! ئه‌رێ،هه‌وا نه‌رم و نیان بێ و ئی هه‌وا،ساتوو ته‌ماشا که‌رذه‌ینه جه ڕاو چه‌مانه و ساتوو هه‌ناسه‌ینه جه ڕاو ده‌میه‌نه‌،لوێنه دلێ ده‌روونیما.ڕۆز و سیمۆن فره‌و وه‌ختا باوشوو یه‌کترینیه‌نه بێنێ.وبه چه‌م پنه‌ که‌وته‌یشا حاڵه‌تێوی سه‌مه‌ره‌م دێ پنه.من و بۆرن بێ ئینه‌یه که قسێوه‌ که‌رمێ، شۆنیشاوه‌ بێنمێ.وه‌ختێو دوێ که‌سێ هه‌نترینی نه‌شناسا،قسێوه‌شا نیه‌نه‌ په‌ی واته‌ی.ئاذ حاڵه‌تێوی که‌م ڕووش بێ. خوه‌ی گێرتێ بێنێ وه‌ختێو وینێنێ،ئه‌ره‌ویای دڵوه‌ری که‌رێ.ئاخرش لوه‌یمێ دلێ دارسانێوی گۆلاله.دارسانه‌که‌ پسه‌و حه‌مامی نسرم"مرطوب"بێ.گرذێما سه‌روو سه‌وزه‌ڵایه‌که‌یوه‌ نیشتیمێره‌.ڕۆزچنی ڕه‌فێقه‌ که‌ش گاڵته که‌رێنێ پنه‌ما که حاڵه‌تێوی قۆرسما گێرتێبێ وێ.شمه میاودێنه که نه‌تاوێنێمێ به لۆنێو ته‌ر ڕه‌وت که‌رمێ. شۆنیه‌ره‌

پاسه‌ ڕه‌وت که‌رێنێ که واچینی ئه‌سڵه‌ن ئێمه چانه جه‌واڵما"حضور"نه‌بێ وبێ هیچ نتمێو باوشوو هه‌نترینیه‌نه بێنێ.دالێو شۆنیه‌ره‌ پێوه‌ره‌ چفه‌شا که‌رذ وبێ ئینه‌یه‌ که

چێوێما چنی واچا،هۆرستێوه‌ و په‌شتوو گه‌ڵاکانه نقمێ بیێ.باردێشۆ وه‌روو چه‌ماتا که من ڤه‌راڤه‌روو کۆڕێوی که په‌ی ئه‌وه‌ڵین که‌ڕه‌تیا چه‌مم گنۆ پنه،چ وارشێوم بیه‌بۆ.پاسه

په‌ی لوه‌ی ئا دوه‌ که‌سه‌یه‌ هاڵه‌ده‌وا بیاکه‌ یارام "جرئت"دا به وێم وده‌سم که‌رذ قسه‌ که‌رذه‌ی.و جه باره‌و کسمیشۆ چنه‌ش په‌رسانێ.هه‌ر پاسه که ئیسه واتم ئاذ لووکس وره‌شیه‌نه‌ هه‌رمانه که‌رێ.چن لاذێو پێوه‌ره‌ قسێما که‌رذێ.ئی بابه‌ته‌ یاراش دا به‌ ئاذی.گه‌ره‌کش بێ حاڵتێوی وێمانه‌یی گێرۆ وێ،به‌ڵام من ڕوه‌م نه‌ذا پنه.ئایا ڕاس نمه‌واچوو ئاغه‌ی بۆرن؟ ئاغه‌ی بۆرن که هاڵه‌ده‌وا دیه‌ی دیێ په‌ی پاڵه‌یه‌کاش، داواچش نه‌ذاوه‌. ژه‌نه‌کێ درێژه‌ش دا: ئاخرێش ئاذ یاوانه‌ که من کناچێوی ژیره‌نا و ڕه‌و‌تێوی ژیرانه و پیه‌یانه‌ش گێرت وێ.ئا ڕوه‌ لا گرذ یه‌ک شه‌مانێو ئه‌ی.ئاذ فره ئه‌راگێڵم بیه‌بێ کاکه ومنیچ فره گه‌ره‌کم بێ.ئا وه‌خته‌ هه‌رزه‌کارێوی فره‌ زه‌ریف بێ.کۆرتی سپتامبره‌نه‌ شووم که‌رذ پنه و خیابانوو مه‌رتیریه‌نه دووکانێوما که‌رذۆ.چن ساڵێ ئاژه‌ما خاس نه‌بێ کاکه.کار خاس نه‌لێ ڕاوه‌ و ته‌نانه‌ت نه‌تاوێنمێ شامپاینێو بسانمێ و ده‌سما کێشا جه کاتانه‌یما. جه‌ کاروو مامه‌ڵه‌ینه چێوانێو ته‌ر گنانه مه‌ژگوو ئانزانی. ئانزان فره‌ته‌ر ویرش ئینا لا سنۆقوو زه‌ڕیه‌وه‌ تا لا گۆڵاوه‌.وه‌ره‌وه‌ره‌ی"کم کم"بێ ئینه‌یه‌ که یاومێنێ پیر و ئه‌هوه‌نێ بیه‌یمێ که ئتر ویرما نه‌مه‌نه‌بێ لا ڤیان و وه‌شه‌ویسیه‌وه‌.تا وه‌ختێو که ئانزان ئه‌ره‌ویای که‌می ڤیانی نه‌که‌رۆ، داخێ نموه‌رۆ. وئاخرش،کار و کاسپیما خاسته‌ر وجه بابه‌توو دماڕۆی خیاڵما ڕه‌حه‌ت بی،به‌ڵام ئه‌سێح نه‌زانێنێ که چێشم سه‌ر ئامان.وه‌ره‌ وه‌ره‌ی پسه‌و کناچێوی که‌م ته‌مه‌نێ‌ خیاڵاتیه‌ بیا.ته‌ماشه‌و ئه‌سپ کێشا که ئاخنیه‌ی بێنێ چنی گۆڵا و خیابانه‌نه‌ لوه‌ی لوێنێ،هه‌رسوو چه‌مام به‌رئارێنێ.وه‌ختێو که په‌شتوو سنۆقوو دووکانیه‌نه‌ نیشێنێره و بۆ وه‌نه و‌شه‌ی ئێژنه‌وێنێ کرژ دڵم گنێ ته‌په‌ته‌پ که‌رذه‌ی.یاگێمه‌نه هۆرزێنێوه ولۆژه‌ لۆژ لوێنێ بناروو به‌ره‌که‌ی و دیێنێ په‌ی ئاسمانی. ساتێو که خیابانه‌نه‌ مذیه‌ی په‌ی ئاسمانی، ئاسمان پسه‌و ڕۆخانێوی درێژیا که‌ به قه‌مچ و پێچی فره‌ ئاسمانوو پاریسیه‌نه‌ ویه‌رۆ و په‌له‌وه‌ره‌کێش پسه‌و ماساوانێویه‌نێ که دلێشه‌نه‌ ویه‌را.ئی ویرێ چی ته‌مه‌نه‌و منه‌نه‌ هه‌رانێنێ!به‌ڵام چ چه‌مه‌ ڕاوێۆ‌تا هه‌ن کاکه؟ وه‌ختێو ئانزان گرذوو ته‌مه‌نیشه‌نه هه‌رمانه که‌رۆ،لاذێۆ"لحظه‌" یاڤۆ وه‌رۆ که میاڤۆنه تاوێ کارانێو ته‌ر که‌رۆ و ئاوه‌خته‌ داخێ وه‌رۆ.ئه‌رێ،ئه‌ره‌ویای ماته‌می که‌رۆ.ویرێ که‌ردێوه‌ که منیچ تاوێنێ ویس ساڵێ ته‌مام پسه‌و ئی ژه‌نا به‌و په‌ی دارسانی و ماچێ ده‌و.ئه‌جێم چن وه‌شا وته‌ی چیروو گه‌ڵایانه‌،ساتێوه‌نه که ڤیانوو که‌سێوی ته‌ر دڵته‌نه‌ بۆ.و شه‌و و ڕۆ ویرم لا ئی چیویه‌وه‌ بێ.پاسه وڕ بێنێنه تریفه‌و مانگێ که وێنه‌ش سه‌روو ئاوێوه‌ بێ که دڵم پوه‌ بێ دلێشه‌نه‌ وێم خنیکنوو. ئه‌وه‌ڵۆ زاتم نه‌بێ چی بارۆ چنی ئاغه‌ی بۆرنی قسێ که‌روو. زانێنێ که گێرۆم گاڵته‌ وکیانۆم شۆنوو نه‌ی و چه‌ن وره‌ته‌ی!و مشۆم واچوو که هه‌جگیز کاک نیکۆلاس خراب نه‌بیه‌ن چنیم،به‌ڵام به وینته‌ی وێم دلێ جامیه‌نه،خاس یاوێنێنه که منیچ نمه‌تاوو هه‌رمانێوی چێمنه‌ که‌روو. سا،ڕاچنم گێرت و چه‌نه‌وازم که‌رذ که بلمێ گێڵه‌ی په‌ی ئۆڵگێوی"منطقه"که چانه پێوه‌ره‌ ئاشنه‌ی بیه‌یمێ.ئاذ به وه‌شحاڵی ئه‌رێش داونه و ده‌وروو نۆی بێ که یاوه‌یمێ ئێگه. به‌ڵام وه‌ختێو که لوه‌یمێ دلێ خه‌له‌که‌ی، ئه‌ره‌ویام که‌رذ که که‌لاوه‌ گێڵاناوه‌ په‌ی حاڵه‌توو ئۆسای.دڵوو ژه‌نا پیر نمه‌بۆ!وبه‌ ڕاسی پی جۆره‌ که ئیسه‌ هه‌ن، شوه‌که‌م نه‌وینێنێ.به‌ڵکووم پسه‌و ئۆسای وینێنێش. قه‌سه‌م وه‌رووکاکه.ڕاس واچوو جمنه‌ره‌"تحریک" بیێبێنێ.باوشیم که‌رذ پۆره‌. وه‌ڵێنه ئه‌جێش گه‌ره‌کما له‌تمه‌ش ده‌و ونه و واقش به‌رذه‌بێ. ئه‌واڕه‌م واچێ:ئارۆ ساعبێ شێته بیێنێ.شێته.....چێش که‌ری.....؟ من گۆش نه‌ذێنێ به قساش.ته‌نیا ده‌نگوو دڵوو وێم ئێژنه‌وێنێ.به‌رذم دلێ دارسانه‌که‌ی و ئتر مزاندێ....من ته‌نیا ڕاسه‌م واته‌ ئاغه‌ی شاردار.گرذوو هه‌قێقه‌تی. شاردار که پیه‌یوی عال و دڵ ڕه‌حمین بێ هۆرستۆ. زه‌رذه‌ خوێوێش که‌رذ و واتش:واڵێ!خێر به‌یدێ،و چیروو ئا گه‌ڵا و دارانه بێ خه‌مێ بیدێ.

نویسته‌ی:گی دو موپاسان

هۆرگێڵن:بێهرووز حاجی ‌‌‌